ویب سائٹ تے روز ویلٹ ہوٹل دی بندش دا اشتہار، تحقیقات دا فیصلہ
کراچی: نیویارک وچ پی آئی اے دے ملکیتی ہوٹل روز ویلٹ دی ویب سائٹ تے ہوٹل نوں بند کرن دا بینر لاؤن تے ہٹان تے متعلقہ حکام توں پوچھ گچھ دا فیصلہ کر لیا گیا۔
ذرائع دے مطابق 2دن پہلاں نیویارک وچ واقع قومی ایئر لائن دے ملکیتی ہوٹل روز ویلٹ دی ویب سائٹ تے انتظامیہ ولوں 31اکتوبر نوں بندش دے حوالے نال اشتہار لایا گیا جہنوں بعدوں ہٹا دتا گیا، ایس ضمن وچ متعلقہ حکام توں پوچھ گچھ کرن دا فیصلہ کر لیا گیا۔ وسیلیاں دے مطابق ہوٹل دی تعمیرنو تے 100ملین ڈالرز توں ودھ دا تخمینہ ا ے، ابتدائی طور تے فوری طور تے ہوٹل اُتے 32ملین ڈالرز دے اخراجات دی لوڑ اے، ماہر فنانشل ایڈوائزر دی مدد نال ہوٹل دے مستقبل دا فیصلہ متوقع اے، ہوٹل پی آئی اے انویسٹمنٹ لمیٹڈ نامی کمپنی دی ملکیت اے۔ 74سالہ ڈاکٹر نجیب سمیع پی آئی اے دی ایس سبسڈی کمپنی دے سی ای او نیں۔ ڈاکٹر نجیب سمیع نے بطور سی ای او2007وچ چارج سنبھالیا، 2007توں 2016تک مسلسل منافع گھٹ ہویا، 2017وچ آمدن تے خرچ برابر سی۔ 2018وچ روز ویلٹ ہوٹل خسارے وچ جانا شروع ہویا۔ 14منزلہ روز ویلٹ ہوٹل وچ 1ہزار 47کمرے نیں۔ ہوٹل تے جے پی مورگن نامی کمپنی دا 105ملین ڈالرز دا قرضہ اگست 2020وچ حکومتی ہدایات تے نیشنل بینک نے ادا کیتا۔ 50توں 70منزلہ کمپلیکس دی تعمیر دا تخمینہ 5سو ملین توں ودھ اے۔





















