عید الاضحی تے محرم الحرام اُتے احتیاط نہ کیتی گئی تے کورونا کیساں وچ وادھا ہو سکدا اے: وزیراعظم

اسلام آباد: وزیراعظم عمران خان دا کہنا اے کہ عید الاضحی تے محرم الحرام اُتے احتیاط نہ کیتی گئی تے کورونا کیساں وچ وادھا ہو سکدا اے۔ وزیراعظم عمران خان نے میڈیا بریفنگ دے دوران آکھیا دنیا وچ ساڈی پہلی حکومت سی جہنوں سمجھ آ گیا سی کہ جدوں تہاڈے دیس وچ غربت ہووے تے سانوں کیویں ایس کورونا وباء نال لڑنا ہووے گا، اسیں جہڑے اقدامات کیتے ایہناں توں کورونا کیساں وچ کمی آئی، 3دن دے دوران دیس وچ وائرس نال سب توں گھٹ موتاں ہوئیاں، شروع وچ ساڈے اُتے دباء پایا گیا اسیں مکمل لاک ڈاؤن کریئے پر ساڈا سمارٹ لاک ڈاؤن دا فیصلہ بہترین رہیا۔ وزیراعظم آکھیا پاکستان وچ کورونا کیساں وچ کمی آ رہی اے تے ہسپتالاں تے بھار انتہائی گھٹ ہو چکیا اے، سب توں ودھ لاک ڈاؤن دا اثر ہیٹھلے طبقے تے پیا، اسیں سوچیا کورونا توں بچاندیاں بچاندیاں انج نہ ہووے کہ ساڈے لوک بھوک نال مر جان ایس لئی غریب لوکاں نوں بچان لئی شفافیت نال احساس پروگرام شروع کیتا، مشکل حالات توں بچن لئی احساس پروگرام نے غریباں دی بہت مدد کیتی۔ وزیراعظم آکھیا وائرس نال دنیا ہن تک سیکھ رہی اے ، احتیاط نہ کرن تے کورونا فیر خطرناک ہو سکدا اے، اسیں احتیاط نہیں کیتی تے سانوں ہور نقصان اپڑ سکدا اے، ایس لئی عوام توں اپیل کرنا آں عید الاضحی احتیاطی تدابیر دے نال منان۔