ربیع الاول دا مبارک مہینہ

لكهت:امیر محمد اکرم اعوان

ربیع الاول دا اوہ مبارک مہینہ فیر توں آیا جس وچ آقائے نامدار ﷺ دی بعثت عالی ہوئی آپ ﷺ دی ولادت مبارک ایسے مبارک مہینے وچ اے۔ آپ ﷺ دی عمر مبارک 40 ورھے پوری ہوئی تے بعثت ایسے مہینے وچ اے آپﷺدا وصال ایسے مہینے وچ اے اللہ دیاں نعمتاں دنیا دی بے پناہ نیں ہر طرح دی مخلوق ایس توں فائدہ مند ہو رہی اے اج اسیں ولادت کی گل کرنے آں ولادت باسعادت بے پناہ رحمتاں دا سبب بے پناہ برکات دا سبب پر قرآن کریم ولادت دی گل نہیں کردا کیوں نہیں کردا ؟
قرآن کریم جدوں وی گل ارشاد فرماندا اے جدوں وی حضور ﷺ دا تذکرہ آندا اے جدوں ﷺ دی گل شروع ہوندی اے تے بعثت توں شروع کردا اے قرآن پاک بعثت دی گل کردا اے اللہ پاک فرماندے نیں زمیناں اسماناں ساری مخلوق اُتے میرے بے پناہ احسانات نیں سب نوں پیدا کیتا سب اُتے میرا احسان اے سب نوں وجود دتا زندگی، روزی، سب نوں محبتاں دتیاں پر میرا احسان تہاڈے اُتے اے کہ میں محمد رسول اللہ ﷺ نوں مبعوث فرما دتا ہن ایہہ احسان انج دا اے کہ تخلیق کائنات ایس دے ساہمنے معدوم ہو گئی فروغ سینا جنہاں انوارات دی اک جھلک برداشت نہ کر سکیا تجلیات باری توں وڈی وڈی سنگلاخ چٹاناں چٹخ چٹخ کے سڑکے سرمہ بن گئیاں بعثت رسالت ﷺ نے انسانی دلاں نوں تجلیات باری دی آماجگاہ بنا دتا ایہناں تجلیات نوں ایمان لیان والے بندیاں دے دلاں وچ انج سمو دتا کہ اوہ ایہناں دی غذا، دوا تے حیات بن گئی 13 ورھے تیکر حضور ﷺ دی غلامی لئی دنیا دی ہر اذیت برداشت کیتی، ایہناں دے وجود گرم سلاخاں نال داغے گئے، گرم ریت اُتے لٹا کے سینے اُتے پتھر رکھے گئے، کوڑے مارے گئے، زخمی کیتے گئے، بھکا پیاسا رکھیا گیا،، شہید کیتے گئے، کیہڑا ظلم اے جیہڑا مجبور مسلماناں اُتے مکہ مکرمہ دے رہن والے مشرکین نے روا نہ رکھیا ہوئے پر اوہناں نے غلامی محمد رسول اللہ ﷺ نوں ہتھ توں نہ جان دتا ہر دکھ برداشت کیتا حتیٰ کہ گھر، شہر جائیداداں چھڈیاں، سب کجھ قربان کر دتا تے خالی ہتھ ہجرت کر کے حضور ﷺدی خدمت وچ چلے گئے فیر مدینہ منورہ اُتے حملہ، بدر واحد، خندوق وچ کفار مشرکین نے بڑا زور لایا اوہناں نے قربانیاں دتیاں، زخمی ہوئے پر حق غلامی ادا کردے رہے۔
