شراب لائسنس معاملہ، عثمان بزدار دی نااہلی لئی الیکشن کمیشن وچ عرضی دائر
لہور: شراب دی فروخت دے لائسنس دے اجراء معاملے تے وزیراعلیٰ پنجاب عثمان بزدار دی نااہلی لئی الیکشن کمیشن وچ عرضی دائر کیتی گئی اے۔
بیرسٹر سعید احمد ظفر نے الیکشن کمیشن لہور آفس وچ عرضی دائر کیتی اے جہدے وچ وزیراعلیٰ پنجاب عثمان بزدار نوں آئین دے آرٹیکل 62تے 63دے تحت نااہل قرار دین دی اپیل کیتی گئی اے۔
عرضی وچ موقف اختیار کیتا گیا عثمان بزدار نے پنجاب اسمبلی دے حلقہ پی پی 286توں انتخابات وچ حصہ لے کے کامیابی حاصل کیتی، کامیابی دے بعد عثمان بزدار وزیراعلیٰ پنجاب بنے۔ وزیر اعلیٰ عثمان بزدار تے مبینہ طور تے پنج کروڑ روپے لے کے لہور دے اک ہوٹل نوں شراب دی فروخت دا لائسنس جاری کران دا الزام اے، اوہناں دے خلاف نیب تحقیقات جاری نیں، اوہ ایس معاملے تے 12اگست نوں نیب آفس پیش وی ہوئے نیں جد کہ نیب تحقیقات دے دوران 2افسران بطور وعدہ معاف گواہ وی ساہمنے آ چکے نیں۔
درخواست وچ اپیل کیتی گئی اے وزیراعلیٰ عثمان بزدار نے شراب لائسنس دے اجراء بارے غلط بیانی کیتی، ایس لئی اوہ صادق تے امین نہیں رہے۔





















