حکومت کرفیو ورگا سخت لاک ڈائون لائے: میڈیکل تنظیماں

لہور( پنجابی میڈیا گروپ)کورونا دی تیزی نال ودھدی ہوئی صورتحال دے پیش نظر، میڈیکل تنظیماں نے پنجاب حکومت توں کرفیو ورگا سخت لاک ڈان لان دا مطالبہ کر دتا۔
پاکستان میڈیکل ایسوسی ایشن، ینگ ڈاکٹرز ایسوسی ایشن، لیڈی ہیلتھ ورکرز ایسوسی ایشن تے پیرا میڈیکس سٹاف نے سروسز ہسپتال وچ سانجھی پریس کانفرنس وچ مطالبات پیش کردیاں ہوئیاں اکھیاکہ نجی ٹیچنگ ہسپتالاں نوں کورونا دی بیماری تک نیشنلائز کیتا جائے، ہیلتھ کیئر کمیشن سفید ہاتھی دا کردار ادا کر رہیا اے جیہڑے نجی ہسپتالاں وچ بیڈز مختص کروان اچ نکام اے، حکومت ہیلتھ پروفیشنلز ول توجہ نہیں دے رہی، حکومت ویکسی نیشن دے عمل نوں تیز کرے۔
پریس کانفرنس وچ پی ایم اے لاہوردے صدر ڈاکٹر اشرف نظامی، ینگ ڈاکٹرز ایسوسی ایشن دے صدر ڈاکٹر مدثر نواز اشرفی، سر پرست ڈاکٹر سلمان حسیب، لیڈی ہیلتھ ورکرز ایسوسی ایشن دی صدر رخسانہ تے پیرا میڈیکل سٹاف ایسوسی ایشن دے صدر تنویر نے رلت کیتی۔