جہدا جینا مرنا پاکستان دے نال ہووے اوہنوں وی غداراں وچ شامل کر لیا گیا: وزیراعظم آزاد کشمیر
وزیراعظم آزاد کشمیر راجہ فاروق حیدر خان دا کہنا اے ایس توں وڈی بدقسمتی تے بدبختی ہور کیہ ہو سکدی اے کہ جہدا جینا مرنا پاکستان دے نال اے اوہنوں وی غداراں وچ شامل کر لیا گیا ۔
وزیراعظم آزاد کشمیر راجہ فاروق حیدر دا بغاوت دے مقدمے دے بعد جیوپارلیمنٹ وچ پہلا انٹرویو دیندیاں کہنا سی ایف آئی آر درج ہون دا پتہ چلن تے بہت دکھ ہویا۔
اوہناں دا کہنا سی پی ڈی ایم دے تن چوتھائی رہنما مودی دے ایجنٹ نیں تے پاکستان دے وجود تے سوال اٹھدا اے، میں کسے توں نہیں آکھیا نہ کہواں گا کہ میرا ناں ایف آئی آر توں کڈھو۔
اوہناں نے ہور آکھیا تفتیش لئی بلایا گیا تے سرکاری گڈی وچ ہتھکڑیاں پا کے جاواں گا، ساڈا مستقبل تے قبلہ پاکستان اے، پاکستان نال وابستگی ہور مضبوط ہووے گی، عزم کمزور نہیں ہووے گا۔ خواہش اے کہ سری نگر وچ پاکستان دا جھنڈا لہراواں۔
راجہ فاروق حیدر دا کہنا سی ایف آئی آر وچ شامل دفعات کیہ کوئی عام بندہ درج کرا سکدا اے؟ اوہناں توں اینی توفیق وی نہیں ہوئی کہ ٹیلی فون کرکے معذرت کر لیندے۔اوہناں دا کہنا سی پاکستان دا وزیراعظم جہڑا وی ہووے ساڈے لئی قابل احترام اے جدوں وزیراعظم کہوے اپوزیشن دے پچھے مودی اے تے اجہی ایف آئی آر درج ہوندی اے۔ ایف آئی آر اخلاقی دیوالیہ پن تے ملک دشمنی دا سب توں وڈا ثبوت اے۔





















