کشمیری جھُکن گے نہ پاک فوج پچھے ہٹے گی!
تحریر:شاہد ندیم احمد
دنیائے تاریخ دا حتمی فیصلہ ایہو رہیا اے کہ اپنی آزادی لئی کوشش کرن والے آخر کار کامیاب تے سرخرو رہندے نیں ۔ پچھلے 73 ورھیاں توں کشمیری عوام وی اپنی آزادی تے خود مختاری ای نہیں، بلکے اپنی سلامتی لئی وی مصروف عمل نیں۔ اگرچے ہر بھارتی حکمران نے مقبوضہ کشمیر اُتے ظلم و ستم نوں اپنا وطیرہ تے چلن بنائے رکھیا، پر موجودہ وزیراعظم نریندر مودی نے انتہا پسندی تے خاص طور تے مسلمان دے خلاف نفرت دے جذبات نوں ابھارن دے ماضی دے سارے ریکارڈ توڑ دتے نیں ۔ بھارتی سرکار کشمیری عوام دی آزادی دی کوشش نوں ناکام بنان لئی نت نویاں چالاں چلدے رہندے نیں۔پر کشمیری عوام اپنے جذبہ حریت نال ہر سازشی چال نوں ناکام بناندے آئے نیں۔ ایسے تناظر وچ مودی سرکار نے بوہت گہری چال چلدے ہوئے بھارتی آئین دے آرٹیکل 370 تے A-35 نوں منسوخ کر دتا، تاں جے کشمیر نوں دنیا دے اگے نا صرف بھارت دا مستقل حصہ بنا کے پیش کیتا جائے بلکے غیر کشمیری بندیاں نوں بھارت دے دیگر علاقیاں توں لیا کے کشمیر وچ آباد کر دتا جائے۔
بھارتی وزیراعظم نے ایہہ غیر قانونی اقدام پچھلے ورہے پنج اگست نوں نافذ کیتا سی، ایس حوالے نال مقبوضہ کشمیر وچ ای نہیں، بلکے وطن عزیز وچ وی سیاسی تے سماجی سطح اُتے ایس دی شدید مذمت کیتی جاندی اے۔ پوری دنیا وچ پھیلے ہوئے کشمیری و پاکستانی عوام وی ایس مذمت وچ برابر دے شریک ہوندے نیں تے عالمی ضمیر نوں بیدار کرن دے نال انسانی حقوق دی دعویدار تنظیماں دی توجہ ایہناں مظالم ول دلوان دی پر امن کوشش کردے نیں کہ جنہاں نال مقبوضہ کشمیر دے مظلوم عوام نبر آزما نیں۔
اگرچے دنیائے عالم اُتے واضح ہو چکیا اے کہ مقبوضہ کشمیر وچ کوئی دن انج دا نہیں لنگھدا کہ جدوں بھارتی قابض سکیورٹی فورسز کسے بے گناہ کشمیری دے لہو نال اپنے ہتھ گندے نہ کردے ہون۔ پنج اگست توں بعد ہن تیکر کنے ای لوک شہید تے زخمی ہو چکے نیں۔ ایس دے صحیح اعداد و شمار دستیاب نہیں ۔ کیوں جے بھارتی فوج نے شہداء دے جنازیاں وچ شرکت اُتے جتھے پابندی لا رکھی اے، اوتھے مقبوضہ وادی دے سارے ہسپتالاں دی انتظامیہ نوں شہید ہون والیاں دے سرٹیفکیٹ جاری نہ کرن دی ہدایت وی دے رکھی اے۔ مقبوضہ کشمیر وچ انسانی حقوق دی پامالی ایس حد تیکر ودھ چکی اے کہ اقوام متحدہ نوں وی بھارت نوں کہنا پیا کہ اوہ انسانی حقوق دے ماہرین نوں کشمیر جان دیوے، جد کہ دوجے پاسے بھارت نے لائن آف کنٹرول اُتے وی اشتعال انگیز کاروائیاں وچ وادھا کر دتا اے۔ لائن آف کنٹرول دے ایس پار آزاد کشمیر وچ سویلین آبادی نوں گولہ باری دا نشانہ بنانا، ایس دا روز دا معمول بن چکیا اے۔ ایس دا پاک فوج موثر کاروائی دے ذریعے بھرپور جواب دے رہی اے پر بھارت نوں ویلے تے نکیل پانا ویلے دی اہم لوڑ اے۔ پاکستانی آرمی چیف نے وی بارہا بھارت نوں باور کروایا اے کہ پاک فوج کشمیریاں دی جدوجہد وچ ایہناں دے شانہ بشانہ کھلوتی اے تے اپنی ذمے داری نبھان لئی مکمل تیار اے۔ جے کوئی غلطی کیتی گئی تے پاک آرمی اپنی ذمے داریاں نبھان لئی آخری حد تیکر جان گے۔
