مریم نواز نوں مخاطب کرنا شیخ رشید نوں مہنگا پوے گا: رانا ثناء اللہ
لہور: مسلم لیگ (ن) پنجاب دے صدر رانا ثناء اللہ آکھیا اے مریم نواز نوں مخاطب کرنا شیخ رشید نوں مہنگا پوے گا۔ لہور وچ میڈیا نال گل کردیاں رانا ثناء اللہ آکھیا سرکار نے سیاسی رواداری ختم کر دتی اے۔ نیب دے راہیں انتقامی کاروائیاں کیتی جا رہیاں نیں۔ مسلم لیگ (ن) دی قیادت دے خلاف پہلے کرپشن دا بیانیہ لیایا گیا، ہن غداری تے اتر آئے نیں، نوازشریف نوں اللہ نے عزت دتی۔
سرکار صرف پروپیگنڈا کر رہی اے، نوازشریف دے خلاف غداری دا مقدمہ درج ہویا اے، 3وار دے وزیراعظم نوں غدار قرار دینا افسوسناک اے۔ سرکار دسے کہ ڈھائی ورھیاں وچ کیہ کیتا، جلسیاں دے صرف اعلان نال سرکار دے ہتھ پیر پُھل گئے۔ شیخ رشید نوں تنقید دا نشانہ بناندیاں رانا ثناء آکھیا شیخ رشید نے مریم نواز بارے جہڑا بیان دتا اے ایہدے تے خبردار کرنا آں کہ اپنی اوقات وچ رہن، ہن حد ہو گئی اے، مریم نواز نوں مخاطب کرنا شیخ رشید نوں مہنگا پوے گا۔ شیخ رشید مسلم لیگ (ن) وچ شامل ہون لئی منتاں ترلے کردے سن۔





















