ٹک ٹاک تے پابندی، کیوں نہ پی ٹی اے دے خلاف کاروائی کیتی جائے: اسلام آباد ہائیکورٹ

اسلام آباد: ہائی کورٹ نے سوشل میڈیا ایپ ٹک ٹاک تے پابندی دے خلاف عرضی تے پی ٹی اے نوں نوٹس جاری کردیاں ہوئیاں ادارے دے سینئر افسر نوں ذاتی حیثیت وچ طلب کر لیا۔ چیف جسٹس اسلام آباد ہائی کورٹ جسٹس اطہر من اللہ نے سوشل میڈیا ایپ ٹک ٹاک تے پابندی دے خلاف عرضی تے سماعت کیتی، درخواست گزار دے وکیل نے موقف اختیار کیتا کہ پی ٹی اے نے ٹک ٹاک تے پابندی لاندیاں ہوئیاں عدالت دے دو فیصلیاں دی خلاف ورزی کیتی اے۔

دوران سماعت چیف جسٹس اسلام آباد ہائی کورٹ نے ریمارکس دتے ٹک ٹاک تے پابندی سکیورٹی دے پیس منظر وچ تے نہیں لائی گئی؟ ایس طرح تے فیر پورا انٹرنیٹ بند کرنا پوے گا، کدھرے ایہ تے نہیں اے کہ موٹروے تے جرم ہو گیا تے موٹروے وی بند کردیئے، فیر تے سارے چینل وی بند کر دیئے، جسٹس اطہر نے ریمارکس دتے کون فیصلہ کردا اے ایہ غیر اخلاقی اے تے ایہ غیر اخلاقی نہیں اے، کیوں نہ پی ٹی اے دے خلاف کاروائی شروع کیتی جائے۔ ہائی کورٹ نے پی ٹی اے نوں نوٹس جاری کردیاں ادارے دے سینئر افسر نوں ذاتی حیثیت وچ طلب کر لیا۔