نعت شریف

حفیظ تائب

رب دیا پیاریا! کد ساہ لیسی روح میری دا پارہ
کد ویکھن گیاں سکدیاں اکھاں روضہ پاک دوبارہ
تیرا نوری چہرہ تکنا کدوں مقدر ہوسی
غم دے شوہ وچوں کد ہوسی میرا پار اُتارا
میرے ماپے‘ میری آل اولاد ترے توں صدقے
ماندی جندڑی دے روگاں دا کد ہووے گا چارا
تیرے اک دم بدلے رب نے جگ دی راس رچائی
تیرے نغمے دم دم چھوہوے ساہواں دا اکتارا
انگلی لا کے مینوں تیری رحمت ٹوری جاوے
ایتھے اوتھے ہو نہیں سکدا تیرے بناں گزارا
فجریں تیرا نام لواں تے صدقے جاون مہکاں
راتیں گل کراں جد تیری تارے بھرن ہنگارا
حشر دیہاڑے وی تائبؔ نوں خاص نظر وچ رکھیں
توں وڈیایا جیویں دنیا وچ ایہہ اوگن ہارا