آکھن لو ک سیانے

پانی دے ہوندیاں یتمّم روا نہیں
ویروا:مت دِتی گئی اے پئی جدوں کول کوئی شَے ہووے تاں مُڑ جان بُجھ کے اوس نُوں بچائی رکھن لئی لِلّاں لَیندیاں پھِرن کنجوُساں مکھی چُوساں دا کم اے۔ہوندیاں سوندیاں شے نُوں نہ وارتن والے نُوں مُورکھ ای آکھدے نیں۔
پانی وِچ سوٹا ماریاں کدی دو نہیں ہوندا
معنے: سوٹا: ڈنڈا٭دو ہون: دوحصے ہون
ویروا:مت دِتی گئی اے پئی اِک خاندان دے لوکاں وِچ ماڑا موٹا بھیڑ بھِڑّکا وی ہو جاوے تاں کوئی گل نہیں ہوندی۔اوہناں وِچ رسائی وی چھیتی ای ہو جاندی اے ۔ اوہ کِسے ویلے مُڑ آپو وِچ رَل کے بَیٹھ سکدے نیں۔
پائی ڈوئی دا لیکھا برابر
معنے:پائی: چار ٹوپے دانے۔
ویروا:مت دِتی گئی اے پئی کئی مُورکھ لوک پائی دانیاں نُوں ڈوئی وچ اِک واری پائے سالن نال رلا دیندے نیں۔حالاں اوہناں وِچ کِنّاں فرق ہوندا اے۔ڈوئی وِچ اُکہا ای گھٹ سلونا پیندا اے پر پائی دانے تاں کِنے وڑے ہوندے نیں۔
پائی نہیں اخے چار اے
معنے: پائی: اٹھ سیر’دو دڑوپے۔
ویروا:مت دِتی گئی اے پئی کئی لوک اِکو گل دے اپنے کولوں ای دھکے نال اپنی گل منوان لئی ہور معنے کڈھ کے اپنی عقل چترائی اتے سیانف دا رُعب جمان دی کوشش کردے رہندے نیں۔حالاں گل اوہیو ای ہوندی اے۔بندہ بھانویں پائی آکھ لوے جاں چار ٹوپے آکھ لوے۔
پایا مال ‘ دیدے لال
معنے: پایا مال: مال مِل گیا٭ دِیدے: اکھِیاں٭لال: سُرخ’ رتیاں۔
ویروا: ایس اکھان وِچ مت دِتی گئی اے پئی چاتر لوک جدوں اپنی شَے لَے لَین تاں اوسے ویلے اگلے ولوں لال اکھِیاں کرکے ویکھن لگ پَیندے نیں۔اتے تُوں کؤن تے میں کؤن والی گل سنان لگ پیندے نیں۔
٭٭٭