آر پی او گوجرانوالہ نال اک خاص ’بیٹھک‘‘

لكهت:عتیق انور راجہ

مسائل نوں گھٹ کرن لئی جتھے حکومتاں اپنا کردار ادا کردیاں نیں۔ بوہت سارے منصوبے بنائے جاندے نیں۔ اوتھے سول سوسائٹی وی حکومت دے نال تعاون کر کے اپنے لئے بہتر ماحول بنان دی کوشش کردی اے جدوں وی اسیں کسے توں یورپ دی خوبصورتی دے قصے سندے نیں تے اک گل ہر کدھرے سنی جاندی اے کہ اوتھے صفائی دا انتظام انتہائی اعلیٰ درجے دا ہوندا اے۔ سڑکاں صاف ستھری ہوندی اے گھراں دے باہر خوبصورت پودے تے پھول اکھاں نوں تازگی تے خوشی فراہم کردے۔یقینا انج ای ہوندا ہوئے گا ایسے لئی تے ایتھوں سارے اڑ کے اوتھے اپڑ جانا چاہندے نیں پر اپنے ملک نوں پیرس بنان دا دعوی کردے ہوئے اسیں ایہنوں کجھ وی نہیں بنا پا رہے آں۔ کہندے نیںکسے ملک دیاں سڑکاں تے پارک ایس ملک دا اصل چہرہ وکھا دیندے نیں۔ سڑکاں اُتے ٹریفک دی روانی تے پارکاں وچ خوبصورت قدرتی مناظر اوتھے دے لوکاں دے باشعور ہون دا پتہ دیندے نیں۔ ساڈی سیاسی قیادت توں لے کے اشرافیہ تیکر تے اک عام مزدور توں لے کے اک سائنسدان تیکر سارے ایہناں ترقی یافتہ ملکاں دی تہذیب، روایات تے خوبصورت دیاں گلاں کردے نیں۔ قانون دی عملدداری دی الف لیلوی کہانیاں سنائیاں جاندیاں نیں پر یورپ گھم کے آن والے اپنے ملک وچ پیر رکھدے ای اوہ خوبصورت معاشرتی اصول، اخلاقیاتے اقدار بھل جاندے نیں۔

پچھلے دناں آر پی او گوجرانوالہ نال کالمنگاراں دے نال اک بیٹھک وچ شرکت دا موقع ملیا۔ اونج تے ایہہ اک ماہانہ میٹنگ سی پر میں ایہنوں بیٹھک دا ناں ایس لئی دے رہیاواں کہ جویں اج توں تن چار عشرے پہلے ساڈی بیٹھکاں وچ مہماناں نوں عزت دتی جاندی سی، ایہناں دیاں گلاں نوں دھیان نال سنیا جاندا سی۔ مہماناں دے نقطہ نظر نوں قدر دی اکھ نال ویکھیا جاندا سی ایس میٹنگ ’’بیٹھک ‘‘ وچ وی بلکل اونج ای ویکھن نوں ملیا۔ ساڈی پچھلی نشست وچ آر پی او صاحب 45 منٹ تیکر آپ ای حالات و واقعات اُتے روشنی پاندے رہے تے ایس دے بعد اوہناں نے اپنی دوجی مصروفیات دی وجہ نال ساڈے توں اگلی میٹنگ تیکر لئی خدا حافظ کہنا چاہیا تے ایس اُتے میں ہلکا پھلکا احتجاج کیتا سی یقینا میری اوہ گزارش صاحب دے ذہن وچ سی ایس لئی تلاوت قرآن پاک توں بعد جناب ریاض نذیر گاڑا صاحب نے کہیا کہ ایس وار میں سناں گا تے تسیں لوک گل کرو گے۔ بلکل جی ایہہ انداز گفتگو بوہت چنگا لگیا تے میرے سنے دوجے کالمنگار شہر دے مسائل دے حوالے نال اپنی گزارشات پیش کردے رہے۔ میں عرض کیتا کہ جناب عالی! ساڈی سڑکاں اُتے بے ہنگم ٹریفک اک بوہت وڈا مسئلہ اے۔ جس تیزی نال آبادی ودھ رہی اے ایس تیزی نال اسیں نہ تے سڑکاں نوں بہتر کیتا تے نہ ای اسیں بہتر منصوبہ بندی نال عوام دے اندر ٹریفک بارے شعور پیدا کرسکے آں۔ گوجرانوالہ دا شمار پاکستان دے وڈے تے اہم شہراں وچ ہوندا اے پر بدقسمتی دی گل اے کہ ایس شہر وچ عام شہریاں لئی کوئی پبلک ٹرانسپورٹ سسٹم نہیں۔
