نوازشریف دی واپسی لئی سارے قنونی ذرائع استعمال کیتے جان: وزیراعظم
اسلام آباد: وزیراعظم عمران خان آکھیا اے نوازشریف دی واپسی لئی سارے قنونی ذرائع استعمال وچ لیائے جان۔
وزیراعظم دی زیر صدارت پارلیمنٹ وچ حکومتی تے پارٹی ترجماناں دا اجلاس ہویا جہدے وچ موجودہ سیاسی صورتحال وچ اپوزیشن دے بیانیہ بارے حکمت عملی تے گل بات ہوئی تے پارلیمنٹ وچ قنون سازی بارے ترجماناںنوں بریفنگ دتی گئی جد کہ نوازشریف نوں وطن واپس لیان بارے اقدامات تے حکومتی حکمت عملی تے مشاورت کیتی گئی۔
ایس موقع تے وزیراعظم عمران خان دا کہنا سی مسلم لیگ (ن) نے نوازشریف دی صحت تے سیاست کیتی، اپوزیشن دا فوکس ملکی مفاد نہیں سگوں شریف مقدمات توں چھٹکارا حاصل کرنا اے، اپوزیشن دی بلیک میلنگ وچ نہیں آواں گے، عدالتاں نوں مطلوب بندیاں نوں واپس لیانا سرکار دی ذمہ داری اے، نوازشریف دی واپسی لئی سارے قنون ذرائع استعمال وچ لیائے جان۔
اجلاس وچ قومی اسمبلی وچ ایف اے ٹی ایف قوانین دی منظوری دے حوالے نال حکمت عملی تے تبادلہ خیال کیتا گیا۔
ترجماناں نوں ملکی معاشی صورتحال وچ بہتری نوں موثر طور تے اجاگر کرن دی ہدایت کردیاں وزیراعظم دا کہنا سی معیشت بارے فیصلیاں دے ثمرات آنا شروع ہو گئے، ہن پوری توجہ بہتر معاشی اعشاریاں دے ثمرات عوام تک اپڑان اُتے اے۔





















