حکومت اُکا ناکام، شفاف چوناں کرائیاں جائون: قیصر شریف

وزیر اعظم عمران خان دوائیاں، آٹا، چینی تے تیل مافیا دے سہولت کار نیں: سیکرٹری اطلاعات جماعت اسلامی

انٹرویو: علی عمران چٹھہ

قیصر شریف دا شمار جماعت اسلامی پاکستان دے اوہناں نوجوان قائدین وچ ہوندا اے جنہاں بہت جلدی اپنی محنت تے سیاسی بصیرت پاروں ترقی کیتی۔ مولانا ابواعلیٰ مودودی دے نظریات دے امین قیصر شریف دھیمے مزاج تے شفیق طبیعت تے اصولی موقف اُتے ڈٹ جان پاروں قومی سیاست وچ وی اپنا منفرد مقام بنا رہے نیں۔جماعت اسلامی پاکستان دے سیکرٹری اطلاعات دے طور تے اوہ بوہت متحرک نیں اکثر و بیشتر صحافی دوستاں نال جماعت دے قومی سیاسی موقف اُتے تبادلہ خیال کردے نظر آئوندے نیں۔ قیصر شریف نوں جتھے امیر جماعت اسلامی سینیٹر سراج الحق دا بھرپور اعتماد حاصل اے اوتھے جماعت اسلامی دے اہم راہنما تے سرگرم کارکنان وی اوہناں تے نثار ہوندے نظر آندے نیں۔ کرشماتی شخصیت دے حامل جماعت اسلامی دے سیکرٹری اطلاعات قیصر شریف ہوراں روزانہ بھلیکھا نال اُچیچی گل بات کیتی ایس گل بات دا موضوع جتھے حکومتی کارکردگی سی اوتھے ملکی مسئلیاں دا حل وی زیر بحث آیا۔ قیصر شریف ہوراں حکومتی کارکردگی اُتے اظہار خیال کردے ہوئے کہیا کہ 2018 دے قومی انتخابات قطعی شفاف نہیں سن پر فیر وی اسیں ایس حکومت نوں عوامی خدمت دا موقع دتا پر انہاں دی 2 سالہ کارکردگی انتہائی مایوس کن اے تے عوامی اعتماد کھو چُکی اے، ساڈا مطالبہ اے کہ صاف و شفاف قومی چوناں نوے سِرے توں کروائے جان۔ کیونکہ نیازی سرکارکرونا توں لے کے ملکی معیشت تیکر ہر محاظ تے چیلنج دے وچ مکمل ناکام ہوئی اے۔ اگرچہ نواز شریف حکومت دی کارکردگی وی مثالی نہیں سی پر ایہناں توں لکھ درجے بہتر سی۔ ماضی دی حکومت دے دور وچ 5.8 قومی شرح نمو سی جیہڑی ہن منفی ہو چکی اے۔ عمران خان دی معاشی ٹیم دے سربراہ تے پی ٹی آئی دے افلاطون اسد عمر نے ایس بربادی دی نینہہ رکھی، کسی توں ڈکٹیشن نہ لین دے دعوے کرن والے وزیراعظم عمران خان نے ملک نوں آئی ایم ایف ورلڈ بینک دی ٹیم دے حوالے کر دتا اے۔ جیہڑے قومی تےعوامی مفاد دی بجائے اپنے اداریاں دے مفاد نوں ملحوظ خاطر رکھ کے کم کر رہے نیں۔

