شہید کون اے ؟

taiba zia

لکھت:طیبہ ضیا

چین دے دریچے جدوں وطن عزیز دے آنگن وچ کھلدے نیں سقوط ڈھاکہ دی ہنیری رات دی کجھ دھندلی جہی تصویر اکھاں اگے گھم جاندی اے۔ بس ایہہ یاد اے اک جنگ ہوئی سی گھر دی چھت اُتے چڑھ کے جنگی طیاریاں دی قلابازیاں تے ڈگدے ہوئے گولے بارود ویکھ کے نعرے لایا کردے ساں۔ سقوط ڈھاکہ دی خبر دے بعد بزرگاں نوں آبدیدہ ویکھیا۔ ساڈی سہیلی دے نانا دا انتقال وی ایس اداس دن نوں ہویا۔ انڈیا توں ہجرت کرن والے اپنی سہیلی دے خاندان دی داستان اج وی ساڈے ذہن دے کسے گوشے وچ زندہ اے۔ سہیلی دے بقول مشرقی پاکستان دی علیحدگی دی خبر دی تاب نہ لیاندے ہوئے ایس دے نانا ہوراں دے دل دی دھڑکن بن ہو گئی۔ گھٹ عمری دی وجہ نال پاکستان دے دولخت ہون دا پس منظر تے سمجھ نہ آ سکیا البتہ لہور گھر دی چھت اُتے کھڑے ہو کے اکہتر دی جنگ دی گولہ باری دے منظر اج وی ذہن وچ تازہ نیں۔ شہر وچ بلیک آئوٹ تے گھر دے تہہ خانے وچ بہہ کے بھنے ہوئے چنے کھان دی (حیرانیاں) وی یاد نیں۔گھر دی چھت اُتے جا کے جنگی طیاریاں دی گولہ باری ویکھن دا اشتیاق تے امی دا بچیاں نوں چھت اُتے جان توں روکنا وی یاد اے۔ ایس زمانے وچ ساڈے وڈے بھرا فوج وچ میجر سن، والدین دا ایہناں دی زندگی لئی دعاواں کرنا وی نہیں بھل سکدا۔ ایہہ وی یاد اے کہ جنگ بند ہو گئی تے ایہہ وی یاد اے کہ پاک فوج دے جوان دشمن ملک دے قیدی بنا لئے گئے تے جدوں جوان آزادی توں بعد وطن آ رہے سی تے ایہناں دے خاندان دے جذباتی منظر کسے صورت نہیں بھلائے جا سکدے۔بھائی جان چھٹی اُتے گھر آندے تے اسیں ایہناں نوں ویکھ کے ملی نغمے گانا شروع کر دیندے۔ فوجی بھرا دے اگے ہتھ لہرا لہرا کے جھوم جھوم کے ترانے گایا کردی سی، جہڑا اج وی ازبر نیں۔ جنگ دا نتیجہ ایہہ نکلیا کہ جنگ دے اختتام اُتے نوے ہزار پاکستانی فوجی ہتھیار پا کے بھارتی قید وچ جا چکے سن۔ مشرقی پاکستان دنیا دے نقشے اُتے بنگلہ دیش دے ناں توں اک آزاد ملک دی حیثیت توں نمودار ہو چکیا سی۔دنیا دی سب توں وڈی اسلامی مملکت دو حصیاں وچ تقسیم ہو گئی۔ سانحہ سقوط ڈھاکہ دے بچپن توں تے وزیراعظم عمران خان دی اسمبلی دی تقریر وچ اسامہ بن لادن کدی مریا تے کدی شہید کیتے تیکر ساڈی تریخ دا ہر سانحہ ہر واقعہ کنفیوز تے مشکوک معلوم ہوندا اے۔ بچپن وچ ذوالفقار علی بھٹو دا عشق وی لوکاں وچ ویکھیا تے ایہناں دی پھانسی اُتے صفت ماتم وی دماغ دے نہاں خانیاں وچ پنہاں اے۔ جنرل ضیاء الحق دی ریاست مدینہ دیاں جھگیاں وی بھُلن آلی نہیں تے آمریت دا اک ہور لمبا شکنجہ وی دل و دماغ توں محو نہیں ہو سکدا۔بھٹو دی تعزیت دے ووٹ دھی نے دو وار کیش کرائے تے بیوی دی تعزیت دے ووٹ شوہر نے کیش کرا لئے۔