بعثت رحمت عالم ﷺ اوہ نقطہ اے جس نے سانوں ایمان عطا کیتا تے ایمان اوہ سانچا اے جیہڑا بندے نوں جو کجھ اوہ پہلے سی ایس توں مٹا کے اک نواں انسان بنا دیندا اے بعثت عالی دے نال جتھے معجزات و برکات نیں اوتھے ارشادات رسول ﷺ وی نیں جنہاں دی پاسداری کرنی پیندی اے، آپ ﷺ دے لیائے ہوئے دین دے اندر آن لئی اپنی تراش خراش کرنی پیندی اے۔ پاکیزگی اپنان لئی صفائی کرنی پیندی اے، ہمت و محنت نال کم لینا پیندا اے، رسومات و رواجات چھڈ کے سنت رسول ﷺ اپنانی پیندی اے ، اپنی خواہشاں نوں رضائے الٰہی دے حصول لئی چھڈنا پیندا اے تے اپنی رائے و پسند توں دستبردار ہو کے ایہنوں حضور ﷺ دی پسند وچ فجا کرنا پیندا اے تے ایہہ سب کجھ کرنا حضور ﷺ دی برکات آسان کر دیندی اے پر اودوں جدوں کوئی بعثت رحمت عالم ﷺ توں حصہ پائے ساری قوم میلاد مناندی اے بعثت کوئی نہیں مناندا کیوں جے جدوں بعثت دا تذکرہ ہوئے گا تے حضور اکرم ﷺ دی اطاعت تے غلامی کرنی پئے گی خواہشاں، جھوٹی انکا، تکبر و غرور، لالچ و حوس دے سارے بت دل توں کڈنے ہون گے تے ایہناں ساریاں دی تھاں اک اللہ دی حکومت قائم کرنی ہوئے گی مومن دا تے قرآن دا تصور ایہہ اے کہ جدوں اللہ دا نبی ﷺ حکم دے دیوے تے ایہناں دے کول سوائے تسلیم دے ہور کوئی راہ ای نہیں تے صرف ظاہری تسلیم نہیں دل وچ وی کوئی کدورت کوئی کھٹ کھٹ محسوس نہ کرے کہ انج کیوں اے؟ صدق دل نال ایس دی اطاعت کر لوے۔
جدوں حضور دی ولادت ہوئی تے بے پناہ فائدے مخلوق نوں اپڑے ہر طرح دا رزق، ایس وچ برکت، سب توں وڈی گل کہ آپ ﷺ دے دنیا وچ قدم رنجہ فرمان نال ساری زمین مسجد بن گئی جیہڑے اجتماعی عذاب آندے سن حضور ﷺ دی بعثت دے بعد ختم ہو گئے کیہ آپ ﷺ نے نہیں فرمایا کہ میرے زمین اُتے پیر رکھن نال اجتماعی عذاب نازل ہونا بند ہو گئے لوکاں دی صورتاں مسخ ہونا بند ہو گئیاں پانی وچ پاک کرن دی طاقت سی آپ دے پیر مبارک نال اللہ نے مٹی نوں ایہہ تاثیر دے دتی کہ پانی نال وضو کرو تے جسم پاک ہوندا اے جے لوڑ تیمم دی ہوئے تے حضور ﷺ فرماندے نیں ہڈیاں تے ایہناں دا گودا تیکر پاک ہو جاندا اے لاغر سانڈھنی اُتے آپ ﷺ بیٹھے تے اوہ جواناں توں تیز ہو گئی ددھ خشک ہوچلیا سی نہراں جاری ہو گئیاں جتھے جتھے حضور ﷺ پیر رکھدے اوہ تھاں گلزار ہو جاندی جس گھر وچ پیر رکھدے اوہ بابرکت ہو جاندا جس جانور اُتے سوار ہوندے اوہ تیز رفتار ہو جاندا یثرب جس دا ترجمہ دار البلاء ٹھیک اے اک خاص قسم دا مرض جیہڑا اوتھے جاندا ایس دا شکار ہو جاندا یثرب نوں مدینہ کس نے بنا دتا ؟
ربیع الاول وچ نبی کریم ﷺ دا وصال ہویا تے مدینہ منورہ وچ صحابہ کرامؓ اُتے مشکل ترین گھڑی سی دن نوں انج معلوم ہوندا سی جویں رات ہو گئی ہوئے صحابہ کرامؓ وچ کجھ لوک بیٹھے سن وصال دی خبر سنی تے اوتھے منجمد ہو گئے فیر ساری زندگی اٹھ نہ سکے سید نا فاروق اعظم ؓ، جہی ہستی اُتے وی جذب آ گیا اُم ایمن رضی اللہ تعالیٰ عنہ حضور ﷺ دی بوہت پیاری خارمہ دن جدوں عمر رسیدہ ہو گئیاں تے نبی کریم ﷺ ایہناں دے گھر خیریت پُچھن آپ تشریف لے جاندے حضور ﷺ دے وصال دے بعد سیدنا ابوبکر صدیق رضی اللہ عنہ
