دیس وچ مافیا کم کر رہی اے جہدی وجہ توں مہنگائی ہوئی: غلام سرور

ٹیکسلا: وفاقی وزیر برائے ہوا بازی غلام سرور خان دا کہنا اے دیس وچ مافیا کم کر رہی اے جہدی وجہ توں مہنگائی ہوئی اے۔

ٹیکسلا وچ قائم لیبر کمپلیکس دے 504فلیٹس دے ترقیاتی کم دا جائزہ لین دے بعد میڈیا نال گل کردیاں غلام سرور آکھیا 35ورھیاں توں دیس نوں لٹن والیاں دا احتساب ہونا چاہیدا اے۔

ایناں ظلم ہلاکو خان تے چنگیز خان نے نہیں کیتا جناں دو جماعتاں نے دیس دے نال کیتا۔اوہناں آکھیا سرکار نے دو سال انتہائی مشکل نال گزارے نیں، پچھلی سرکار جاندیاں ہوئیاں دیس نوں دیوالیہ کر گئی، قوم لئی اج وی چور ڈاکو ہیرو تے ہمدردیاں اوہناں دے نال نیں، سب دا احتساب ہونا چاہیدا اے دیس وچ مافیا کم کر رہی اے جہدی وجہ توں مہنگائی آئی اے۔ وفاقی وزیر دا کہنا سی مہنگائی، چینی تے کنک دے بحران وچ کاروباری مافیا دا اہم کردار اے، سندھ وچ چینی دی سمگلنگ تے ذخیرہ اندوزی کیتی جاندی اے۔

غلام سرور نے دسیا کہ 760جعلی ڈگری والے ملازماں نوں فارغ کر چکے آں جہدے وچ 28پائلٹس دے لائسنس منسوخ کرکے کڈھ چکے آں۔

اپنا تبصرہ گھلو