جہڑی کمپنی نے کے الیکٹرک نوں خریدیا اے اوہدی جانچ پڑتال کیتی جائے: چیف جسٹس

کراچی: چیف جسٹس پاکستان جسٹس گلزار احمد نے ریمارکس دتے نیں جہڑے کمپنی نے کے الیکٹرک نوں خریدیا اے اوہدی جانچ پڑتال کیتی جائے۔ سپریم کورٹ کراچی رجسٹری وچ چیف جسٹس پاکستان جسٹس گلزار احمد دی سربراہی وچ 3رکنی بنچ نے شہر وچ غیر اعلانیہ لوڈشیڈنگ تے کرنٹ لگن نال ہلاکتاں بارے کیس دی سماعت کیتی۔ دوران سماعت کے الیکٹرک نے عدالتی حکم تے رپورٹ پیش کر دتی۔ چیف جسٹس گلزار احمد نے رپورٹ تے عدم اعتماد دا اظہار کر دتا۔ چیئرمین نیپرا نے وی مقدمیاں دا ریکارڈ پیش کر دتا، چیئرمین نیپرا نے دسیا کے الیکٹرک نے ہر شوکاز تے کیس تے حکم امتناع لے رکھیا اے۔ چیف جسٹس نے ریمارکس دتے عدالتی آرڈر دے بعد ادھے شہر وچ بجلی بند کر دتی گئی ، ایہ کون نیں بجلی بند کرن والے، اسیں ایہناں نوں چھڈاں گے نہیں ، لوک کرنٹ لگن نال مر رہے نیں تے ایہ 50,50ہزار دی ضمانت حاصل کر لیندے نیں۔ عدالتی معاون فیصل صدیقی آکھیا جے کے الیکٹرک نوں 20کروڑ جرمانہ کیتا جائے تے دوجی وار شکایت نہ ہووے، اوہناں نوں 50لکھ جرمانہ کیتا جاندا اے جہڑا ایہ کجھ دن وچ کما لیندے نیں۔

اپنا تبصرہ گھلو