سندھ وچ 15ستمبر توں پہلاں تعلیمی اداریاں وچ اقدامات مکمل کرن دی ہدایت
کراچی(بھلیکھا ٹی وی )وزیر تعلیم سندھ سعید غنی نے متعلقہ حکام نوں ہدایت کیتی اے ستمبر توں پہلاں سارے تعلیمی اداریاں وچ سپرے سنے سارے اقدامات نوں مکمل کر لیا جائے۔ وزیر تعلیم سندھ سعید غنی دی زیر صدارت محکمہ تعلیم دا اجلاس ہویا جہدے وچ سیکرٹری تعلیم احمد بخش،سیکرٹری کالجز باقر نقوی ،ایڈیشنل سیکرٹری تعلیم ڈاکٹر فوزیہ، آصف میمن تے دوجیاں نے رلت کیتی۔ اجلاس وچ صوبے بھر وچ تعلیمی نصاب، کورونا وائرس دے بعد دی صورتحال تے نویں تعلیمی سال سنے دوجے امور دا جائزہ لیا گیا۔ اجلاس دے دوران سعید غنی آکھیا تعلیمی اداریاں نوں 15ستمبر نوں کھولن دا حتمی فیصلہ ایس سی او سی دے اجلاس وچ ہووے گا، سانوں اپنی پوری تیاری 15ستمبر نوں تعلیمی ادارے کھولن تے مرکوز کرنی ہووے گی۔ اسیں چاہنے آں 7ستمبر نوں وفاقی وزیر تعلیم تے سارے صوبائی وزراء تعلیم دا اجلاس ہووے تے ساڈے کول سارے حوالے نال تیاریاں مکمل ہون، ساڈی پوری کوشش اے طلبہ و طالبات دا کورونا وائرس دی وجہ توں جہڑے تعلیمی عمل تعطل دا شکار ہویا تے ایہدے پاروں جہڑا خلاء ایہناں دی تعلیم وچ آیا اے ایہنوں پورا کیتا جائے۔
