سندھ سرکار دی نکامی دے نتائج بہت خطرناک ہون گے: چیف جسٹس

کراچی(بھلیکھا ٹی وی )چیف جسٹس گلزار احمد دا کہنا اے پچھلے 20ورھیاں وچ کراچی وچ کجھ نہیں کیتا گیا، سندھ سرکار کم کر رہی اے نہ ای لوکل باڈی جد کہ سرکار دی نکامی دے نتائج بہت خطرناک ہون گے۔ سپریم کورٹ کراچی رجسٹری وچ چیف جسٹس گلزار احمد دی سربراہی وچ 3رکنی بنچ نے حاجی کیمو گوٹھ تجاوزات بارے کیس تے سنوائی کیتی۔ کمشنر کراچی نے شہر بارے رپورٹ سپریم کورٹ وچ پیش کر دتی جہدے تے عدالت نے عدم اطمینان دا اظہار کیتا تے سندھ سرکار تے لوکل گورنمنٹ تے برہمی دا اظہار کردیاں آکھیا صوبائی حکومت شہریاں دے بنیادی حقوق فراہم کرن وچ نکام ہوئی، سرکار دی نکامی دے نتائج بہت خطرناک ہون گے، پچھلے 20ورھیاں وچ کراچی وچ کجھ نہیں کیتا گیا، سندھ سرکار کم کر رہی اے نہ ای لوکل باڈی۔ چیف جسٹس پاکستان نے ریمارکس دتے صوبائی حکومت لوکاں نوں ایس حال وچ ویکھ کے انجوائے کر رہی اے، کدھرے قنون دی عمل داری نظر نہیں آ رہی اے، پبلک پرائیویٹ پارٹنر شپ تے سڑک بنا دیندے نیں، ہر گلی مچھر، مکھیاں نال بھری پئی اے، لوک پتھر پا کے چل رہے نیں، پورے شہر وچ گٹر دا پانی بھریا اے، پورا کراچی ہن گوٹھ بن گیا اے۔