نواز شریف نے تن وار مسلم لیگ د ا ناں کیش کرایا تے قاف نے نواز شریف دی جلاوطنی کیش کرائی تے قاف دیاں وفاداریاں نوں مشرف نے کیش کرایا تے اک وار فیر لمبی آمریت نے پنجے گاڑھ لئے۔ جدوں سارے کئی کئی وار آزمائے گئے عمران خان ادھا ضیا الحق تے ادھا بھٹوبن کے میدان وچ اترے۔ سجے بازو تے کھبے بازو والیاں نوں ایہہ مکسچر پسند آیا تے انج ضیا دی ریاست مدینہ تے بھٹو دے نعرہ غربت نے عمران نوں لیان وچ مدد کیتی۔ جیہڑا وی آیا نویں تریخ پڑھان دی کوشش کیتی۔ پاک فوج نے دہشت گردی دے خلاف اک لمبی جنگ لڑی۔ القاعدہ تے کئی قسم دے طالبان نوں دہشت گرد تنظیماں کہیا جاندا رہیا۔پچھلے دن وزیراعظم نے اسامہ بن لادن نوں شہید کہیا۔ وزیراعظم عمران خان نال سادہ جہیا سوال اے کہ جے اسامہ بن لادن شہید اے تے فیر 6 ہزار فوجی اہلکار تے 70 ہزار پاکستانی عوام نوں دہشت گردی دا نوالہ کیوں بنایا گیا؟ کنفیوز حاکم ویلا اپنی کنفیوز قوم نوں دساں گے پاک فوج دے جوان شہید نیں یا اسامہ شہید نیں؟ مجاہدین شہید نیں یا طالبان شہید نیں؟ اوہ جہاد سی یا دہشت گردی؟ بچپن توں اج تیکر پاکستان وچ کجھ وی واضح نہیں، نسلاں دیاں نسلاں کنفیوز کر دتیاںفقط اپنے اپنے سیاسی مفاد دی خاطر… بھٹو وی شہید اکھوائے، ضیاء الحق وی شہید اکھواندے نیں۔ بینظیر بھٹو وی شہید اکھواندیاں نیں۔ طالبان وی شہید نیں۔ اسامہ بن لادن وی شہید نیں تے فیر کس دے ہتھ ایہہ اپنا لہو تلاش کرن؟ کنفیوز حکمراناں نے عوام نوں وی کنفیوز کر رکھیاں اے۔ ذاتی تے سیاسی مفاد دی خاطر حقائق کدی منظر عام اُتے نہیں لیائے جاندے۔ اسامہ بن لادن دے شہید کہن اُتے اعتراض نہیں سوال ساڈے جواناں دی شہادت اُتے اٹھ کھڑا ہوندا اے۔ دہشت گردی دے خلاف جنگ وچ پوری قوم متحد تے پُرعزم اے۔ فورسز نے بے پناہ قربانیاں دے کے دہشت گردی نوں ختم کیتا اے۔ پوری قوم سطح فورسز تے سکیورٹی اداریاں دیاں قربانیاں نوں تسلیم کردی اے۔ بے مثال قربانیاں دے نتیجے وچ دہشت گردی دا خاتمہ ہو چکیا اے تے امن بحال اے۔ افغانستان وچ امریکی آمد دے بعد ساڈی سرزمین بدترین دہشت گردی دی لپیٹ وچ آئی جس نال نہ صرف ساڈی معیشت دا بیڑہ غرق ہویا بلے جانی تے مالی نقصان وکھرا چکنا پیا۔ پاک فوج نے ایس بدترین دہشت گردی توں خلاصی پان لئی سخت تے بلاامتیاز اپریشن شروع کیتے جنہاں دے ذریعے دہشت گرد تے ایہناں دے سہولت کاراں دا صفایا کیتا گیا۔ ایہناں آپریشناں دے دوران ساڈے پاک فوج دے کئی افسر تے جوان وی شہید ہوئے۔ اج پوری قوم مسلح فورسز تے سکیورٹی اداریاں دیاں قربانیاں نوں تسلیم کردی اے ایہناں دی بے مثال قربانیاں دے نتیجے وچ دہشت گردی دا خاتمہ ممکن ہویا تے ملک وچ امن بحال اے۔

اپنا تبصرہ گھلو