غزل

بابانجمی

اس دنیا توں جو وی جتاں تیرے اگے ہار دیاں
ایسے کھیڈ وچ منشا میری ساری عمر گزار دیاں
انج لگدا اے میری گڈو میرے ای بھانڈے مانجے گی
ایہنوں ٹورن لئی میں کتھوں ٹی وی موٹر کار دیاں
نویں رواجاں جہڑا کیتا ہمسائے دی دھی دا حال
ویکھ کے میرا جی کردا اے اپنی لاڈو مار دیاں
مرنا جینا نال انکھ دے ورثے دے وچ ملیا اے
جنا چر تک دھون سلامت کسراں بازی ہار دیاں
دشمن میتھوں منگ رہیا اے میری اک حیاتی نوں
مینوں لکھاں وار وی لبھے اس دھرتی توں وار دیاں
خورے کہڑے سدھر لے کے آیا میرے بوہے تے
ایہدی گل سنن توں پہلاں کسراں کر انکار دیاں
جہڑی گل نہ کٹھی ہووے کئی ہزاراں لفظاں وچ
میرے وچ فنکاری اینی مصرعے وچ کھلار دیاں
ہر پرھیا چوں لے کے اٹھاں اپنے فن دی مالی میں
اج پنجابی غزل نوں بابا ایہو جیہا شنگھار دیاں