کشمیریاں دا قتلِ عام کدوں رُکے گا

لکھت:اعجازعلی ساغر

اونج تے مظلوم کشمیریاں دی حیاتی شروع توں ای اجیرن اے پر پنج اگست 2019 دا دن مظلوم تے نہتے کشمیریاں نوں کدی نہیں بھلے گا ایس دن بھارت نے ظلم تے بربریت دے پہاڑ توڑدے ہوئے مقبوضہ کشمیر وچ نہتے کشمیریاں اُتے لاک ڈائون لاندے ہوئے پوری وادی نوں فوجی چھائونی وچ بدل دتا تے باوردی بھارتی دہشت گرداں نے ہٹلر مودی دے کہن اُتے معصوم تے مظلوم کشمیریاں اُتے ظلم دے پہاڑ توڑ دتے ایہناں دی حیاتی اجیرن بنا دتی گئی زنانیاں دی وڈے پیمانے اُتے عزت لُٹی گئی۔ بیرونی دنیا دا رابطہ بالکل ختم کر دتا گیا بھارت ناجائز طور تے ایس وادی اُتے قابض ہو چکیا سی تے ایس دے باوردی دہشت گرد ظلم و ستم دے پہاڑ توڑدے ہوئے آزادی دی ایس تحریک نوں کچلن دی کوششاں وچ مصروف سن پر مظلوم تے نہتے کشمیری اینے ظلم و ستم سہن دے باوجود آزادی دی ایس تحریک توں اک پیر وی پچھے نہیں ہٹے ۔ کشمیریاں دی حمایت وچ پاکستان روز اول توں ای اواز چک رہیا اے جس لئی بھارت نال دو وڈی جنگاں وی لڑ چکیا اے تے ہجے تیکر لائن آف کنٹرول اُتے پاکستانی فوج دے بھاری دستے تعینات نیں جیہڑا بھارتی دراندازی روکن لئی ہر ویلے چاک و چوبند کھڑے نیں۔مسئلہ کشمیر اُتے ہر پاکستانی قیادت نے اپنا اپنا حصہ پایا پر جس طرح اقوام متحدہ دی جنرل اسمبلی وچ وزیراعظم پاکستان عمران خان نے کشمیر ایشو نوں اجاگر کیتا انج شاید ای کسے نے کیتا ہوئے عمران خان نے آپ نوں مظلوم کشمیریاں دا سفیر کہیا تے ایس گل دا اعادہ کیتا کہ جدوں تیکر کشمیر آزاد نہیں ہوتا اوہ کشمیر دی جنگ ہر محاذ اُتے لڑدے رہن گے۔عمران خان دی جنرل اسمبلی وچ کیتی گئی متاثر کن تقریر تے شاہ محمود قریشی دی موثر سفارت کاری نے پاکستان دا کیس کشمیر دے حوالے نال کیس مضبوط کر دتا ایہہ بہترین سفارتکاری ای سی کہ امریکی صدر نے دو وار مسئلہ کشمیر اُتے ثالثی دی پیشکش کیتی جنہوں بھارت نے ہٹ دھرمی دی وجہ نال مسترد کر دتا ۔ عمران خان نے عالمی ضمیر جھنجھوڑدے ہوئے کہیا سی کہ اقوام متحدہ اپنی ای قرار داداں اُتے عملدرآمد کرواندے ہوئے مسئلا کشمیر حل کرن وچ اپنا کردار ادا کرے۔اقوام متحدہ دے سیکرٹری جنرل انتونیو گوٹریس جدوں پاکستان تشریف لیائے تے اعلیٰ قیادت نے مسئلہ کشمیر حل کران لئی ایہناں اُتے زور دتا اوہناں نے وی بھارت نوں واضح پیغام دتا کہ مقبوضہ کشمیر وچ اپنی جارحیت ختم کرے تے دو طرفہ باہمی تعاون نال ایہہ مسئلہ حل کرے۔تاریخ وچ پہلی وار انج ہویا اے کہ 54 ورہے بعد اقوام متحدہ دی جنرل اسمبلی وچ مسئلا کشمیر نوں چکیا گیا ایس اُتے بحث کیتی گئی۔ امریکہ دے اندر توں مظلوم کشمیریاں لئی اوازاں اٹھن لگیاں کئی امریکن سینیٹرز نے بھارتی جارحیت نوں آڑے ہتھاں لیندے ہوئے فی الفور مقبوضہ وادی توں فوج ہٹان دا مطالبہ کیتا۔ کرونا وائرس دے دوران کجھ مہینے دے لاک ڈائون نے عالمی برادری دے ہوش اڑا دتے دنیا دے سپر پاور ملک امریکا نے ایس وائرس دے ساہمنے ہتھیارپا دتے تے ایس موقعے اُتے عالمی میڈیا نوں خیال آیا کہ ایتھے کجھ دناں دے لاک ڈائون نے حشر نشر کر دتا اے تے مظلوم کشمیری کئی مہینے توں پابند سلاسل نیں جتھے ایہناں اُتے زندگی تنگ کر دتی گئی اے۔ایس مقبوضہ وادی دا بیرونی دنیا نال رابطہ منقطع اے عالمی میڈیا دی طرفوں مسئلا کشمیر نوں بھرپور کوریج دتی گئی اے جس دی وجہ نال ہن آپ بھارت دے اندر توں ایس جبری لاک ڈائو ن دی مذمت کیتی جا رہی اے۔ بھارت دے مقبوضہ وادی وچ غاصبانہ قبضے نوں اک ورہا مکمل ہو گیا اے پاکستان دی طرفوں پنج اگست نوں یوم استحصال دے طور تے منایا جا رہیا اے کشمیر ہائی دا ناں تبدیل کر دتا گیا اے تے ایس دا نواں ناں سری نگر ہائی وے رکھیا گیا اے۔ وزیر خارجہ شاہ محمود قریشی دا کہنا اے کہ کشمیر دی آزادی نیڑے اے انشاء اللہ شکرانے دے نوافل اسیں کشمیری بھراواں دے نال سری نگر دی جامع مسجد وچ ادا کرن گے۔ایس موقعے اُتے پاکستان پوسٹ دی طرفوں 5 اگست دے حوالے نال یادگاری ٹکٹ وی جاری کیتا گیا اے جیہڑا پوری دنیا لئی اک سیمبولک میسج اے۔ آئی ایس پی آر دی طرفوں اک نغمہ جاری کیتا گیا اے جس وچ مقبوضہ وادی وچ مظلوم تے نہتے کشمیریاں اُتے ہون والے مظالم د ی عکسبندی کیتی گئی اے تے اینوں تشبیہ پیش کیتا گیا الغرض پوری پاکستانی قوم اپنے کشمیری بھراواں دے شانہ بشانہ کھلوتی اے تے مظلوم کشمیریاں دے ہم آواز ہو کے اقوام عالم نال ایہو مطالبہ کیتا جا رہیا اے کہ مسئلا کشمیر دا فی الفور حل کڈیا جائے تے اینوں وردی والے بھارتی دہشت گرداں توں نجات دلوائی جائے۔ اقوام متحدہ دے سیکرٹری تے امریکی صدر ڈونلڈ ٹرمپ سنے عالمی برادری نال درخواست اے کہ مقبوضہ وادی دے موجودہ حالات پوری دنیا دے ٹی وی چینلز اُتے لائیو وکھائے جان تے بھارت دا مکروہ چہرہ پوری دنیا وچ وکھایا جائے ایس توں بعد اقوام عالم آپ فیصلا کر لوے کہ کیہ ایہناں مظلوماں دی آزادی دی جدوجہد ٹھیک اے یا غلط ایہہ فیصلہ پوری دنیا دے منصفاں اُتے چھڈ دین گے پاکستان انشاء اللہ ایس ویلے تیکر اپنے مظلوم کشمیری بھراواں تے بھیناں دے نال کھڑا اے جدوں تیکر ایہناں نوں بھارتی درندیاں توں آزادی نہیں مل جاندی ہر پاکستانی ہر طرح نال اپنے ایہناں مظلوم بھراواں دے نال اے ہن اقوام عالم نوں فیصلہ کرنا اے کہ ایہہ قتل و غارت تے زنانیاں دی عزت ایہناں بھارتی درندیاں دے ہتھوں کدوں تیکر ہوندی رہوے گی آخر کدوں دنیا دا ضمیر جاگے گا آخر کدو؟؟؟