تے حضرت عمر رضی اللہ عنہ اُم ایمن دی مزاج پرسی لئی تشریف لئے گئے جدوں ایہناں دی مزاج پرسی کیتی تے اوہناں نے زارو قطار رونا شروع کر دتا اوہناں نے فرمایا کہ بی بی تسیں اینا کیوں رو رہیاں او؟ حضور ﷺ ساڈے توں دور تے نہیں ام ایمن ؓ نے فرمایا ایہہ گل وچ جاننی آں میں رو ایس لئی رہی آں کہ ہن قیامت تیکر زمین اُتے جبرائیل امین ؑ وحی لے کے نہیں آن گے اسیں تے ایس گل دے عادی سی کہ کوئی مسئلہ ہوندا فوراً بارگاہ رسالت ﷺ وچ حاضر ہوندے مسئلہ بیان کردے جیہڑا ہن اللہ ولوں آندا وحی نازل ہوندی قرآن نازل ہوندا، اللہ دے ذاتی کلام وچ جیہڑا ہن آ جاندا ہن اوہ نعمت ختم ہو گئی رسالت ﷺ نبوت تے کتاب موجود اے قیامت تیکر رہوے گی ایس گل اُتے رونا نہیں اے رو ایس لئی رہی آں کہ حضور ﷺ دا وصال وحی نوں ختم کر گیا حضور ﷺ اللہ دا پیغام اپڑان ایس دنیا وچ تشریف لیائے نہیں تے ایہہ دنیا ایس قابل ای نہیں سی حضور ﷺ میدان عرفات وچ سن آیت کریمہ نازل ہوئی اج دے دیہاڑ میں اپنی نعمتاں تہاڈے اُتے تمام کر دتیاں جنہے انعام کوئی مخلوق اپنے خالق توں لے سکدیاں سی اوہ تہاڈے اُتے اج مکمل کر دتے تہاڈا دین مکمل ہو گیا تے دین اسلام نوں تہاڈے لئی پسند فرما لیا تے ایس اُتے اوہ راضی ہو گیا، ہن ایس وچ کوئی کمی بیشی قیامت تیکر نہیں ہوئے گی تے صحابہ کرام وچ خوشی دی لہر دوڑ گئی کہ روزانہ انتظار رہندا سی ویکھیے نواں حکم کیہڑا ہوئے گا؟ الحمداللہ دین مکمل ہو گیا ساڈی زندگی وچ مکمل ہو گیا ساڈے پورے دین اُتے عمل توفیق ارزاں ہوئے گی سب دے علم وچ سی کہ رازگان نبوت ابوبکر صدیقؓ نیں تے سب نے تلاش کیتا ایہناں نوں تلاش کرو ایہناں نوں مبارک دیو دین مکمل ہو گیا۔ آپ نوں تلاش کیتا تے اپنے خیمے وچ بیٹھے زازوقطار رو رہے سن اوہناں نے کہیا کہ آپ ؓ رو رہے نیں خوشی دا موقع اے دین مکمل ہو گیا اوہناں نے کہیا میں رو ایس لئی رہیا واں ایس دین دی تکمیل لئی حضور ﷺ تشریف لیائے سن نہیں تے ایہہ دنیا ایس قابل نہیں سی تے جے دین مکمل ہو گیا تے ایس دا مطلب اے حضور ﷺ ایس دنیا توں پردہ فرما جان گے اوہناں نے سب نوںرُلا دتا جیہڑا خوشیاں لے کے آئے سن سب نوں رُلا دتا کہ حضور ﷺ دا ایتھے تشریف لیانا ایس دین دی ترویج لئی سی جدوں دین مکمل ہو گیا تے حضور نے اپڑا دتا تے فیر ایہہ دنیا ایس قابل نہیں اے کہ حضور ﷺ نوں ایتھے رکھے تے اوہ ای ہویا ایس دے اسی بیاسی دن دے بعد حضور ﷺ دنیا توں پردہ فرما گئے تے حضورﷺ دی ایتھے تشریف آوری دا مقصد اللہ دا دین روئے زمین اُتے وسن والے انساناں نوں اپڑانا سی جدوں ایہہ فریضہ مکمل ہویا حضور ﷺ ایس دنیا توں پردہ فرما گئے۔ میں زندگی وچ بڑے حوادث ، بڑے دکھ تے تکلیف دہ مناظر ویکھے مینوں کدی رونا نہیں آیا۔ اسیں 1974ء وچ حضرت ( مولانا اللہ یار خان ) رحمتہ اللہ علیہ دے نال حرمین گئے جدے توں مکہ مکرمہ حاضری ہوئی عمرہ کیتا کجھ دن رہوے فیر مدینہ منورہ حاضری ہوئی اٹھ دن مدینہ منورہ وچ رہے روزہ اطہر ﷺ اُتے سلام لئی روز حاضری ہوندی۔ اک دن روزہ اطہر ﷺ توں پہلے ای ایس دوار دے نال بہہ گیا میں ایس سوچ وچ ڈب گیا کہ حضور ﷺ دا وصال ہویا ہوئے گا کس دل، کس جرات ، کس صبر آزما گھڑی توں لنگھ کے صحابہ کرام ؓ نے محمد الرسول اللہ ﷺ نوں دفن کیتا ہوئے گا۔ اوہ کجھ انج دا منظر میرے دل وچ بنیا کہ میں جیہڑی زندگی فیر کدی نہیں رویا سی اودواں توں ہن تیکر اکھاں نم رہندیاں نیں گل گل اُتے رونا آندا اے بلکہ اک دن کسے نے سوال وی کیتا سی تہانوں تے ہن تیکر روندے نہیں ویکھیا ہن کیوں روندے او؟ میں کہیا سی کہ جس دل اُتے ناز سی مینوں، اوہ دل نہیں رہیا۔
ایہہ ساری گلاں ساہمنے ہون تے کیہ جشن تے جلوس نوں جی چاہندا اے؟ کیہ ایہہ پٹاخے تے آتش بازی چلان نوں جی چاہندا اے؟ چندے جمع کر کے ڈھول پٹ کے کس گل دی خوشی منائی جا رہی اے؟ اک گل ہور عرض کر دیواں 12 ربیع الاول نوں منافقین، مشرکین عرب، یہود تے عیسائیاں نے خوشی منائی سی کہ حضور ﷺ دے وصال توں شاید اسلام ختم ہو جائے گا جنہے مولوی جشن وچ ہوندے نیں کدی کسے دے مونہہ توں ایہہ گل وی نکلی اے کہ جنہے لوک جلوس وچ نیں ایہناں نوں ایہہ دس دیو کہ ایہہ تے حضور ﷺ دے وصال دا دن اے ایہہ تے اوہ دن اے جس دے بعد کوئی صحابیؓ نہیں بن سکیا نہ قیامت تیکر بن سکے گا تے ایہہ اوہ دن اے کہ جس دن اوہ نعمت ختم ہو گئی کہ بندہ مسجد نبوی ﷺ وچ حاضر ہوندا دو چار ہوندی حضور ﷺ دی نگاہ ایس اُتے پیندی یا ایس دی نگاہ وجود عالی ﷺ اُتے پیندی تے اک آن وچ اک عام بندا شرف صحابیت اُتے فائز ہو جاندا ہن اللہ کسے نوں اوہ ہمت، وسائل تے توفیق دیوے گا تے محنت کرے گا برزخ وچ ایس دی رسائی ہوئے گی حضور ﷺ دی زیارت توں فیض یاب ہوئے گا پر صحابی نہیں بن سکے گا۔
