کرونا اُتے غیر سنجیدگی اپنے نال دشمنی اے !

تحریر:شاہد ندیم احمد

کرونا وبا نے بدستور دنیا نوں اپنی لپیٹ وچ لے رکھیا اے۔ ایس توں مکمل نجات ویکسین دی تیاری یا فیر قدرت کاملہ دی کرم نوازی نال ای لبھ سکدی اے۔ کرونا نے پوری دنیا وچ 5 لکھ 30ہزار انساناں نوں مار دتا اے۔ متاثرین دی تعداد وچ وادھا ہو رہیا اے جیہڑی تعداد اک کروڑ پندرہ ہزار توں ودھ گئی اے۔ کرونا نے عالمی معیشت نوں وی شدید نقصان اپڑایا اے موتاں، مریضاں تے معیشت دے حوالے نال پاکستان وی متاثر ہویا اے۔ پاکستان وچ کرونا وائرس نال پنج ہزار دے نیڑے موتاں ہو چکیاں جد کہ مریض سوا دو لکھ تیکر اپڑ گئے نیںَ دنیا دے کول اج تیکر کرونا توں بچائو دی اک ای تدبیر ’’احتیاط‘‘ اے۔ پاکستان وچ احتیاطی تدبیراں اختیار کرن اُتے زور دتا جاندا رہیا اے، کجھ ملکاں نے کرونا دا پھیلائو روکن لئی مکمل لاک ڈائون کیتا جس دے بہتر نتیجے ساہمنے آئے، پاکستان وچ وی انج دے لاک ڈائون اُتے زور دتا جاندا رہیا پر وزیراعظم عمران خان نے انج دی تجویزاں نال اتفاق نہیں کیتا کیوں جے پاکستان وچ کروڑاں بندیاں دے روٹی روزگار دے سلسلے نوں جاری رکھنا سی، جے کرفیو جہیا لاک ڈائون قائم رکھیا جاندا تے بھکھ تے قحط نال انسانی المیہ دے جنم لین دے خدشے موجود سن۔ ایہہ امر واضح اے کہ حکومت نے آپ لاک ڈائون دا فیصلہ کرن دی بجائے نیشنل کمانڈ سنٹر دے ماہرین دی تجویز اُتے مختلف شہراں وچ لاک ڈائون دا فیصلہ کیتاسی تے ہن سمارٹ لاک ڈائون دا فیصلہ وی نیشنل کمانڈ اینڈ آپریشن سنٹر دی تجویز اُتے کیتا جا رہیا اے۔ ایس ادارے دی افادیت ایس لحاظ نال وی قابل ذکر اے کہ ایس وچ سارے صوبیاں دی نمائندگی اے، ایتھے جیہڑی پالیسی بنائی جاندی اے اوہ پورے ملک وچ نافذ ہو جاندی اے۔ کرونا دے انسداد دی خاطر جدوں پاکستان وچ لاک ڈائون دا فیصلہ کیتا گیا تے ڈیڑھ مہینے تیکر اکثر علاقیاں وچ کارخانے ’’ٹرانسپورٹ، شاپنگ مالز، مارکیٹاں تے تفریح گاہواں بند رہیاں تے مکمل لاک ڈائون نال یقینا غریب تے دیہاڑی دار بندے سب توں زیادہ متاثر ہوئے، حکومت نے انج دے بندیاں دی مالی مدد لئی احساس کفالت پروگرام شروع کیتا ، عوامی سطح اُتے وی شہریاں نے گھٹ آمدن والے بندیا دی مدد کیتی، پر ہر قسم دا کاروبار بند ہون دی وجہ نال صرف امداداُتے انحصار کر کے ایہہ اوکھا ویلا نہیں لنگھایا جا سکدا سی، ایس لئی نیشنل کمانڈ اینڈ آپریشن سنٹر دے مشورے نال مرحلہ وار کجھ کاروباری سرگرمیاں دی اجازت دتی گئی۔ سب توں پہلے تعمیراتی شعبے نوں کم دی اجازت دتی گئی تاں جے دیہاڑی دار بندے کم اُتے لگ سکن، تعمیراتی کماں دی حوصلہ افزائی لئی حکومت نے میٹریل تے پلاٹس دی خریداری اُتے ٹیکساں دی شرح گھٹ کر دتی۔ بعد وچ ٹرانسپورٹ تے کجھ کارخانیاں نوں وی ایس او پیز اُتے عملدرآمد دی یقین دہانی اُتے کم کرن دی اجازت دے دتی۔عید توں کجھ دن پہلاں سپریم کورٹ آف پاکستان نے اک حکم دے ذریعے شاپنگ مال تے مارکیٹاں کھولن دی اجازت دے دتی ایس فیصلے نوں حکومت نے تسلیم کیتا پر عید توںبعد کرونا توں متاثرہ بندیاں دی تعداد جس تیزی نال ودھی، ایس نے حکومتی تے عوامی سطح اُتے صورت حال تشویش ناک حد تیکر ودھ گئی سی۔
