پنجاب دے تعلیمی اداریاں لئی ایس او پیز جاری
لہور: محکمہ پرائمری اینڈ سکینڈری ہیلتھ کیئر پنجاب نے صوبے دے تعلیمی اداریاں دے حوالے نال ایس او پیز دا نوٹیفکیشن جاری کر دتا۔
پرائمری اینڈ سکینڈری ہیلتھ کیئر پنجاب ولوں جاری ایس او پیز وچ آکھیا گیا اے مارننگ اسمبلی، اِن ڈور گیمز، جھولیاں، سلائیڈز، کھیڈاں دی سرگرمیاں، سیمینارز، تقریری مقابلیاں، کھیڈاں دے مقابلیاں تے ٹورنامنٹس منعقد کران تے پابندی ہووے گی۔ نوٹیفکیشن دے مطابق ماسک پانا لازمی ہووے گا۔
سکول بساں وچ کل گنجائش دا 50فیصد استعمال کرنا ہووے گا تے ہاسٹلزدی سہولت لئی صرف 30فیصد گنجائش استعمال کیتی جائے گی جد کہ طلباء و طالبات نوں صابن تے ہینڈ سینی ٹائزر دی فراہمی یقینی بنانی ہووے گی۔
ایہدے توں علاوہ ساہ دی تکلیف وچ مبتلا طالب علماں تے سٹاف نوں گھراں تک محدود رکھیا جائے گا۔نوٹیفکیشن وچ ایہ ہدایت وی کیتی گئی اے تعلیمی سرگرمیاں شروع کرن توں 3دن پہلاں تعلیمی اداریاں دی جامع صفائی تے ڈس انفیکٹ کیتا جائے، تعلیمی اداریاں نوں روزانہ دی بنیاد تے وی ڈس انفیکٹ کیتا جائے، 6فٹ دا سماجی فاصلہ لازمی رکھیا جائے۔





















