کورونا جناں جلدی ختم ہووے گا ، دیس لئی معاشی طور تے اوناں ای بہتر اے: گورنر پنجاب
لہور: گورنر پنجاب چودھری سرور آکھیا اے کورونا جناں جلدی ختم ہووے گا دیس لئی معاشی طور تے اوناں ای بہتر اے، مویشی منڈیاں وچ ایس او پیز تے سختی نال عمل ویلے دی لوڑ اے۔ گورنر پنجاب چودھری سرور نے وفود نال گل کردیاں آکھیا عید تے محرم وچ عوام دی لاپرواہی نال کورونا دوبارہ بے قابو ہو سکدا اے، کورونا توں بچاؤ لئی عید سادگی نال منان دے سوا کوئی آپشن نہیں، کورونا دے خلاف این ڈی ایم اے دا کردار وی تریخ دا حصہ رہوے گا، اسیں سب نے رل کے کورونا نوں شکست دینی اے احتیاطی تدابیر تے سب عمل کرن، اپوزیشن نوں وی کورونا دے خلاف جنگ وچ حکومتی اداریاں دا ساتھ دینا چاہیدا اے۔ چودھری سرور دا کہنا سی عمران خان دا کوئی ذاتی ایجنڈا نہیں ملکی ترقی تے خوشحالی اوہناں دا مشن اے، ملکی تریخ وچ پہلی وار کوئی سرکار مافیا دے خلاف ایکشن لے رہی اے، اسیں اداریاں نوں سیاسی مداخلت توں پاک تے مضبوط بنا رہے آں۔ دیس نوں حقیقی معنیاں وچ ترقی یافتہ، مضبوط ، خوشحال تے مستحکم بنانا چاہنے آں۔ تحریک انصاف دی حکومتی پالیسیاں دا محور ہر شعبے وچ عوام نوں ریلیف دینا اے۔
