پرواز توں پہلاں پی آئی اے دے میزباناں دا الکوحل ٹیسٹ لازمی قرار
پی آئی اے نے پرواز توں پہلاں اپنے فضائی میزباناں دا الکوحل ٹیسٹ لازمی قرار دے دتا۔ پی آئی اے نے فضائی میزباناں لئی نویں احکامات جاری کر دتے۔ آئندہ فلائٹ توں پہلاں پی آئی اے دے سارے فضائی میزباناں دے الکوحل ڈوپ ٹیسٹ لازمی قرار دے دتے گئے نیں۔ اندرون و بیرون دیس ساری پروازاں تے تعینات کیبن کریو نوں جہاز وچ سوار ہون توں پہلاں ساہ دا معائنہ کروانا ہووے گا۔ ٹیسٹ دا مقصد کریو وچ الکوحل تے نشہ آور شیواں دے استعمال دی روک تھام اے۔ پی آئی اے میڈیکل ڈویژن دی کیبن کریو لئی جاری نویں ایڈوائزری فوری طور تے نافذ العمل ہووے گی جہدے تحت پی آئی اے دی فلائٹ سرجنز تے میڈیکل افسر بریفنگ رومز وچ آپ کیبن کریو دے ساہ دا معائنہ کرن گے۔ سول ایوی ایشن اتھارٹی پہلاں توں ای پائلٹاں دے ٹیسٹ کر رہی اے تے ہن پی آئی اے وی ہر پرواز توں پہلاں اپنے فضائی میزباناں دے ٹیسٹ لازمی کرے گی۔ عالمی فلائٹ سیفٹی قواعد و ضوابط تے انٹرنیشنل سول ایوی ایشن رولز دے تناظر وچ پی آئی اے ولوں ایہ ٹیسٹ لازمی قرار دتے گئے نیں۔