ایہہ امر اپنی تھاں قابل افسوس اے کہ دو ایٹمی قوتاں آمنے سامنے نیں تے عالمی دنیا چپ تماشائی بنی ہوئی اے۔ پر امن دنیا انسانی حقوق دی بازیابی دے دعوے تے بوہت کردی اے تے جمہوریت دے حق وچ نعرے وی بلند کردی اے پر جدوں معاملہ فلسطین تے مقبوضہ کشمیر دا در پیش ہوئے تے ایہناں نوں سپ سنگھ جاندا اے۔ کشمیری عوام نوں عرصہ دراز توں ظلم سہندے ہوئے چنگی طرح پتا چل چکیا اے کہ اقوام متحدہ دے ایواناں وچ مظلوم کشمیریاں دی اواز سنی نہیں جا رہی تے اوہ ایہہ وی جان چکے نیں کہ جدوں گل کشمیر دی ہوئے تے مغربی دنیا دے معیار تبدیل ہو جاندے نیں۔ ایہہ عالمی دنیا دا دوہرا معیار ای دنیائے امن دی تباہی دا باعث بن رہیا اے۔عالمی دنیا جنا مرضی مظلوم کشمیریاں دی جدوجہد آزادی توں نظراں چرائے، مقبوضہ کشمیر دے عوام اپنی آزادی دی کوشش وچ بے مثال قربانیاں پیش کر رہے نیں تے اوہناں نے اپنی حالیہ جدوجہد دا سرخیل جواں سال شہید برہان وانی نوں تسلیم کر رکھیا اے، ایس لئی ایہناں دے حوصلے بلند نیں تے اوہ بھارتی سرکار دے ودھدے مظالم دے باوجود کسے طور وی بھارتی غلامی قبول کرن لئی تیار نہیں۔
ایس آزادی دی جدوجہد وچ کشمیری کلے نہیں، پاکستان حکومت تے عوام اپنے مسائل و مشکلات دے باوجود حق خودارادیت دلوان لئی کشمیریاں دے نال کھلوتے نیں ۔ اوہناں نے کشمیریاں دی ہر فورم اُتے نہ صرف بھرپور حمایت کیتی اے بلکے کشمیر لئی جانی، مالی تے ہر طرح دیاں قربانیاں وی دیندے چلے آ رہے نیں۔ پاکستان دی کشمیریاں دے نال اک کمٹ مٹ اے تے پاکستان ہر حال وچ اینوں پورا کرن دی راہ اُتے گامزن رہیا اے۔ایہہ وکھری گل اے کہ ساڈے توں کجھ کوتاہیاں وی ہوئیاں ، کجھ غلطیاں وی ہوئیاں تے کشمیر نوں بھارتی تسلط توں آزاد کروان دے کئی بہتر موقعے ضائع وی ہوئے پر ایس سب دے باوجود پاکستان دا کردار انج دا نہیں کہ جس اُتے کوئی انگلی چکی جا سکے۔ تاں کشمیر دے حوالے نال عالمی دنیا توں علاوہ مسلم امہ دا کردار انج دا نہیں رہیا کہ جس دی برادر اسلامی ملکاں توں توقع کیتی جا سکدی اے۔اسلامی ملک اپنے مفاد دے حصول دے مسئلیاں وچ اینے الجھے ہوئے نیں کہ ایہناں نوں نہ تے پاکستان جہے عالم اسلام دے طاقتور ملک دی پرواہ اے تے نہ ای کشمیری عوام دے جذبات دا کجھ پاس اے۔ اللہ تعالیٰ دے کرم نال فلسطین ، کشمیریاں اُتے کڑا ویلا وی لنگھ جائے گا پر اسلامی ملکاں دے حکمران ایس دنیا وچ تے کل آخرت وچ کیہ جواب دے سکن گے کہ اوہناں نے اپنے جسم دی مانند مسلمان بھراواں اُتے توڑے جان والے مظالم توں اکھاں چرائے رکھیاں سن۔
عالم اسلام، عالمی دنیا دے نال مل کے جنا مرضی بے حسی دا مظاہرہ کرے، پر اک دن ایہناں نوں اپنے مفادات دے حصار توں باہر نکل کے مظلوم کشمیریاں دی اواز نوں اہمیت دینی پئے گی۔ وزیراعظم عمران خان دے موقف نوں تسلیم کردے ہوئے بھارتی سرکار دے خلاف بھارت دے اندر تے باہر توں آوازاں بلند ہونا شروع ہو گئیاں نیں۔ ایسے تناظر وچ پاکستانی حکومت نے پنج اگست نوں کشمیریاں دے نال یوم استحصال منان دا اعلان کردے ہوئے واضح پیغام دتا اے کہ تحریک آزادی لئی کشمیری لیڈ کرن، اسیں ایہناں دے پچھے کھڑے آں، ساڈی نظراں سری نگر اُتے نیں، کشمیری جھکن گے نہ پاک فوج پچھے ہٹے گی، اسیں جدوجہد آزادی وچ کشمیریاں دے نال کھڑے آں تے آخری جِت تیکر کھلوتے رہاں گے ۔پاکستانی عوام 5 اگست نوں اپنے گھراں اُتے کشمیری جھنڈے لہرا کے بھارت اُتے واضح کرن گے کہ بھارتی سرکار لکھ کوشش کر لوے، متنازع مقبوضہ کشمیر وچ اک دن آزادی دا سورج طلوع ہو کے رہوے گا۔
