ڈاکٹر آصف محمود جاہ! حکومت دا کرپشن دے خلاف انقلابی قدم

لكهت:آصف عنایت

ڈاکٹر آصف محمود جاہ (استاد امتیاز)، (ہلال امتیاز) فخر پاکستان دنیا وچ واحد شخصیت نیں جیہڑے کسٹم سروس وچ ہوندے ہوئے عوامی خدمات دی بدولت ملک دے اعلیٰ ترین اعزازات لئی مستحق قرار پائے حالاں کے ڈاکٹر آصف محمود جاہ چیف کلکٹر کسٹمز دی ہمہ جہت شخصیت نوں ایہہ اعزازات ملنا ایہناں اعزازات دی تکریم وچ وی وادھا دا سبب اے۔ میرے وڈے بھرا جناب معظم علی (جنت مقیم) جیل روڈ دے تاحیات چیئر مین رہے۔ فن پہلوائی، مہمان نوازی، خوش اخلاقی غریب پروری، دوست نوازی، خوبصورت سخاوت ایہناں دی نمایاں پہچان سی۔ اوہ محنت تے لگن دی اہمیت نوں پہلوانی انداز وچ دسدے ہوئے اک کہاوت بیان کیتا کردے کہ اک بندا اپنی بچھڑی نوں روزانہ موہڈھیاں اُتے چک کے اپنی حویلی دیاں پوہڑیاں چڑھدا تے اتردا سی۔ ایہہ عمل اوہ دن وچ کئی وار کردا۔ ویلا لنگھدا گیا آلے دوالے دے علاقے وچ دھوم مچ گئی کہ فلاح بندا گائے یا بھینس نوں موہڈھیاں اُتے چک کے پوہڑیاں چڑھدا تے اتر جاندا اے۔ لوک ایس دا ایہہ منظر دور دور توں ویکھن آندے جدوں لوکاں نے ایس دی خوراک تے ایس شہ زوری دا راز پچھیا تے ایس نے کہیا کہ ایہہ تے بچھڑی یا بھینس دی بچی سی میں ایس نوں پیار کردا ایہنوں موہڈیاں اُتے چک کے پوہڑھیاں چڑھدا تے اتردا سی نہ جانے ایہہ بھینس یا گائے کدوں بن گئی۔ میرا تے روز دا معمول اے۔ غالباً 1997ء نوں ڈاکٹر صاحب لہور تعینات ہوئے کسٹم ہائوس دی ڈسپنسری نوں باقاعدہ اعلیٰ درجہ دا دواخانہ بنا دتا ایس دے بعد اے ایف یو ایئر پورٹ تعینات ہوئے ایس ویلے سارے شعبے اک اے سی کسٹم دے کول سن۔ ڈاکٹر صاحب نے لوکاں نوں محبت تے شفقت نال کسٹم ڈیوٹی تے ٹیکس دوست بنایا تے ریونیو وچ وادھے دے نال نال کردار سازی دی کوشش وی کامیاب رہی۔ بوہت سارے لوک مس ڈیکلریشن چوری تے سمگلنگ چھڈ کے باقاعدہ امپورٹ ول راغب ہوئے۔ ڈاکٹر صاحب نے بلاتفریق عوام دی خدمات دا آغاز کیتا۔ کسٹم ہیلتھ کیئر سوسائٹی ویلفیئر دی این جی او دی بنیاد رکھی جیہڑی بعد وچ باقاعدہ اک ہسپتال بن گئی ہن جس دیاں شاخاں ملک دے دیگر شہراں وچ نیں جتھے سینکڑے مریض روزانہ فری علاج کرواندے نیں۔ ڈاکٹر صاحب لئی جناب حسن نثار، عطاء الحق قاسمی، راقم سنے نہ جانے کنہاں کنہاں لوکاں نے کالم لکھے۔ ویکھدے ای ویکھدے ڈاکٹر صاحب عوامی تے سماجی خدمات وچ مذہب، قومیت تے سرحداں دا امتیاز ختم کردے ہوئے بین الاقوامی شخصیت بن گئے فیر جتھے آفت، دکھ، تکلیف، اوتھے ڈاکٹر آصف محمود جاہ۔ تھر وچ اوہ کم کر دتے جیہڑے حکومتاں نہ کر پائیاں درجناں کتاباں جنہاں وچ طبی، سفر نامے، ناول، افسانے نیں جنہاں دے مصنف بن گئے۔ گویا ڈاکٹر صاحب دی انسانی خدمت وچ محنت تے لگن دی بچھڑی، بھینس بن گئی تے اج ایس دی شہرت ترکی، چین، روہنگیا، شام تے بین الاقوامی ہو چکی پچھلے دناں مینوں اک دوست بشارت وہرہ دا فون آیا کہ ڈاکٹر صاحب دا پتہ چلیا اے میں ڈر گیا فوج صبح ای صبح سی۔ میں کہیا رک جا مینوں کجھ نہ دسنا۔ کجھ منٹ رکیا اپنے آپ نوں تیار کیتا تے پچھیا کیہ ہویا اوہ کہن لگیا کہ ڈاکٹر صاحب دا شدید ایکسڈنٹ ہویا اے تے خون دی لوڑ اے۔ میں فوراً اپنے بھتیجے ابوذر معظم، دوستاں، رضوان نقوی تے نعیم حنیف نال درخواست کیتی کہ بریکنگ نیوز چلا دیو، تاں 24 چینل، 42 City تے ARY اُتے بریکنگ نیوز چل گئی۔ ڈاکٹر صاحب نال لوک عشق کردے نیںاوتھے ایہناں دی اپنی وجہ نال خون دین والیاں دا تانتا بندھ گیا۔ کسٹم دی نوکری وچ میں تن شخصیات نوں دیانت دار تے قابل تقلید پایا۔ ایہناں وچ جناب محمد صادق، جناب ڈاکٹر آصف محمود جاہ، محترمہ طیبہ کیانی نیں جیہڑے انسانیت دا فخر لوک نیں۔ باقی سب محمد اسماعیل تے راشد منیر وانگوں دے لوک ای سن۔ ڈاکٹر صاحب نوں ایس حادثے وچ اللہ نے 4 وار موت توں زندگی وچ بدلیا ایہہ سب لوک، ایہناں دے والدین تے گھر والیاں دیاں دعاواں سن۔ مینوں ایہہ جان کے بوہت خوشی ہوئی کہ موجودہ حکومت نے Integnty management cell FBR قائم کیتا اے۔ تے ایس دا انچارج ڈاکٹر صاحب نوں بنایا اے ایہہ بدعنوانی دی روک تھام تے اصلاح لئی موجودہ حکومت دا پہلا احسن قدم کہیا جا سکدا اے۔ اونج تے ماضی وچ ویکھیا گیا کہ جے ایف آئی بنی تے وفاق ادارے ایس دی چراگاہ بن گئے۔
اینٹی کرپشن، اینٹی سمگلنگ، الٹی کرپشن تے الٹی سمگلنگ وچ بدل گئے۔ کسٹم انٹیلی جنس محض بھتہ خور تنظیم بن گئی ایس حد تیکر کہ اج ایہہ ادارے یکسر ختم کر دیے تے کرپشن گھٹ ہوئے گی باقی کجھ فرق نہیں پئے گا پر ایہہ سیل ڈاکٹر صاحب دی موجودگی وچ انج دا نہیں ہوئے گا۔ ڈاکٹر صاحب لہور دے لوکاں نوں تے خوب جان دے نیں کہ کون کیہ سی تے کتھے اپڑ گیا کنہاں گھٹیاطریقیاں نال اپڑیا اوہ وی جان دے نیں۔ موجودہ دور وچ کسے نوں کوئی ڈر نہیں رہیا لہور کلکٹریٹ وچ 2012ء دے بعد 2017 توں ہن تیکر کرپشن نے اپنے نویں ریکارڈ قائم کیتے البتہ جناب محمد صادق دے بعد موجودہ کلکٹر محسن رفیق اک چنگی شہرت دے مالک نیں۔ پر کرپٹ مافیا جس وچ سرکاری ملازم شریک کاروبار نیں نوں توڑنا بوہت اوکھا بلکہ ناممکن اے۔
ڈاکٹر صاحب دی موجودگی تے نویں ذمے داری نال امید کیتی جاندی اے کہ بدعنوانی وچ خاطر خواہ کمی آئے گی۔ پورے ملک وچ کرپشن دا خاتمہ تے شاید حکومت نہ کر سکے پر ڈاکٹر صاحب دے چارج وچ آن والی ذمے داری اوہ خوب نبھاندے نیں۔ ڈاکٹر صاحب نے تے بدنام زمانہ پاناں دا سکینڈل پھڑ لیا سی پر ایس ویلے دے کلکٹر نے ایسے لمحے ایہناں نوں تبدیل کر کے ہیڈ کوارٹر لا دتا سی۔ ڈاکٹر صاحب اک عظیم سرمایہ نیں۔ وزیراعظم عمران خان دی حکومت خوش نصیب اے کہ FBR وچ ایہناں نوں انج دا ممبر نصیب ہویا۔ وزیراعظم دی نیت کہ کرپشن ختم کرنی اے ایس اقدام نال میں پرامید آں کہ بدعنوانی ختم ہوئے گی۔ جے خدانخواستہ عمران خان بدعنوانی ختم یا گھٹ نہ کر سکے تے ایہہ نعرہ ہمیشہ لئی مر جائے گا۔ ڈاکٹر صاحب لہور وچ تے اک دن وچ بدعنوانی ختم کر سکدے نیں کیوں جے کلکٹر جناب محمد محسن رفیق بذات خود اک نیک نیت تے دیانت دار تے بہادر آفیسر نیں۔ بس 2017ء دے بعد کلکٹریٹ تے کسٹم انٹیلی جنس ڈائریکٹوریٹ وچ ودھدی ہوئی بدعنوانی نوں روکنا ہوئے گا تعینات رہن والیاں نال منی ٹریل جس دا بوہت شہرہ دے علاوہ تبدیل ہوئی معاشی حالت دے اسباب دا تعین کرنا ہوئے گا۔ اللہ دے فضل نال سارا کم سدھا ہو جائے گا۔