دھمکیاں دتی جا رہیاں نیں کہ میں وی لائن تے آ جاواں: بلاول بھٹو زرداری
اسلام آباد(بھلیکھا ٹی وی ) پاکستان پیپلزپارٹی دے چیئرمین بلاول زرداری آکھیا اے پورا خاندان گرفتار کر لوو پر 18ویں ترمیم تے آنچ نہیں آن دیواں گے۔ بلاول نے آصف زرداری دی پیشی دے بعد احتساب عدالت دے باہر میڈیا نال گل کردیاں آکھیا مینوں دھمکان لئی زرداری نوں بار بار پیش تے بلایا جا رہیا اے، ساڈے خاندان دے نال نفسیاتی کھیڈ کھیڈیا جا رہیا اے، میرے کارکناں نوں نشانہ بنایا جا رہیا اے پر میں ڈرن تے جھکن والا نہیں آں۔ بلاول آکھیا تسیں جو کرنا اے کر لو بھاویں میرے پورے خاندان نوں گرفتار کرلو ، پر جمہوریت، انسانی حقوق، 18ویں ترمیم، آئین تے این ایف سی ایوارڈ تے اک آنچ وی نہیں آن دیواں گے، بنی گالہ وچ بیٹھے کٹھ پتلی وزیراعظم دی ڈور کدھرے ہور توں ہلدی ا ے، ایہ جعلی تے کٹھ پتلی سرکار نہیں چل سکدی۔بلاول دا کہنا سی اک جج کورونا دی وجہ توں آصف زرداری نوں ویڈیو لنک تے پیشی دی اجازت دیندا اے تے دوجا جج زبردستی عدالت وچ پیش کراندا اے، اج ایہ ساڈے نال ہو رہیا اے کل کسے ہور دے نال وی ہو سکدا اے۔





