ایس صورت حال وچ ایہہ ممکن وکھائی نہیں دیندا سی کہ حکومت اک وار فیر لاک ڈائون ول جائے، کیوں جے تاجر، صنعت کار تے مزدور سڑکاںاُتے آ سکدے سن۔ ایس لئی سمارٹ لاک ڈائون متعارف کران دا فیصلہ کیتا گیا، سمارٹ لاک ڈائون وچ صرف ایہناں گلیاں تے علاقیاں نوں بند کیتا جاندا اے جتھے کرونا مریضاں دی تعداد ودھ رہی اے۔ حکومت دی عام شہری نوں وبا تے معاشی نقصانات توں بچان لئی حتی المقدور کوشش نوں سراہیا جا سکدا اے، تاں موسم سرما وچ پوری دنیا وچ وبا دی دوجی شدید تر لہر دی آمد دے خطرے نال نمبڑن دی تدبیراں ناگزیر نیں۔ دوجے پاسے عیدالاضحی دی آمد وچ کجھ ہفتے باقی نیں تے پورے ملک وچ مویشی منڈیاں سج رہیاں نیں۔ وزیراعظم نے ایس تناظر وچ تمام ضروری احتیاطی تدبیراں دی سختی نال پابندی لئی خصوصی اقدامات دی ہدایت کیتی اے جنہوں ہر سطح اُتے یقینی بنایا جانا متعلقہ حکام دی ناگزیر ذمے داری اے، تاں حکومت وی چنگی طرح جان دی اے کہ انتظامیہ دا کردار اطمینان بخش نہیں رہیا۔ عوام سارے بحراناں دے تدارک وچ ہر ممکن حکومت دے نال تعاون کرن دی کوشش کر رہے نیں جد کہ حکومت عوامی شکایات دے ازالے وچ ناکام ودکھائی دے رہی اے، ہجے تیکر کرونا ٹیسٹاں دی فیس گھٹ کرن، سرکاری ہسپتالاں تے قرنطینہ مرکزاں وچ متاثرہ بندیاں دی دیکھ بھال تے متعلقہ دوائیاں دی گھٹ قیمت اُتے دستیابی دے متعلق شکایتاں دور نہیں کیتیاں جا سکدیاں۔ سمارٹ لاک ڈائون دے حوالے نال وی کجھ شکایتاں مل رہیاں نیں کہ ایہہ ایہناں علاقیاں وچ وی لایا جا رہیا اے جتھے کوئی مریض ای نہیں، حکومت تے نیشنل کمانڈ اینڈ آپریشن سنٹر دی کارکردگی نوں داد دین دے نال ایس گل دی نشاندہی اُتے وی توجہ دین دی بوہت لوڑ اے کہ عوام دیاں شکایتاں گھٹ کیوں نہیں ہو رہیاں۔
ایس وچ شک نہیں کہ تحریک انصاف حکومت کرونا وبا دے متاثرین نوں سہولتاں دی فراہمی وچ سنجیدگی نال کوشاں اے۔ حکومت محدود وسائل وچ اپنے تائی ممکنہ حد تیکر سہولتاں فراہم کر رہی اے پر عوام دے تعاون دے بغیر ایس وبا دا مقابلہ کرنا ممکن نہیں ۔ کرونا توں بچائو دی دنیا دے کول صرف اک ای تدبیر ’’احتیاط‘‘ اے۔ پاکستان وچ احتیاطی تدبیراں اختیار کرن اُتے زور دتا جاندا رہیا اے پر عوام احتیاطی تدبیراں اختیار نہیں کر رہے ، کرونا ویکسین دی تیاری تیکر احتیاطی تدبیراں اُتے سختی نال عمل کر کے بچن لئی ہر شہری نوں اپنا کردار ادا کرنا ہوئے گا۔ پاکستانی عوام کرونا توں بے انتہا موتاں دے باوجود سنجیدگی نال نہیں لے رہے ، اوہ نہ صرف اپنے نال دشمنی کر رہے نیں، بلکے دوجے لوکاں لئی وی خطرے دا کارن بن رہے نیں۔ حکومت نوں نیشنل کمانڈ اینڈ آپریشن سنٹر دے مشورے نال ایس او پیز اُتے عملدرآمد کروان وچ وی موثر حکمت عملی واضع کرن دی لوڑ اے، جے حکومتی نرمی تے انتظامیہ دی کوتاہی دا سلسلہ انج ای چلدا رہیا تے آن والے دناں وچ حکومت دی لکھ کوششاں دے باوجود کرونا اُتے قابو پانا اوکھا ای نہیں ناممکن ہو جائے گا۔

اپنا تبصرہ گھلو