کھوہ آزادی دی اک راہ

khalid hussain Thathal

کُھوہ آزادی دی اک راہ
کُھوہ وچ چھال ظُلم جبر تیں اک چُھٹکارا
اپنی عزّت پت جان بچاؤن دا اک چارا
موت نوں اک ولا دے کے
ان ڈِٹھے کسے نرک دے ڈر تیں
نسّن دا اک اولّا جتن
خبرے کتنے کھوہاں وچ
آزادی دی خوشی وچ کتنیاں
دِھیاں بھیناں مانواں
رام رام واہ گُرو دی اللہ اکبر دا
وِرد جپن کردیاں
باں باؤلی کُھوہاں وچ چھالاں ماریاں
تے کُھوہاں دے شوہاں وچ
اوہناں ترنجن جا وسائے
پُونیاں کت کت، سُوتر وٹ وٹ کھیس بنائے
منجیاں بُنیاں داج بنائے
نہ کوئی وری نہ ٹوم کسے دی
سدھر دل وچ پُنگرن دتی
مایئیں بیٹھیاں مہندیاں لائیاں
چھٹیاں جھلیاںسولھے گائے گھوڑیاں گائیاں
ڈولئیں بیٹھیاں چِیک نہ ماری
نہ بابل نوں ترلے پائے
نہ بھراواں بھیناں مانواں دے
گل لگ کے روئیاں
نہ کہاراں نوں اُڈیکیا
آپ ای آزادی دے چار چو فیرے
کھلرے چاء دیاں دُھماں نال
اپنی ڈولی آپ ای چا کے
ساہوریاں دے آئیاں
لگدے لانے مگر مگر اُنج
وِدیا کرن تے ٹورن آئے
چھہویاں برچھے نیزے چھُریاں
چمکارے مارے
کھوہاں وچ ڈُبیاں گھڑیاں نال
گھڑولیاں بھریاں
اپنے چرخے اج وی جد اوہ
بھنڈر کُھوہاں وچ
ترنجنیں بیٹھ کے گیت گاندیاں
جد اوہ پُونیاں کتدیاں نیں
تے اوہناں دی گُھوکر تے گیت
دھرتی اُپر کھِلر جاندے نیں
دھرتی اُتے روندیاں پِٹدیاں
بھین بھراواں مانواں بابل
اوہناں نوں وازاں مارن
اپنے ول بلاون
تے اگوں اوہ ایہہ آکھن
تہانوں اپنے آل دوالے
نہراں دریا کُھوہ نہیں دِسدے
جِتھے اج وی چُھریاں چھہویاں پھاہاں
تے بندوقاں دی استبازی نال ساڈیاں
ڈولیاں نکلدیاں تے
ساڈی رُخصتی ہوندی اے

اپنا تبصرہ گھلو