گوجرانوالہ ڈویژنل ہیڈ کوارٹر اے۔ دور دراز توں لوک روز ایس شہر وچ آندے نیں پر پورے شہر وچ کدھرے کوئی بس سٹاپ، سائبان نہیں بنایا گیا جس دی سزا عوام نوں گرمی سردی تے دھپ بارش دی شکل وچ کھلے اسمان تھلے رہ کے برداشت کرنی پیندی اے۔ شہر دی سڑکاں دے کنارے کدھرے وی مسافراں لئی ٹوائلٹ نہیں بنائے گئے۔ انتظامی سطح اُتے کدھرے ایہہ پلان نہیں بنایا جا سکیا کہ کس روٹ اُتے عوام لئی کیہڑی گڈیاں چلن گیاں۔ ایہو وجہ اے کہ جدو ں جس دا دل چاہندا اے اوہ اپنی خدمات پیش کردا وکھائی دیندا اے
اج توں پندرہ ورھے پہلے پورے شہر وچ عوامی سواری دے طور اُتے ویگناں چلدیاں سن پر جدوں ایہہ چاند گاڑیاں چن توں زمین اُتے اترنا شروع ہوئیاں تے پتہ نہیں کس مفاد دے تحت شہر دیاں سڑکاں توں ویگناں دا چلنا بند کروا دتا گیا تے ایہناں دی تھاں بغیر پاسنگ بغیر روٹ پرمٹ تے بغیر ڈرائیونگ لائسنس چنگ چی رکشیاں نے سنبھال لئی۔ ایس کاروبار نے دناں وچ اینی ترقی کر لئی کہ بوہت سارے لوک ایس کاروبار دے نال جڑے چلے گئے۔ ہن صورتحال ایہہ وے کہ بوہت سارے سرمایہ داراں نے داہ داہ چاند گاڑیاں بنا کے اگے دیہاڑی اُتے لوکاں دے حوالے کیتیاں ہوئیاں نیں۔ شہر وچ ہر دن ہون والے ٹریفک حادثے زیادہ تر ایہناں رکشیاں دی وجہ نال ای ہوندے نیں۔پولیس ہر دن ایہناں نوں پھڑدی اے چالان کٹے جاندے نیں پر پورے شہر وچ ایہہ رکشے چلدے رہے نیں کیوں جے شہر وچ ایس ویلے عوام لئی ایہو اک سواری دستیاب اے ایس لئی پلس سب نوں جیل نہیں گھل سکدی۔ہن انتظامیہ نوں فیصلہ کرنا اے کہ جدوں تیکر ایہہ اڑن کھٹولے ساڈا مقدر نیں تے مہربانی کر کے ایہناں نوں کسے منصوبہ بندی دے تحت چلائو۔ ایہناں نوں باقاعدہ روٹ الاٹ کیتے جان ۔ ایہناں دی پاسنگ ہوئے ایہناں لئی اڈے بنائے جان۔ ایس ویلے پورے شہر دیاں سڑکاں اُتے چنگ چی رکشیاں دا قضہ وکھائی دیندا اے جدوں ایہہ غیر قانونی طریقے نال سڑکاں اُتے قابض نظر آن گے تے فیر لوک تے کہن گے کہ کوئی نہ کوئی تے ایہناں توں منتھلیاں لے رہیااے۔ایہہ اک بوہت حساس مسئلہ اے ایس ول توجہ دین دی لوڑ اے۔ اسیں وی ایہہ عرض کیتا کہ شہر وچ عارضی ریڑھی بازار قائم کیتے جان فیر سڑک کنارے کھڑے ریڑھی والیاں نوں ایدھے دھکیل کے سڑکاں اُتے ٹریفک دے بہائو نوں بہتر کرن دی کوشش کیتی جائے ۔ چنگ چی رکشیاں نوں بند نہیں کیتا جا سکدا تے ایہناں نوں کسے قانون دا پابند ضرور کیتا جانا چاہیدا اے تے نال نال پرائیویٹ سیکٹر دے اشتراک نال شہریاں لئی مناسب آرام دہ پبلک ٹرانسپورٹ سسٹم دے شروع کرن دا وی سوچیا جائے۔