پیپلز پارٹی نوں ناکام تے کرپٹ کہن والے عمران خان نے آئی ایم ایف دے ملازم تے پی پی پی دے وزیر خزانہ حفیظ شیخ نوں اپنا مالیاتی مشیر تے قومی خزانے دا امین بنا کے اپنے دعویاں دی نفی کر دتی اے۔ ملک دی ساری معاشی پالیسیاں تے سرگرمیاں حکومت دی بجائے آئی ایم ایف کنٹرول وچ نیں ہر چیز اُتے بے تحاشہ ٹیکس لا کے ملکی پیداوار تباہ کر دتی گئی اے۔ ایہناں دا وس نہیں چلدا اوہ عوام دے ساہ لین اُتے وی ٹیکس لا دین۔ لکھاں کوششاں دے باوجود ملکی ترقی زبوں حالی دا شکار اے۔ ساریاں کھان پین والیاں شیواں تے ہور ضروریات زندگی لوکاں دی پہنچ توں باہر ہوندیاں جا رہیاں نیں۔ ایس حکومت دی ناقص کارکردگی دی وجہ تے زندگی دے ہر شعبے نال تعلق رکھن والا ہر پاکستانی مشکلاں دا شکار اے۔ تاجر، صنعتکار، کسان، مزدور، سرکاری و غیر سرکاری ملازمین، ہر طبقہ فکر دا بندہ ایس حکومت ہتھوں عاجز اے۔ دوائیاں، آٹا، چینی، بجلی، پٹرولیم مصنوعات دے بحران ایہناں سب توں عام بندا متاثر ہویا اے پر حکومت صرف بیان دین توں علاوہ کجھ نہیں کردی حقیقت ایہہ وے کہ ایہناں سارے سکینڈلاں دے ذمے داروزیراعظم عمران خان دے دوست تے کابینہ دے اراکین نیں۔جماعت اسلامی پاکستان دے سیکرٹری اطلاعات قیصر شریف ہوراں آکھیا کہ تاریخ وچ پہلی واری ایس نالائق حکومت نے آٹے اُتے ٹیکس لا دتا اے جہدے وچ تے فلور ملز مافیا نوں فائدہ تے غریب بندے نوں مشکل ہو رہی اے۔ ساڈے ملک دی کرنسی غیر سنجیدہ معاشی حکمت عملی دی وجہ توں 40 فیصد تیکر ڈگ گئی اے، بنگلہ دیش تے افغانستان دی کرنسی پاکستان توں بہتر اے، اوہناںتیل دیاں قیمتا ں بارے آکھیاکہ عالمی منڈی وچ ایس ویلے تیل دی قیمتاں وچ کمی دا رحجان اے جد کہ ساڈے ملک وچ 15 فیصد ٹیکس وصولی دا شور مچان والی جماعت 100 روپئے لٹر فروخت کر رہی اے جد کہ ایس ویلے تیل 50 فیصد ٹیکس وصولی ہو رہی اے نواز شریف دور وچ تیل 34 ڈالر بیرل سی تے پاکستان وچ ادھی قیمت 74 روپئے سی جد کہ اج 28 ڈالر فی بیرل عالمی نرخ نیں تے قیمت اسمان نوں چھو رہی اے۔ حکومت دی غلط اقتصادی حکمت عملی دا نتیجہ اے کہ ایس ویلے ملک دے نکے وڈے 5 لکھ ادارے بند نیں جدی وجہ توں بے روزگاری دا جن بے قابو ہو گیا اے۔ محتاط اندازے دے مطابق 1 کروڑ 70 لکھ دے نیڑے بے روز گار ہو چکے نیں۔

عمران خان حکومت دے دور وچ لوکائی واسطے دو ویلے دی روٹی کمانا محال ہو گیا اے۔ کورونا وباء، ٹڈی دل، کسان تے زراعت دی حالت زار اُتے گل بات کردیا سیکرٹری اطلاعات جماعت اسلامی پاکستان نے آکھیا کہ ٹڈی دل توں 65 ضلعے متاثر ہوئے نیں لیکن حکومت نے چند لکھ ایکڑ اُتے سپر ے کر کے سب اچھا دا راگ الاپیا۔ کسان جیہڑے پہلے ای کھاداں دی مہنگائی تے فصلاں دی مناسب قیمت نا ملن ہتھوں پریشان حال نیں اوہناں واسطے ٹڈی دل مزید مشکلاں لے کے آیا تے اُتوں حکومت ولوں کوئی قابل قبول مالی امداد نہ ملن نا ل اوہناں دی معاشی حالت ہور تشویشناک ہو گئی اے۔ ایہو ای حال کورونا بارے حکومت دیاں پالیسیاں د اے، جےحکومتی وزیر پاک ایران بارڈر توں اپنے من پسند تے حمایتی بندیاں نوں بلا روک ٹوک پاکستان وچ آون دی اجازت نہ دیندے ہوائی اڈیاں تے بارڈراں تے سکینگ دا مکمل انتظام کردے تےحالات مختلف ہوندے۔ ایہناں وکھاوے واسطے کروڑاں روپئے خرچ کر کے جیہڑے قرنطینہ سینٹر بنائے سن اوہ وی عالمی معیار دے مطابق نہیں سن، اوہناں وچ وی مالی بد عنوانیاں دی اطلاعات نیں۔۔ وزیراعظم ہوراں کدی لاک ڈائون دی مخالفت کیتی تے کدی حمایت کیتی۔ انج لگدا سی کہ جس طرح وزیراعظم ہوراں نوں آپ نہیں پتہ کہ اوہ کیہ کرنا چاہندے نیں۔ انٹرنیشنل امدادی پیکج دا ذکر کردیاں ہوئیاں اوہناں دا آکھنا سی کہ عالمی اداریاں ولوں حکومت دے نال بھرپور مالی تعاون کیتا گیا اے۔ قرضے دیاں قسطاں وی موخر کیتیاں گئیاں نیں۔ وزیراعظم دے 12 سو ارب روپئے دے کرونا پیکیج اُتے تبصرہ کردے ہوئیاں اوہناں آکھیاں کہ 12 ہزار 500 روپیہ چند لکھ افراد نوں دے کے باقی پیسہ کھاتیاں وچ صاف کر دتا گیا اے۔ساڈی حکومتی دی کارکردگی دا اندازہ ایس امر توں لایا جا سکدا اے کہ عوام ایہناں دی ایس غلط پالیسی دی بھینٹ چڑھ گئے نیں تے سینکڑاں، ہزاراں قیمتی جاناں ضائع ہو گئیاں نیں۔ حکومت نے عوام تے عوام ڈاکٹراں دی وی کوئی سیوا نہیں کیتی۔ ڈاکٹرز تے ہیلتھ سٹاف بنیادی چیزاں ماسک تے کرونا کِٹاں منگدا رہیا لیکن ایہناں دی التجاواں دے باوجود بنیادی حفاظتی سامان تیکر مہیا نہیں کیتا گیا جہدی وجہ توں کئی سینئر ڈاکٹرز تے ہیلتھ سٹاف کرونا پاروں شہید ہو گئے۔حکومت دے اک دم لاک ڈائون دے اعلان نال تباہ حال ملکی معیشت مزید خسارے وچ چلی گئی تے ملک دا بیڑا غرق ہو گیا۔ قیصر شریف ہوراں کورونا وباء دے دناں وچ جماعت اسلامی دی کارکردگی بارے گل کردیاں آکھیا کہ عوام دےتعاون نال 350کروڑ روپئے دا ملک بھر وچ مستحق افراد وچ راشن ونڈ کے ثابت کر دتا اے کہ اسیں حکومت دیاں دوجیاں جماعتاں دی طرح وڈے وڈے دعوے نہیں کردے بلکہ عملی خدمت کر رہے آں جہدی مثال ملک بھر وچ سینکڑاں تعلیمی ادارے، فلاحی مراکز، دستکاری سکول، ڈسپنسریاں، ہسپتال فری ایمبولنس سروس و دیگر خدمت خلق دے ادارےنیں جیہڑے اسیں کامیابی نال چلا کے ثابت کر دتا اے کہ ساڈے کارکناں تے لیڈراں توں ودھ ایمانداری نال کوئی لوکائی دی سیوانہیں کر سکدا۔اوہناں حکومت اُتے زور دتا کہ ملک وچ فی الفور بلدیاتی انتخابات صاف تے شفاف کروائے جان ۔ تاں جے ملک وچ نویں قیادت پھل پھُل سکے تے عوام دے مسائل مقامی سطح اُتے حل ہون لیکن ایہناں انتخابات توں قبل الیکشن کمیشن آف پاکستان نوں اپنے انتخابی قوانین وچ بہتری دی لوڑ اے۔تاکے سرمایہ دار طبقہ لوکائی دی خدمت دے ناں تے کاروبار نہ کر سکے لوٹا کریسی تے دل بدلو لیڈراں دا خاتمہ ہوئے۔ مستوط طبقہ اگے آئے اسیں الیکشن کمیشن توں مطالبہ کرنے آں کہ فی الفور نویں بلدیاتی انتخابات دے شیڈول دے اعلان دے نال نال اپنے قوانین اُتے سختی نال عمل کروان دا اعلان وی کرے۔ اگلا قومی الیکشن جماعت اسلامی اپنے انتخابی نشان تے وکھری شناخت نال کلے لڑے گی ایہہ جماعت اسلامی تے قائدین تے کارکناں دا پکا فیصلہ اے۔ ہم خیال جماعتاں نال سیٹ ایڈجسمنٹ ممکن اے۔اسیں آئندہ انتخابات وچ نوجوان نسل نوں 40 فیصد تیکر ٹکٹاں دین دا ارادہ رکھنے آں۔ اوہناں آکھیاں کہ بانی جماعت اسلامی سید مودودی دے سیاسی وارت اج تیکر کسے وی بدعنوانی وچ ملوث نہیں پائے گئے اوہناں نے آکھیا کہ امیر جماعت اسلامی سینیٹر سراج الحق، سابق امیر سید منور حسن، قاضی حسین احمد، سیکرٹری جنرل پروفیسر غفور احمد، ناظم اعلیٰ کراچی نعمت اللہ قومی سیاست دے افق اُتے چمکدے ستارے نیں جنہاں نے لوکائی دی خدمت تے خوف خدا نوں اپنا شعار بنایا۔ کشمیر پالیسی تے بھارتی جاسوس کلبھوشن یادیو تے اوہناں نے آکھیا کہ ساڈا موقف عوامی اے اسیں کشمیر دے مسئلے دا کشمیری عوام دی مرضی نال حل چاہنے آں تےبھارتی دہشت گرد کلبھوشن یادیو نوں سینکڑاں پاکستانیاں دا قاتل سمجھنے آں۔ ایہناں معاملات تے جماعت اسلامی کسے قسم دی لچک دا مظاہرہ نہیں کرے گی۔ جے حکومت نے لوکائی دی مرضی دے خلاف کوئی قدم چکیا تے جماعت اسلامی پاکستان دی قیادت تے اوہدے کارکنان شدید ترین رد عمل دا مظاہرہ کرن گے۔ جماعت اسلامی پاکستان دے سیکرٹری اطلاعات قیصر شریف نے روزانہ بھلیکھا دے توسط نال عوام نوں اپیل کیتی کہ اوہ جماعت اسلامی دا ساتھ دین تاں جے ملک نوں صحیح معنیاں وچ اسلامی فلاحی ریاست بنایا جا سکے۔ اوہناں آکھیا کہ سینیٹر سراج الحق دی قیادت وچ ساڈی جماعت دے ہر شعبہ زندگی دے ماہرین ملک نوں اقتصادی بحران توں کڈ سکدے نیں کیوں جے ایس ویلے ملک وچ جماعت اسلامی ای واحد جماعت اے جہدا ہر کارکن تے راہنما ایمانداری دا پیکر اے اوہناں ملک دے مسائل حل کرن واسطے فوری انتخابات دا مطالبہ وی دہراندے ہوئے آکھیا کہ نیازی سرکار ناکام اے ایہناں عوام دا جیناں دوبھر کر چھڈیا اے اوہناں دا اقتدار توں جاناں عوامی نعرہ بن چُکیا اے تے ملکی مسائل دا حل نویں حکومت ای کر سکدی اے۔