طارق عباس قریشی (گوجرانوالہ یاد کردا اے)

لكهت:عتیق انور راجہ

سرکاری افسر بوہت مختصر ویلے لئی مختلف شہراں وچ تعینات ہوندے رہندے نیں بوہت سارے افسر صرف اپنا کم کرن دی کوشش کردے نیں پر کجھ افسر انج دے وی ہوندے نیں جیہڑے اپنے فرض دے نال نال عوام وچ شعور بیدار کر کے لئی تے محکمے دا عوام نال تعلق چنگا بنان لئی اپنا دل تے دفتر دے دروازے شہریاں لئی کھول دیندے نیں۔ حقیقت وچ انج دے ای لوک ہوندے نیں جہڑے چاہے کنے ای گھٹ ویلے کسے شہر وچ اپنے فرائض دی بجا آوری لئی رہن اوہ ایس ویلے نوں انج لنگھاندے نیں کہ ایہناں دے جان دے بعد وی لوک نہ صرف ایہناں نوں چنگے لفظاں وچ یاد کردے نیں بلکہ ایہناں دے نال کسے نہ کسے طرح رابطے وچ رہن دی کوشش کردے نیں۔ پنجاب پولیس دی گل کیتی جائے تے ایس فورس وچ بوہت سارے وڈے ناں اگے آندے نیں۔ جنہاں نے پیشہ وارانہ مہارت دے نال اپنے چنگے برتائو نال شہریاں دے دلاں وچ اک چنگا مقام بنا لیا۔ پنجاب دھرتی نے انج انج دے سپوتاں نوں جنم دتا اے کہ جیہڑے محنت عزم تے حوصلے، فولادی ارادیاں نال ہر مشکل گھڑی دا مقابلہ کردے نیں۔ ملک دی ترقی تے خوشحالی وچ جتھے دوجے شعبے مصروف عمل نیں اوتھے پولیس فورس وی شریک اے پولیس سروس وچ وی بے شمار پولیس افسر انج دے نیں جیہڑے اپنے کم، لگن، اہلیت، ایمانداری نال اپنا منفرد مقام رکھدے نیں جیہڑے کسے ڈر، سفارش نوں خاطر وچ نہیں لیاندے تے انج انج دے کارہائے نمایاں سرانجام دتے کہ لوکاں نے وی اپنی محبتاں دے پھُل نچھاور کیتے، انج دا ای اک معتبر ناں طارق عباس قریشی دا اے۔ کجھ مہینے پہلے تیکر جدوں آپ آر پی او گوجرانوالہ سن تے ایہناں نال ساڈی کئی ملاقاتاں ہوندیاں رہیاں۔ اسیں سائبان دے پلیٹ فارم توں سجن والی کئی تقریبات وچ ایہناں نوں مدعو کیتا تے اوہ ہر تقریب نوں رونق بخشن ویلے اُتے تشریف لیاندے رہے فیر جدوں اچانک ایہناں دی تبدیلی دی خبر سنی تے بوہت سارے لوکاں نے کہیا کہ شہر اک چنگے افسر توں محروم ہو گیا اے۔ کرونا وبا دے اثر کجھ گھٹ ہویا تے اک تقریب وچ کجھ لوکاں نے مینوں کہیا کہ راجہ صاحب تسیں طارق عباس قریشی ہوراں نوں کسے تقریب وچ گوجرانوالہ بلائیے تاں جے اسیں اک وار فیر ایہناں توں کجھ گلاں سکھ سکیے۔ پچھلے مہینے جدوں طارق عباس قریشی ہوری پٹرولنگ پولیس وچ خدمات انجام دے رہے سن اسیں فون کیتا تے اوہناں نے کمال محبت نال کہیا، ضرور راجہ صاحب، تسیں اپنے دفتر دا پتہ میسج کر دیو، جلدی ملاقات ہوندی اے۔ ایس توں پہلے کہ اسیں ایہناں نوں دعوت دیندے تے ایہناں دے اعزاز وچ کوئی باقاعدہ تقریب رکھدی جاندی ایہہ پتہ چلیا کہ طارق عباس قریشی آر پی او ساہیوال تعینات ہو گئے نیں۔ یعنی ہن ملاقات کافی اوکھی ہو چکی سی۔ ہن کافی دناں توں کجھ دوستاں دا اصرار اے کہ ایہناں نوں ملن ساہیوال جانا چاہیدا اے۔ ایہہ سب لکھن دا مقصد ایہہ اے کہ جدوں کوئی وی بندا کسے وی محکمے وچ اپنے کم نال انصاف کردا اے تے اوہ لوکاں دے دلاں وچ اک انج دا مقام بنا لیندا اے کہ لوک ہمیشہ ایس نال ملن دے خواہش مند رہندے نیں ایس دی صحت، لمبی عمر تے ترقی لئی دعا گو رہن لگدے نیں۔

