منی لانڈرنگ کیس: شہباز شریف، حمزہ سنے 20ملزماں دے خلاف ریفرنس دائر
لہور(بھلیکھا ٹی وی ) قومی احتساب بیورو نے اپوزیشن لیڈر تے اوہناں دی فیملی تے احتساب عدالت وچ ریفرنس دائر کردتا۔ ریفرنس وچ شہباز شریف دی بیوی تے چاراں بالاں سنے 20ملزماں نوں نامزد کیتا گیا اے۔ نیب نے شہباز شریف تے اوہناں دے اہل خانہ دے خلاف لہور دی احتساب عدالت دے رجسٹرار نوں ریفرنس جمع کرایا۔ ریفرنس وچ الزام لایا گیا کہ شہباز شریف خاندان نے 7ارب 32کروڑ روپے دی منی لانڈرنگ کیتی۔ ایسے ریفرنس وچ مشتاق چینی، فضل داد، قسم قیوم تے آفتاب گرفتار نیں جد کہ حمزہ شہباز جوڈیشل ریمانڈ تے جیل وچ نیں۔ شہباز شریف لہور ہائی کورٹ توں عبوری ضمانت لے چکے نیں تے سلمان شہباز اشتہاری قرار دتے جا چکے۔ قومی احتساب بیورو نے شہباز شریف، حمزہ شہباز تے سلمان شہباز نوں مرکزی ملزم نامزد کیتا اے جد کہ شہباز شریف دی بیوی نصرت شہباز تے دوواں دھیاں رابعہ عمران تے جویریہ علی نوں وی ملزم نامزد کیتا۔ شہباز شریف فیملی دے خلاف منی لانڈرنگ ریفرنس وچ یاسر مشتاق، محمد مشتاق، شاہد رفیق تے آفتاب احمد وعدہ معاف گواہ بن گئے نیں۔





