ارشادات نبوی ﷺ دا مظہر تعامل صحابہؓ اے، صحابہ ؓ نے جیہڑا عمل کیتا اوہ دلیل اے کہ ایہہ حضور ﷺ دا حکم اے تے سارے صحابہؓ دا مقام و مرتبہ ایہہ اے کہ حضور ﷺ نے فرمایا کہ میرے صحابہؓ ستاریاں وانگوں نیں جس طرح ستاریاں توں لوک راہ لبھدے نیں ایہہ تہاڈی راہنمائی لئی اوہ ستارے نیں تسیں جس دا دامن پھڑ لوئو گئے ہدایت پا جائو گے یعنی صحابہ ؓ سارے دے سارے عادل وی نیں ہادی وی نیں جس دا دامن پھڑ لوئو گئے ہدایت پا جائو گے ذرا صحابہؓ توں کوئی جلوس کوئی جشن ثابت کرو دنیا وچ کسے نے جے واقعی کسے نال محبت کیتی اے تے اوہ صحابہ ؓ محمد الرسول اللہ ﷺ نیں دنیا دی پوری تاریخ وچ کوئی ایہناں دی مثال نہیں ایس لئی آدم علیہ السلام توں لے کے قیامت تیکر سارے لوکاں توں انبیاء دے بعد افضل ترین لوک نیں کافر جنہوں ایمان ای نصیب نہیں ہویا ایس دی تے گل چھڈو اوہ تے ہے ای کافر اوہ تے اپنی خواہشاں نال دین گھڑے گا پر جیہڑا ایمان دا دعویٰ کردا اے ایس دے کول کیہ اختیار رہ جاندا اے کہ اوہ اپنی مرضی نال دین گھڑ لوے؟
پتہ نہیں کس گل اُتے جشن منائے جاندے نیں؟ ایس دے جواز وچ کیہ ثبوت اے؟ دین دے امین تے صحابہ ؓ نیں ساڈے کول سارا دین صحابہؓ توں آیا تے صحابہؓ اُتے تے ایہہ دن قیامت بن کے لنگھ گیا پر ایہہ حجر و وصال دیاں گلاں اوہ جانن جنہوں کوئی ذرہ محبت دا نصیب ہویا ہوئے کسے نے ایہنوں حصول زر دا ذریعہ بنا دتا کسے نے اپنی شہرت حاصل کرن دا ذریعہ بنا لیا تے اودھم مچا کے شہراں وچ شور شرابا کر کے بازار بند کر کے مریض مر رہیا اے، سڑک اُتے راہ نہیں، مزدوراں دی چھٹی ہو گئی جیہڑے دہاڑی روز کما کے کھاندے سن ایہناں دا کم بند ہو گیا، دکاناں بند ہو گئیاں کسے نوں نہ دوائی مل رہی اے تے نہ سودا مل رہیا اے کیہڑا دین اے؟ کون مناندا اے؟ کس نے کہیا اے؟ کیہڑا جشن اے یار اج دے دن؟ کس گل دی خوشی اے؟ اج دا دن تے ہے کہ اطاعت دا عہد تازہ کرو جیہڑی کمی رہ گئی اے ایس دی معافی منگو کہ بندہ مسیتاں وچ جائے نوافل ادا کرے قرآن کریم پڑھے سارا دن بہہ درود شریف پڑھدا رہوے اج باوضو رہن دا دن اے کثرت عبادت تے کثرت نال صلوٰۃ و سلام پڑھن دا دن اے صلوٰۃ و سلام تے درود دا وی اک خاص ادب اک خاص طریقہ اے۔
ایہہ زمین اللہ دے ناں توں خالی نہیں ہو ئے گی بلکہ پاکستان دا نقشہ بدلے گا اوہ نقشہ ایہہ اے کہ سارا برصغیر پاکستان ہوئے گا انشاء اللہ پر یاد رکھو کربلا توں لنگھ کے تسیں ویکھ رہے او دنیائے کفر دی طاغوتی طاقتاں اک تھاں مجتمع ہو رہیاں نیں اج برصغیر دا اک حصہ طاغوتی طاقتاں دا مرکز بن دا جا رہیا اے تے ایس دا اک حصہ نعرہ تکبیر نال گونج رہیا اے ایہہ ٹکران گے فتح اللہ دے ناں دی ہوئے گی تے سارا برصغیر ریاست اسلامی بن کے روئے زمین اُتے احیائے اسلام دا سبب بنے گا اج اسیں اج ایس پاسے واپس آئیے تے اللہ سانوں توفیق دیوے گا نہیں تے جیہڑا واپس آئے گا اوہ ایس سعادت نال بہرہ ور ہوئے گا اللہ کریم ساڈی خطائواں نوں معاف فرمائے سانوں نیکی دی توفیق دیوے۔