صاحبو! ساڈی سوسائٹی وچ کہیا جاندا اے کہ ہر چوری ڈکیتی بھتہ خوری جہے جرماں دے پچھے پلس دا ہتھ ہوندا اے۔ پلس دے کردار اُتے ہر ویلے انگلیاں چکیاں جاندیاں نیں۔ معاشرے وچ ہر رونما ہون والے جرم دے بعد پلس دی کارکردگی اُتے سوال اٹھن لگدے نیں۔ اج ساڈی پلس اُتے جیہڑے سوال چکے جاندے نیں۔ کاش ایہہ سوال پلس وچ بھرتی توں لے کے ایہناں دے معاملیاں وچ مداخلت اُتے وی چکے جاندے۔جے ساڈی پلس اک آزاد ادارہ ہوندی کدی کوئی سیاست دان کوئی بااثر بندا اپنے ذاتی مقصد لئی پلس نوں قانون شکنی اُتے مجبور نہ کر سکدا۔ ایہہ وی اک حقیقت اے کہ جس تیزی نال آبادی ودھی اے ایسے تناسب نال ایس محکمے وچ بھرتیاں نہیں ہوئیاں۔ پتہ نہیں کس سوچ دے تحت ہر نویں آن والی حکومت سب توں پہلے پلس افسراں دے تبادلے شروع کر دیندی اے۔ پچھلی کئی دہائی توں کہیا جاندا رہیا اے کہ تھانہ کلچر بدلن دی لوڑ اے۔

سابق حکومت نے پلس دی وردی بدلن اُتے تے کروڑاں روپئے خرچ کر دتے پر تھانیاں دی عمارتاں تے ماحول بدلن لئی کجھ کرن دی کوشش نہیں کیتی۔ ایہہ حقیقت اے کہ مشکل دے ویلے ساڈے دل وچ سب توں پہلا خیال پلس دا ای آندا اے۔ ذرا سوچو اسیں جدوں رات دے کسے ویلے کسے ویران سڑک توں لنگھ رہے ہونے آں تاریکی تے ہنیرا ساڈے اوسان اُتے سوار ہوندا اے ۔ انج کوئی بلی دا بچہ وی اچانک سامنے آ جائے تے اسیں بوہت سارے اوسان خطا ہو جاندے نیں تے انج دے ویلے سانوں دور توں پلس دی ہوٹر لائیٹ والی گڈی نظر آ جاندی اے تے اسیں اپنے آپ نوں محفوظ محسوس کرن لگے نیں کہ ایس سڑک اُتے پلس موجود اے۔ صرف 10 فیصد پلس والیاں دے غلط رویے نال محکمہ پولیس اُتے انگلیاں چکن والیاں نوں ویکھنا ہوئے گا کہ ایسے محکمے وچ طارق عباس قریشی جہے افسر وی کم کر رہے نیں۔ جے پلس توں بہترین نتیجہ چاہیدا ہوئے تے فیر پلس اُتے سیاستداناں دا دبائو ختم کرنا ہوئے گا۔ پلس افسراں دی راتوں رات تبدیلیاں کرن دا رحجان ختم کرنا بوہت ضروری اے۔تیزی نال بدلدے ہوئے معاشرتی حالات وچ، نوی ٹیکنالوجی، سائنسی ایجادات تے سکیورٹی خدشات دے پس منظر وچ قوم فطری طور اُتے اک انج دی پولیس دی توقع کردی اے جیہڑا عوام دوست ہوئے، جرم نال نبڑن لئی تیار ہوئے تے ہر قسم دے خطریاں لئی جدید سہولتاں نال لیس وی ہوئے۔ ایس لئی بوہت ضروری اے کہ طارق عباس قریشی ہوراں جہے جہاندیدہ افسر اپنے تجربیاں نال نوجوان افسراں دے راہبر بنے رہن۔