ایہ ویلا تصادم تے ٹکراؤ دا نہیں اگے ودھن دا اے: شہباز شریف

لہور: مسلم لیگ (ن) دے صدر تے قومی اسمبلی وچ قائد حزب اختلاف شہباز شریف دا کہنا اے موجودہ اپوزیشن پاکستان دی تریخ دی سب توں ذمہ دار اپوزیشن اے۔ برطانوی ہائی کمشنر کرسٹن ٹرنر نے ویڈیو کانفرنس دے راہیں شہباز شریف نال رابطہ کیتا جہدے وچ دوواں دے وچکار وکھو وکھ امور تے تبادلہ خیال کیتا گیا۔ ایس موقع تے شہباز شریف دا کہنا سی برطانیہ تے پاکستان وچکار تعلقات تریخی تے احترام دے رشتے تے مبنی تعلقات نیں۔ شہباز شریف آکھیا موجودہ اپوزیشن پاکستان دی تریخ دی سب توں ذمہ دار اپوزیشن تے تے تعمیری انداز وچ اپنا کردار ادا کر رہی اے۔ اوہناں ہور آکھیا خوشحالی تے عوام دی بہتری سرکار دی اولین ترجیح ہونی چاہیدی اے، معاشی چیلنجز تشویشناک نیں پر اپوزیشن آئینی ذمہ داری ادا کردی رہوے گی۔ شہباز شریف آکھیا ن لیگ نے دہشت گردی دے عفریت نوں کامیابی نال شکست دتی، توانائی دی قلت دا مسئلہ حل کیتا۔ برطانوی ہائی کمشنر کرسٹن ٹرنر نے شہباز شریف دی کارکردگی نوں سراہیا تے آکھیا ڈیفید تے برطانوی معاونت دے منصوبے کامیابی نال پورے ہوئے۔ برطانوی ہائی کمشنر آکھیا کورونا دے باوجود برطانیہ پاکستان وچ ترقیاتی پروگراماں لئی پرعزم اے، پاکستان تے برطانیہ ترقی دے مشترکہ اہداف لئی کوشاں رہن گے۔