“اوہ عام غلطی جیہڑی لیپ ٹاپ دی زندگی نوں چھوٹا کر دیندی اے”
بوہتے لوک لیپ ٹاپ نوں گودی وِچ رکھ کے ورتنا پسند کردے نیں کیونکہ اوہناں نوں ایہہ زیادہ سوکھا لگدا اے۔ لیپ ٹاپ دا فائدہ ای ایہہ وے کہ ایہنوں کِدھرے وی لِجایا جا سکدا اے تے کِسے وی جگہ رکھ کے ورتیا جا سکدا اے۔ پر کِسے نرم جگہ اُتے لیپ ٹاپ رکھ کے ورتنا ایہدی زندگی نوں چھیتی مُکا دیندا اے۔
لیپ ٹاپ نوں کِسے نرم تکیے، گودی، کشن یا بستر اُتے رکھن نال ایہدے پنکھے (Fan) دے اگے رکاوٹ آ جاندی اے، جس توں ہوا دا راستہ بند ہو جاندا اے۔ ایہدے نال لیپ ٹاپ زیادہ گرم ہو جاندا اے کیونکہ پنکھے نوں مشین ٹھنڈی رکھن لئی زیادہ زور لانا پیندا اے۔ ایہہ دباؤ ویلے دے نال نال لیپ ٹاپ دے وکھو وکھ حصیاں، خاص طور تے بیٹری نوں نقصان پہنچاندا اے تے مشین دی رفتار وی گھٹ جاندی اے۔
ایہدی اک وڈی نشانی ایہہ وے کہ لیپ ٹاپ دے پنکھے دی آواز ودھ جاندی اے تے اوہ چھیتی گرم ہون لگ پیندا اے۔ جے تسیں بستر، صوفے، فرش یا گودی وِچ ای لیپ ٹاپ ورتنا چاہندے او، تے ایس گل دا خیال رکھو کہ اوہ کم دے دوران زیادہ گرم نہ ہووے۔
ایس لئی کولنگ پیڈ ورتے جا سکدے نیں جیہڑے لیپ ٹاپ نوں ٹھنڈی ہوا دیندے نیں۔ ایہناں پیڈز دا مقصد ای ایہہ وے کہ لیپ ٹاپ نوں سڑن توں بچایا جائے؛ جے کولنگ پیڈ نہیں، تے لیپ ٹاپ نوں ایس طرحاں رکھو کہ اوہ نرم سطح توں ذرا اُچا رہے۔ جے لیپ ٹاپ حدوں ودھ گرم ہو جائے، تے اوہنوں ورتنا بند کر دینا چاہیدا اے تاکہ مشین تباہ ہون توں بچ جائے۔