آر پی او جناب ریاض نذیر گاڑا صاحب نے سانوں تجویزا ں دا خیر مقدم کیتا تے سانوں ایہہ نوید سنائی کہ اوہ بوہت جلدی کمشنر گوجرانوالہ نال مل کے ایہنا مسئلیاں نوں حل کروان لئی کوئی لائحہ عمل تیار کرن دی کوشش کردے نیں۔ ریاض نذیر گاڑا صاحب نے کہیا کہ اوہ سمجھدے نیں کہ قلم کاراں دی نظر شہر دے مسائل اُت بوہت گہری ہوندی اے ایس لئی اوہ ایہہ خیال کردے نیں کہ اصلاح معاشرے وچ کالم نگار بوہت اہم کردار ادا کر سکدے نیں۔ ہن ایہناں دی کوشش رہوے گی کہ مسائل دے حل لئی کالم نگاراں نوں نال لے کے چلن۔ گل بات دے دوران جناب ریاض نذیر گاڑا ہوراں نے کہیا کہ کرائم کنٹرول دے حوالے نال ٹیم ورک نوں ترجیح دتی جا رہی اے۔
ایس دے نال نال پولیس افسران و ملازمین دے رویاں، سوچ وچ مثبت تبدیلی تے تفتیشی افسراں دی پیشہ وارانہ مہارت تے طرز فکر وچ بہتری لیان لئی جدید اصولاں اُتے مبنی ٹریننگ دتی جا رہی اے۔ تقریباً ڈیڑھ گھنٹہ جاری رہن والی ایس بیٹھک دے دوران کالمسٹ فورم دے ممبران نے امن و امان دی صورت حال بارے بوہت سوالات کیتے جنہاں دے ریجنل پلس افسر ریاض نذیر گاڑا نے مدلل جوابات دتے۔ ہن ویکھدے آں کہ کدوں ایس شہر دے عام لوکاں دی سنی جاندی اے تے کدوں شہر وچ کوئی مناسب ٹرانسپورٹ چلن دی خوشخبری ملدی اے۔ اسیں ایس مسئلے اُتے پہلے وی لکھیا اے اگے فیر وی لکھاں گے پر صاحبو! ٹریفک مسائل دی وجہ صرف سڑکاں اُتے چلن والیاں گڈیاں نہیں۔بلکے مسائل دی وجہ شہر وچ قائم مارکیٹاں، پرائیویٹ ہسپتال تے سکول وی نیں جیہڑے کئی دہائیاں توں بغیر کسے منصوبہ بندی دے شہر دیاں سڑکاں نوں تنگ کردے چلے آ رہے نیں۔ ہونا تے ایہہ چاہیدا اے کہ جدوں کوئی نویں عمارت بنے تے پہلے ایس دی باقاعدہ اجازت لئی جائے نقشہ پس کروایا جائے جنہی وڈی مارکیٹ ہوئے، جنہا وڈا ہسپتال یا سکول ہوئے ایسے حساب نال پارکنگ دی تھاں رکھی جائے پر افسوس انج ہویا نہیں ایہہ کس دی غفلت اے ایس اُتے کنہوں قصور وار ٹھہرائیے ایہہ وی سوچن والی گل اے۔ ایس غفلت دا نقصانایہہ ہویا اے کہ شہر وچ ہن تیکر جنہاں وی مارکیٹاں، سکول یا ہسپتال قائم ہوئے نیں کسے نے وی پارکنگ بنان دا نیک کم نہیں کیتا تے ایہہ تلخ حقیقت اے کہ اج پرائیویٹ عمارت دے کول اپنی باقاعدہ پارکنگ موجود نہیں۔حال ایہہ وے کہ ایس قوم وچ ہن ہر کوئی اپنا کاروبار سڑک اُتے کرنا چاہ رہیا اے۔ منصوبہ بندی نہ ہون نال جس نوں جتھے تھاں ملدی اے اوہ اوتھے اپنی دکان کھول کے بہہ جاندا اے تے فیر ہولی ہولی سڑک تیکر اُتے مستقل قبضہ کر لیا جاندا اے۔ دوستو حقیقت وچ مسئلے اودوں ای حل ہونا شروع ہون گے جدوں انتظامیہ تے شہری مل کے اپنے اپنے حصے دا کم کرن دی کوشش کرن گے۔ جدوں سب ایہہ نقطہ سمجھ لین گے کہ ایہہ شہر ساڈا اے تے ایہنوں اسیں ای سنوارنا اے۔