اسیں 25ورھے توں رویت ہلال نوں چلا رہے آں، فواد چودھری کتھوں سائنسدان آ گئے؟ مفتی منیب

کراچی: مرکزی رویت ہلاک کمیٹی دے چیئرمین مفتی منیب نے اک وار فیر وزئر سائنس اینڈ ٹیکنالوجی فواد چودھری نوں آڑے ہتھاں لیندیاں آکھیا اے اسیں 25ورھیاں توں رویت ہلال نوں چلا رہے آں، فواد چودھری کتھوں سائنسدان آ گئے؟ کراچی وچ پریس کانفرنس کردیاں مفتی منیب الرحمان آکھیا مقبوضہ کشمیر وچ لاک ڈاؤن نوں اک سال ہون والا اے تے کشمیر دے معاملے تے عالمی سطح تے بھارت نوں واضح پیغام نہیں دتا گیا، سرکار نے قرارداداں پاس کرن دے علاوہ کجھ نہیں کیتا۔ اوہناں آکھیا عید تن دن ہوندی اے ایس لئی عمران خان پیر نوں وی چھٹی دا اعلان کرن۔ چن بارے گل کردیاں مفتی منیب دا کہنا سی سائنس تے علماء وچ کوئی اختلاف نہیں، سانوں سائنس دا پتہ اے، جنی سائنس تسیں جاندے او اونی اسیں وی جاندے آں، محکمہ موسمیات دے میٹرولوجسٹ ساڈے نال نیں تے سائنسدان ساڈے نال نیں، ساڈی کمیٹی وچ شامل نیں۔چیئرمین مرکزی رویت ہلال کمیٹی آکھیا جنی ڈگریاں فواد چودھری دے کول نیں ساڈے کول وی نیں جہناں نے فواد چودھری نوں کیلنڈر بنا کے دتا اوہ ساڈی کمیٹی دے ممبر نیں۔