شہیداں دیاں قربانیاں تعلیمی نصاب وچ شامل کیتیاں جان: میجر جنرل (ر) محمد منشاء

لکھت:علی عمران چٹھہ

تاریخ گواہ اے کہ اوہ ای فوجاں جنگ جت دیاں نیں جنہاں دی پشت اُتے قوماں متحد ہو کے کھڑی ہون اج ففتھ جنریشن وار دے ذریعے وی دشمن ملک فوجاں تے عوام وچ خلیج پیدا کرن دی کوششاں وچ اے تاں جے نظریاتی سرحداں نوں کمزور کر کے دفاع وطن وچ معروف بہادر جوواناں دے حوصلیاں نوں پست کیتا جائے پر بہادر قوماں اتحاد یگانگت نال ایس نوں ناکام بنا رہیاں نیں بلکے وطن عزیز لئی جان دین والے شہداء نوں محسن تے ہیرو سمجھدیاں نیں۔ ساڈے معاشرے وچ وی انج دے لوکاں دی کثیر تعداد موجود اے جیہڑی اپنے ہر شہید وطن نوں یاد رکھدی اے تے ایہناں دی قربانیاں نوں خراج تحسین پیش کرن لئی ایہناں دے یوم شہادت نوں ورثاء تے عوام وچ مناندی اے۔ افواج پاکستان جتھے اپنے شہداء دیاں قربانیاں نوں اجاگر کردی اے اونج ای انج دی سماجی تنظیماں ایس کم نوں بڑھاوا دیندیاں نیں۔ ایس قسم دی اک تنظیم نشان حیدر دفاع کونسل وی اے جیہڑی وطن عزیز دے ہر شہید دے یوم شہادت پر وقار طریقے نال مناندی اے۔جنگ ستمبر 1965ء دے ہیروز نوں خراج تحسین پیش کرن لئی وی خاص پربندھ کیتا جانا اے ایسے ضمن وچ نشان حیدر پان والے مجاہدین لئی شایان شان تقریب دے انتظامات دے سلسلے وچ جاری اک اجلاس وچ روزانہ بھلیکھا نوں وی مدعو کیتا گیا اجلاس وچ چیئر مین نشان حیدر دفاع کونسل ایڈووکیٹ سپریم کورٹ گل خان نے ویڈیو لنک دے ذریعے روزانہ بھلیکھا نال گل بات کردے ہوئے کہیا کہ ساڈا وطن تے ساڈی فوج ہر پاکستانی شہری دی عزت تے وقار دی علامت اے۔ اسیں دفاع وطن لئی لڑن والے پاک فوجاں دے شہداء دے ویثرن دے امین آں۔

