عالمی یوم سیاحت دے موقعے اُتے روزنامہ بھلیکھا ، سائبان ویلفیئر سوسائٹی تے گوجرانوالہ آرٹس کونسل ولوں سیمینار
رپورٹ : علی قیصر شاہ
گوجرانوالہ آرٹس کونسل ہال وچ سائبان ویلفیئر سوسائٹی رجسٹرڈ دے زیر اہتمام سیاحت دے عالمی دن دی مناسبت نال اک سیمینار دا انعقاد کیتا گیا۔ سرپرست سائبان چوہدری طاہر جاوید نمبردار نے کہیا کہ اج جدوں ملکی حالات بوہت حد تیکر پر امن ہو چکے نیں تے بوہت ضروری اے کہ نوجواناں نوں سیاحت دی اہمیت نال روشناس کراندے ہوئے ایہناں دے ذوق دی تسکین دا ساماں مہیا کرن دی کوشش کیتی جائے۔ سعید احمد تاج سابق صدر چیمبر نے کہیا کہ دنیا دے بوہت سارے ملک سیاحت دے ذریعے نہ صرف اپنے لوکاں نوں روزگار مہیا کر رہے نیں بلکے اوہ بیرونی دنیا توں سیاحواں دی بہتر مہمانوازی نال اپنی معیشت وی مضبوط بنا رہے نیں۔ شازیہ سہیل میر نے کہیا اج کل اچانک خواتین دے نال انج دے واقعات ہون لگے نیں جیہڑے ملکی بدنامی دا باعث بن رہے نیں انج سماجی حلقیاں دی ذمے داری بن دی اے کہ اوہ ساہمنے آن تے نوجواناں نوں ادبی و ثقافتی ماحول نال وابستہ کر کے معاشرے نوں پرامن بنان وچ اپنا کردار ادا کرن ۔ ڈائریکٹر آرٹس کونسل ڈاکٹر حلیم خان نے کہیا کہ گوجرانوالہ نوں ایہہ اعزاز حاصل رہیا اے کہ ایس دھرتی نے ہر دور وچ بڑے فنکار، شاعر، ادیب تے لوک گلوکار پید اکیتے نیں۔ ایس دے علاوہ تاریخی اعتبار نال وی ایہہ شہر اپنے اندر بوہت ساری داستاناں لئے ہوئے نیں۔ ہن ایہہ ساڈی ذمے داری اے کہ دنیا نوں اپنے شہر دی ثقافت نال روشناس کرائیے تاں جے سیاح ایہنوں ویکھن لئی کھچے چلے آن۔ چوہدری اشرف مجید نے کہیا کہ اوہ شروع دن توں سائبان دیاں کوششاں دے معترف رہے نیں۔ ایہہ لوک حقیقی معنیاں وچ اپنی زبان، روایات تے ثقافت دے فروغ لئی کم کر رہے نیں۔ سید واجد علی نے دسیا کہ کرونا دے بعد ایس محفل وچ شرکت کر کے واقعی خوشی ہوئی اے تے امید اے کہ مل بیٹھن دا ایہہ سلسلہ مستقبل وچ وی چلدا رہوے گا۔ ایس باوقار تقریب دی صدارت چوہدری اشرف مجید نے کیتی جد کہ مہمانان گرامی قدر وچ سعید احمد تاج، شازیہ سہیل میر،مقصود احمد مٹو،حافظ محمد عرفان ، سید واجد علی،سہیل بشیر،چوہدری محمد انور،ساجد شاد،وحید الیاس مغل،گلزیب،اسامہ طارق،عابد سیالوی، سجاد مشتاق،رانا اظہر،سجاد سردار وڑائچ،فرحانہ عنبر،عرفانہ امر،پروفیسر نائلہ بٹ،یسین گجرتے دیگر شامل سن۔ صدر سائبان عتیق انور راجہ نے کہیا کہ سیاحت دا مطلب شمالی علاقہ جات نوں جانا ای نہیں بلکے سانوں ایہہ نقطہ سمجھ لینا چاہیدا اے کہ سیاح دنیا دی پرانی تے منفرد عمارتاں، قلعیاں تے بازاراں وچ زیادہ دلچسپی لیندے نیں۔ جے ویکھیا جائے تے ثقافتی، تاریخی ، مذہبی تے جغرافیائی طور اُتے پنجاب اپنے اندر ہر اوہ کشش رکھدا اے جیہڑا اک سیاح نوں اپنے ول کھچ لوے۔ حکومت دا کم صرف اینا اے کہ تھوڑی توجہ توں سیاحواں نوں ایس جانب راغب کرن دی کوشش کرے۔
پنجاب وچ تاریخی قلعے نیں، دریا نیں، ریگستانی سلسلے نیں، خوبصورت باغات نیں۔ پہاڑی سلسلے نیں تے پنجاب اپنے صحت بخش تے مزیدار کھابیاں دی وجہ نال پوری دنیا وچ مشہور اے۔ ایس دے علاوہ موجودہ حکومت دی طرفوں کوٹلی ستیاں، چکوال، کوہ سلیمان، اٹک، کالا باغ، خوشاب، بہاولپور تے جہلم وچ نویں سیاحتی مقامات عوام لئی کھولن دا عندیہ وی اک چنگی خبر ہوئے گا۔سکھاں دی مذہبی تے ثقافتی سیاحت خصوصاً ننکانہ صاحب ایمن آباد تے کرتار پور راہداری توں وی پنجاب دی سیاحت نوں بھرپور فروغ ملن دی امید اے۔ پنجاب دے میلے وی آباد کرن وی بوہت ضروری اے۔کیوں جے ایہناں میلیاں نوں ویکھن وی کدی سیاح پوری دنیا توں ایتھے آیا کردے سن۔ پنجاب دی ثقافت دا اک بوہت خوبصورت رنگ پنجاب بھر وچ سجن والے میلے ہویا کردے سن۔ پچھلے دور وچ ایہناں میلیاں نوں بند یا محدود کر کے عوام دیاں خوشیاں اُتے ڈاکہ پان دی کوشش کیتی اے کیوں جے ایہہ میلے وی ساڈی سیاحت نوں فروغ دین وچ اہم کردار ادا کیتا کردے سن۔ ایہناں میلیاں وچ ہون والے کھیڈ تماشیاں نوں ویکھن لئی دور دور توں لوک آیا کردے سن۔
آخر وچ سب نے ایس گل اُتے اتفاق کیتا کہ سب توں پہلے گوجرانوالہ شہر وچ موجود ثقافتی ورثے لئی آگاہی مہم شروع کیتی جائے گی تے فیر دوجے شہراں وچ دوستاں دے نال مل کے سیاحتی سفر کیتے جان گے۔
