پیلاک ولوں جشن آزادی دے حوالے نال ملی نغمیاں دا پروگرام
رپورٹ:علی قیصر شاہ
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت، پنجاب دے زیر اہتمام جشنِ آزادی دے حوالے نال ملی نغمیاں دا پروگرام ’’ایہہ دیس میرا اے کرماں والا‘‘ منعقد کیتا گیا۔ جس وچ نوجوان گلوکاراں دے نال معروف لوک گلوکار عارف لوہار نے اپنے فن دا بھرپور مظاہرہ کیتا۔ دیگر گلوکاراں وچ ایہناں دے پتر علی لوہار، عامر لوہار، عالم لوہار دے علاوہ عقیل طاہر، روحیل وقاص، محسن
علی بری، جہانزیب تے ہما عمران نے وی ملی نغمے پیش کیتے۔
ایس خوبصورت تقریب وچ پٹیالہ گھرانے دے نوجوان گلوکار سلیمان امجد امانت علی خان تے علی امجد امانت علی خان دے گائے ہوئے ملی نغمے ’’وطن کی مٹی درود تجھ پر‘‘ دا افتتاح کیتا گیا جس دے شاعر ڈاکٹر جواز جعفری نیں۔ عارف لوہار نے ڈاکٹر صغرا صدف دی ایس کاوش نوں بے حد سراہیا تے کہیا کہ ایس دے آن نال پلاک دیاں رونقاں فیر بحال ہو گئیاں نیں۔
ڈی جی پلاک ڈاکٹر صغرا صدف نے گل بات کردے ہوئے کہیا کہ ایس طرح دے پروگرام کرن دا مقصد نویں ٹیلنٹ نوں سامنے لیانا تے نوجوان نسل وچ حب الوطنی دا جذبہ پیدا کرنا اے کیوں جے آئندہ ساڈے ملک دی نس بھج ایہناں دے ہتھاں وچ ہوئے گی؎ ایس لئی ایہناں نوں نال لے کے چلنا ساڈی ذمے داری اے۔ ڈائریکٹر پلاک محمد عاصم چودھری نے کہیا کہ جشن آزادی دے نال نال شہدائے آزادی دیاں قربانیاں نوں وی یاد رکھنا چاہیدا اے جنہاں دے لہو نے ایس دھرتی نوں حیات نو بخشی تے اج اسیں مکمل آزادی دے نال اپنی زندگیاں لنگھا رہے آں۔