اجلاس دے دوران روزانہ بھلیکھا دے نال اُچیچی گل بات کردیاں نشان حیدر دفاع کونسل دے سینئر وائس چیئر مین تے سابق جنرل آفیسر کمانڈنٹ کراچی میجر جنرل (ر) محمد منشا ء ہوراں آکھیا کہ ساڈی تنظیم محبان پاکستان تے افواج پاکستان نال محبت رکھن والیاں دی تنظیم اے۔ اسیں قوم نوں افواج پاکستان دی دفاع تے استحکام وطن لئی بے مثال قربانیاں توں روشناس کروانے آںبالخصوص نویں نسل نوں وطن نال لازوال محبت تے فوج نال پیار داد رس دینے آں۔ اس ضمن وچ بوہت جلدی شہداء دی لازوال تے بے مثال قربانیاں دے اُتے کتابچے وی چھاپن دا پروگرام اے جیہڑے تعلیمی اداریاں وچ مفت تقسیم کیتے جان گے۔ اسیں شہداء وطن دی شہادت دی داستاناں لوکائی تیکر اپڑان واسطے حکومت پاکستان توں مطالبہ کرنے آں کہ پرائمری توں لے کے ڈگری کلاسز تیکر شہداء وطن دی قربانیاں تعلیمی نصاب دا حصہ بنائیاں جان تاں جے لوکائی اپنے قومی ہیروز دی زندگی دے ہر پہلونوں جان سکن اوہ فوجاں کدی جنگاں دیاں فاتح نہیں ہو سکدیاں جنہاں دی پشت تے عوام دا اعتماد تے محبت تے تعاون نہ ہوئے۔ ساڈا بدترین دشمن ہندوستان صیہونی طاقتاں نال مل کے ساڈی عوام نوں اپنی فوج توں متنفر کرن دی گھناونی سازش وچ مصروف اے تاکے وطن عزیز نوں عدم استحکام دا شکار کیتا جا سکے تے اقوام عالم دی توجہ مقبوضہ کشمیر تے بھارتی مسلماناں تے آر ایس ایس ،شیو سیناتے مودی سرکار دے ظلم و ستم توں ہٹائی جا سکے پر اودھا اے خواب کدی شرمندہ تعبیر نہیں ہو سکدا کیوں جے پاکستان دی فوج تے عوام اک دوجے نال بھروسے تے محبت دے اٹوٹ رشتیاں وچ بنھے نیں تے نشان حیدر دفاع کونسل دے سینئر وائس چیئر مین میجر جنرل (ر) محمد منشاء ہوراں آکھیا کہ 65,71 دے شہداء نے بہادری تے جرات دی جیہڑی تاریخ اپنے لہو نال رقم کیتی سی اج ساڈے جواناں تے افسراں نے وطن دی مٹی دی لازوال محبت وچ اپنے خون دے نذرانے دے کے جاری رکھی اے بلکے اپنی دلیرانہ شہادت دے کئی نویں باب رقم کیتے نیں اج اسیں ایہناں قربانیاں دی وجہ توں دہشت گردی دے خلاف جنگ جت چکے آں۔ عوام الناس نوں چاہیدا اے کہ اوہ دشمن دی مکروہ چالاں وچ نہ آون تے اپنی فوج دے نال قدم نال قدم ملا کے ملکی دفاع لئی ہر دم تیار رہن ایس موقعے تے نشان حیدر دفاع کونسل دے سیکرٹری جنرل سابق وفاقی سیکرٹری صاحبزادہ طارق قریشی ہوراں آکھیا کہ پاکستان دی خاطر اپنی جاناں دا نذرانہ پیش کرن والے بہادر سپوت قوم دتے متھے دا جھومر تے سر دا تاج نیں تےاوہناں دے خانداناں دے نال ساڈا روحانی رشتہ اے ساڈی تنظیم نشان حیدر پان والے افسراں دے جواناں دے نال نال مادر وطن دی خاطر جان دین والے ہر سول تے فوجی دی شہادت دا دیہاڑ مناندی اے اسیں شہداء واسطے فاتحہ تے قرآن خوانی کرنے آں تے اوہناں دے اہل خانہ نال مل کے اوہناں نوں خراج تحسین پیش کرنے آں تاں جے کہ لوکائی شہداء دے احساناں نوں جان سکے۔

ساڈا اولین تے آخری مقصد مادر وطن دے خلاف ہر قسم دی دہشت گردی دا دفاع اے تے وطن دے شہداء دی عظمت نوں سلام پیش کرنا اے۔ ایس موقعے تے گل بات کردیاں ہوئیاں مرکزی سیکرٹری اطلاعات کاشف بلوچ ہوراں آکھیا کہ ساڈی تنظیم وچ کارگل دے ہیرو کیپٹن کرنل شیر خان شہید نشان حیدر دے بھائی انور خان تے کارگل جنگ وچ دشمن دے دند کھٹے کرن والے حوالدار لالک جان تے بیٹے طارق لالک جان وی شامل نیں۔ ساڈی تنظیم ملک دے طول و عرض وچ پھیلی اے چاراں صوبیاں سنے گلگت، آزاد کشمیر تے شمالی علاقیاں وچ شہدا دے ورثاء تے عوام دی وڈی تعداد ساڈے نال اے۔

روزانہ بھلیکھا نال ایس موقعے تے گل بات کردیاں ہوئیاں نشان حیدر دفاع کونسل پنجاب دے چیئر مین رانا منذر خان نے کہیا کہ نشان حیدر دفاع کونسل دے اراکین جنگ ستمبر 1965 دے شہداء نوں خراج تحسین پیش کرن واسطے 6 ستمبر نوں شہداء دے مزاراں تے حاضری دین گے قوم ولوں پھل چڑھاون گے فاتحہ خوانی وی کرن گے بعدازاں سینئر وائس چیئر مین میجر جنرل (ر) محمد منشاء تے سیکرٹری جنرل صاحبزادہ طارق قریشی دی سربراہی وچ شہداء دی فیملیز نوں ملن لئی جان گے۔ ایس موقعے تے کشمیر دے استصواب رائے واسطے قرارداداں منظور کیتیاں گئیاں تے مودی سرکار ظلم و جبر دے خلاف اقوام متحدہ توں نوٹس لین دی اپیل وی کیتی۔ ایس موقعے تے ملک دی سلامتی تے استحکام واسطے ہر قربانی دین دا عزم دہرایا گیا تے پاکستان دی سالمیت واسطے دعا کیتی گئی۔