اک مثالی استاد دے اعزاز وچ اک مثالی تقریب

پروفیسر حکیم شفیق کھوکھر

پچھلے دناں گورنمنٹ کالج آف سائنسز دے پرنسپل پروفیسر ڈاکٹر میاں محمد اکرم جیہڑے تنظیم اساتذہ پاکستان دے صدر وی نیں دی مدت ملازمت دے اختتام اُتے ایہناں دے اعزاز وچ اک پروقار، شاندار تے مثالی تقریب داانعقاد کالج دے سیمینار ہال وچ انعقاد ہویا۔ ایس تقریب وچ نہ صرف کالج دے استاداں نے ایہناں نوں زبردست خراج تحسین پیش کیتا بلکہ دوجے کالجاں دے استاداں جنہاں وچ ایہناں دے ساتھی، شاگرد تے تنظیم دے ذمے داران شامل سن، نے پرنسپل ڈاکٹر محمد اکرم نوں جس انداز نال خراج تحسین پیش کیتا اوہ اپنی مثال آپ اے۔
ایس توں پہلے اسیں گورنمنٹ کالج آف کامرس دے پرنسپل قاضی اجمل مرحوم تے پرنسپل محمد افضل قریشی دے اعزاز وچ منعقدہ تقریباں نوں ای مثالی تے یادگار سمجھدے سن۔ جنہاں نوں اسیں بڑی شان تے اہتمام نال رخصت کیتا سی۔ ایس وچ میاں شان احمد سابق ڈائریکٹر ٹیکنیکل ایجوکیشن پنجاب تے دوجے احباب نے وی شرکت کیتی سی۔ پر پروفیسر ڈاکٹر میاں محمد اکرم دے اعزاز وچ منعقدہ تقریب اک وکھری شان نال منائی گئی۔ ایس تقریب وچ خطاب کرن والیاں دی کثیر تعداد موجود سی پر کلاسز دے انعقاد تے نماز ظہر دی مناسبت نال سب نوں مختصر لفظاں وچ اپنا مافی الضمیر بیان کرن دی درخواست کیتی گئی۔ ایس کم وچ ڈاکٹر ایوب ندیم کافی کامیاب رہے تے کجھ وی نہ کہیا سب کہ وی گئے تے کہندے کہندے رہ وی گئے کہ مصداق مختصر پر جامع خطاب کیتا۔ ایسے طرح دوجے مقررین نے وی اپنے خیالات دے اظہار وچ اختصار توں کم لیا پر میں صاحب نال اپنے تعلقات، ایہناں نال اپنی عقیدت تے تدریسی تے تنظیمی میدان وچ ایہناں دی خدمات اُتے سیر حاصل روشنی پائی۔
ڈاکٹر ایوب ندیم دی موجودگی وچ میرے لئی نثر وچ اظہار خیال مشکل سی ایس لئی میں اک دعائیہ نظم پیش کر کے میں صاحب نوں خراج تحسین پیش کیتا۔
پروفیسر ڈاکٹر میاں محمد اکرم دی ذات کسے تعارف دی محتاج نہیں اوہناں نے 23 نومبر 1987 وچ گورنمنٹ کالج حافظ آباد توں ہنی تدریسی سرگرمیاں دا آغاز کیتا۔ 11 دسمبر 1992 وچ گورنمنٹ کالج آف سائنسز وحدت روڈ وچ ایہناں دی تعیناتی ہوئی۔ ایتھے اوہناں نے لیکچرر ، اسسٹنٹ پروفیسر، ایسوسی ایٹ پروفیسر تے پروفیسر دے عہدے اُتے کم کیتا تے ملازمت دے آخری دناں جد کہ کرونا دی وبا تے دوجے مسلیاں دی وجہ نال پرنسپل دی سیٹ اُتے کم کرن نال وڈے وڈیاں دا پتہ پانی ہوندا اے اوہناں نے حسن تدبر،حسن اخلاق،حسن انتظام تے جانفشانی نال اپنے فرائض انجام دتے تے کالج وچ نویں داخلیاں توں لے کے دوجے مسئلیاں نوں ایس طرح حل کیتا کہ پورا سٹاف ایہناں دا معترف وکھائی دیندا سی۔
پروفیسر ڈاکٹر میاں محمد اکرم نے دوران سروس 12 کتاباں لکھیاں جیہڑی پورے ملک دے متعدد تعلیمی اداریاں وچ پڑھائیاں جا رہیاں نیں۔ ایہناں وچ اسلامی معاشیات اُتے ایہناں د ی کتاب، بی۔ ایس (چار سالہ کورس) دے نصاب وچ شامل اے تے پورے ملک وچ ایہو کتاب ای تجویز کیتی جاندی اے۔ اپنی سروس دے دوران اوہناں نے پنجاب ٹیکسٹ بک بورڈ تے ایسے نوعیت دے دوجے اداریاں وچ جنہاں وچ قومی نصاب ساز کمیٹیاں وی شامل نیں شرکت کیتی۔ اوہناں نے تنظیم اساتذہ دے سربراہ دی حیثیت نال پورے ملک دے دورے وی کیتے تے مختلف سیمیناراں وچ وی شرکت کیتی پر ایس دے باوجود کالج دے طلباء دا تعلیمی نقصان نہ ہون دتا۔ اگرچے اوہ رات نوں دو یا تن وجے واپس آندے پر علی الصباح اپنے کالج دے کلاس روم وچ موجود ہوندے سن ایسے طرح اوہناں نے اپنی ذمے داری دی ادائیگی دی روشن مثال قائم کیتی۔ ایہناں توں پہلے پروفیسر محمد یونس اعوان مرحوم،پروفیسر انجینئر یونس میر(پرنسپل پاک سویڈیش انٹیوٹ آف ٹیکنالوجی) جناب سید احسن کلیم ( منتظم کشمیر کمیٹی تنظیم اساتذہ پاکستان ) دے بارے وچ وی سنیا اے کہ اوہ وی پورے ملک وچ گئے نیں پر اوہ اپنی کلاس توں غیر حاظر نہیں رہے۔کجھ لوک اپنے عہدے دا فائدہ چکدے ہوئے مقرر تعداد توں زیادہ چھٹیاں کردے نیں تے جے کسے تنظیم نال جڑے ہون تے فیر ایہناں نوں کوئی روک نہیں سکدا پر میاں اکرم صاحب نوں ایہہ اعزاز وی حاصل اے کہ اوہناں نے کسے وی ورھے 15 توں ودھ چھٹیاں نہیں لیاں۔
ایس متعلق اوہناں نے اپنے خطاب وچ دسیا کہ اوہناں نے اپنے ویلے نوں تے اپنی مصروفیات نوں بہتر طریقے نال مینج کیتا اے۔ اپنے آخری دور وچ اوہناں نے بطور پرنسپل ادارہ جس طرح کم کیتا اے ایس دے بارے وچ دسدے ہوئے اوہناں نے دسیا کہ ایس دوران میں پانی پت دی پہلی، فوجی تے تیجی لڑائیاں اکٹھیاں ہو گئیاں سن۔ سارا دن دوست وی آندے سن ایہناں نال گلاں وی ہوندیاں سن تے کالج دا کم وی ہوندا رہیا۔ ایس دوران دوستاں نال تے سٹاف نال مشورے وی جاری رہے تے دوستاں دے تعاون نال تے اللہ تعالیٰ دے کرم نال کامیابی حاصل کیتی۔ اوہناں نے دعا کیتی کہ اللہ تعالیٰ ایہناں دی کاوش نوں قبول فرمائے کیوں جے عاقبت ٹھیک ہو جائے ایہو بہتر اے۔ اوہناں نے جنہاں ساتھیاں نے ایہناں دا ساتھ دتا اے ایہناں دا تے پورے سٹاف دا شکریہ ادا کیتا تے دعا کیتی کہ اللہ تعالیٰ سانوں ساریاں نوں اگ توں بچائے تے جنت الفردوس وچ داخل فرمائے۔ اوہناں نے اک انوکھی روایت قائم کردے ہوئے جونیئر سٹاف نوں وی تحفے دتے تے تقریب دے شرکا وچ قرآن کریم دا مترجم نسخہ پیش کیتا حالاں کے انج دے موقعے اُتے سٹاف ولوں قرآن مجید دا نسخہ پیش کیتا جاندا اے۔
میرا خیال سی کہ پروفیسر ڈاکٹر میاں محمد اکرم دی ریٹائرمنٹ دے موقعے اُتے حکومت پاکستان دی طرفوں ایہناں دی معاشیات تے تدریس لئی شعبے وچ خدمات تے مہارت دی وجہ نال ایہناں دی خدمات ملکی معیشت نوں بہتر بنان لئی حاصل کیتیاں جان گیاں ایس موقعے اُتے ایہناں لئی اعلیٰ ایوارڈ دین دا اعلان کیتا جائے گا پر انج نہیں ہویا۔ پر اصلاح ولوں پروفیسر ممتاز صاحب نے ایہہ اعلان کر کے سب نوں خوش کر دتا کہ ایس کالج توں فروغت دے اگلے دن توں ای ڈاکٹر صاحب ساڈے ادارے وچ خدمات انجام دین گے۔
جس دا سب نے خیر مقدم کیتا۔ ایس توں پہلاں کالج دے سٹاف نے نہ صرف خوبصورت تے موثر انداز وچ میاں صاحب دی دینی، تدریسی، تنظیمی تے صحافتی سرگرمیاں اُتے سیر حاصل گل بات کیتی تے ایہناں نوں یاد گاری شیلڈ پیش کیتی بعد وچ سٹاف ولوں معزز مہماناں دے اعزاز وچ ظہرانہ دتا گیا، جس وچ منتظمین دی طرفوں جس احسن تدبر دا مظاہرہ کیتا گیا ایس دی داد نہ دینا وی ستم ظریفی اے۔