چیف منسٹر تے چیف سیکرٹری پنجاب نوں سلام

لکھت:عتیق انور راجہ

اسیں کجھ ہفتے پہلے نوائے وقت دے ایہناں ای معتبر صفحیاں دےذریعے لکھیا سی کہ ایس ویلے عثمان بزدار ای اوہ شخصیت نیں جیہڑی پنجاب وچ پی ٹی آئی حکومت نوں کامیابی نال اگے لے کے ٹر سکدے نیں تے ایہناں دی کارکردگی کسے وی دوجے صوبے توں گھٹ نہیں نظر آندی پر ایس دے باوجود نہ جانے کیوں کجھ لوک ہر دوجے تیجے مہینے اپنے ذریعے پنجاب وچ چیف منسٹر دی تبدیلی دیاں خبراں چلوانا شروع کر دیندے نیں۔ جناب عثمان بزدار دی کارکردگی دی گل کریے تے ایہناں دو ورھیاں وچ پنجاب وچ بوہت سارے انج دے کم ہوئے نیں جنہاں دے بارے پہلے شاید کسے نے سوچیا وی نہ ہوئے۔ ہر طرح دیاں افواہواں، ہر طرح دے مصائب، ہر طرح دی بیان بازی، ہر طرح دے دبائو دے باوجود نویں حکومت اپنی آئینی مدت دے دو ورہے پورے کرن وچ کامیاب ہو چکی اے۔ پنجاب وچ وزیراعلیٰ عثمان بزدار دا ناں اگے آیا تے پہلے دن توں ای ایہناں دی کم گوئی اُتے ہر پاسیوں تنقید ہون لگی۔ ہن یا تے عثمان بزدار تنقید کرن والیاں دے سوالاں دا جواب دین وچ ویلا صرف کردے ہر دن ٹی وی چینلز اُتے پریس کانفرنساں کردے یا اپنی کارکردگی نال مخالفین دے مونہہ بند کردے۔ وزیر اعلیٰ پنجاب نے دوجا راہ اختیار کیتا تے اپنا سارا ویلا اپنی ساری توجہ عوام دے مسئلیاں نوں سمجھن تے ایہناں نوں حل کرن وچ لا دتا۔ وزیراعلیٰ پنجاب دے عوام دے مسئلے نوں حل کرن لئی دن رات کم کردے رہے۔
صاحبو! پاکستان وچ کہیا جاندا اے کہ کسے بندے نے کوئی کاروبار شروع کرنا ہوئے یا گھر فیکٹری بنانی ہوئے اینوں نقشے تے محکمانہ کاغذات پاس کران لئی مہینوںمختلف دفتراں دے چکر لانے پیندے نیں۔ ایہہ سلسلا پچھلی کئی دہائیاں توں چلدا آ رہیا سی۔ ہن وزیراعلیٰ پنجاب عثمان بزدار دی قیادت وچ ای گورننس اُتے محکمانہ اصلاحات دی طرفوں اک اہم قدم چکیا گیا اے۔ ہن پتہ چلدا اے کہ کنسٹرکشن سیکٹر دے فروغ لئی تعمیراتی شعبے توں متعلقہ این او سیز ای خدمت مرکزاں نال ون ونڈو اپریشن دے ذریعے مہیا کیتے جان گے۔ نقشیاں دی منظوری، تکمیل، تعمیر، سرٹیفکیٹ، رہائشی کالونیاں دی منظوری ایہہ سب ہن سالاں دفتراں دے چکر لان دی بجائے نویں جاری کردہ شیڈول دے مطابق ہن کجھ ہفتیاں وچ ممکن ہو سکن گے۔ ایس سارے منصوبے نوں پنجاب دے لوکاں لئی آسان بنان لئی چیف سیکرٹری جناب جواد رفیق ملک خصوصی طور تے متحرک نیں۔ موجودہ چیف سیکرٹری دے بارے سرکاری افسر دسدے نیں کہ جواد رفیق ملک صاحب واقعی اک ملنسار، پرہیز گار تے رکھ رکھائو والے افسر نیں۔ ایس توں پہلے اوہ پنجاب ہیلتھ سیکرٹری تے پنجاب لوکل گورنمنٹ سیکرٹری دے فرائض وی ادا کر چکے نیں جس نال پتہ چلدا اے کہ جواد رفیق ملک صاحب نوں پنجاب دے عوام دے بوہت سارے مسئلیاں دا بخوبی اندازہ رہیا ہوئے گا۔ ایہناں ای مسئلیاں توں آگاہ ہوندے ہوئے ہن ایہناں دی پوری کوشش اے کہ لوکاں نوں دفتراں دے چکر لان توں بچایا جائے تے تعمیراتی شعبے وچ لوکاں لئی کم دے موقعے پیدا ہون وچ سہولت کاری کیتی جائے۔ اسیں امید کرنے آں کہ عوام نوں ہن فائلاں چکے مختلف سرکاری دفتراں دے چکر نہیں لانے پین گے۔ اک ای چھت دے تھلے تے کمپیوٹرائزڈ انداز وچ کم ہون نال رشوت دے امکانات وی تقریباً مُک جان گے۔ عثمان بزدار بظاہر دھیمے انداز دے لگدے نیں پر ویلے نے ثابت کیتا اے کہ اوہ کس طرح مستقل مزاجی نال بنیادی مسئلیاں نوں حل کیتے جا رہے نیں۔ پسماندہ علاقے نال تعلق ہون دی وجہ نال ایہناں نوں عام لوکاں دے مسئلیاں دا بوہت چنگے طرح پتہ سی جویں جویں ویلا لنگھدا گیا تنقید کرن والے چپ ہوندے چلے گئے۔ عثمان بزدار نے وکھاوے بازی دی بجائے کم کرن اُتے زور رکھیا۔ اج اوہ پنجاب دے عوام دی بنیادی ضرورتاں نوں حل کرن لئی کم کر رہے نیں۔ عثمان بزدار نے ایسے خاموشی تے تیزی نال عوام دے بنیادی حقوق اُتے کم شروع کیتا ہویا اے کہ جس نال اوہ پچھلے ادوار دے سارے وزرائ اعلیٰ اُتے سبقت لیندے جا رہے نیں۔ پنجاب ہمیشہ توں خوشحال ترین علاقہ رہیا اے قدرت نے ایتھے ہر نعمت وافر مقدار وچ عطا کیتی ہوئی اے بس لوڑ اے کہ حکمران تے ایہناں دے لوک ترازو برابر رکھن۔ صرف اپنے گھر دیاں سڑکاں تے سکیورٹی اُتے توجہ نہ دین بلکے عوام دا خیال وی رکھن۔ وزیراعلیٰ پنجاب سردار عثمان بزدار بالکل ٹھیک کہندے نیں کہ اینے زیادہ وسائل نال مالا مال صوبہ پنجاب دے سابق حکمران جے بنیادی مسئلیاں اُتے وی توجہ دے لیندے تے اج پنجاب دے عوام ایہناں دے نال کھڑے ہوندے۔ جے حقیقت دی اکھ نال ویکھیا جائے تے پنجاب ہر دور وچ پاکستان دے باقی صوبیاں توں زیادہ پر امن زیادہ تعلیم یافتہ تے زیادہ قانون دا پاسدار رہیا اے تے اج وی جے ذرا دھیان نال ویکھیے تے ہر طرح دے تنقید دے باوجود پنجاب باقی صوبیاں توں  کدھرے اگے اے۔
ریسکیو 1122 توں لے کے پناہ گاہواں تیکر دے سفر وچ پنجاب نے ہمیشہ دوجے صوبیاں لئی مثال قائم کیتی اے۔ ہن یا تے دوجے وی پنجاب وانگوں ترقیاتی کماں اُتے دھیان دے لیا کرن یا دوجا طریقہ ایہہ وے کہ اوہ سارے ترقیاتی فنڈز خورد کر کے عوام دے اندر احساس محرومی نوں ودھا وا دیندے رہن۔ چیف منسٹر پنجاب عثمان بزدار تے چیف سیکرٹری پنجاب جواد رفیق ملک دی خدمت وچ ایہہ عرض کرنا اے کہ عوام دے مسئلیاں نوں ایس جذبے نال حل کرن دی کوشش کرن کہ عوام دے دلاں توں ایہناں لئی دعاواں نکلن تے عوام دل توں ایہناں نوں سلام کرے۔