کراچی وچ کوکین تے دوجی منشیات دی مبینہ ڈیلر انمول عرف پنکی نے اپنا نیٹ ورک کویں بنایا؟
منشیات دی مبینہ ڈیلر انمول کراچی دے علاقے نگارہ گوٹھ بلوچ پاڑہ دی رہائشی سی، سال 2008 وچ ڈیفنس تے کلفٹن وچ ہون والی ڈانس پارٹیاں وچ منشیات دی سپلائی شروع کیتی۔ ملزمہ نے ایس فیلڈ وچ اپنا ناں “پنکی” رکھیا تے فیر ہولی ہولی اپنے کم نوں پھیلا لیا۔
کراچی وچ پچھلے سال ارمغان کیس سامنے آن توں بعد ملزمہ لاہور تے اسلام آباد وچ لک گئی سی، تے اوتھوں ای منشیات دا نیٹ ورک چلاندی رہی۔
ذرائع دا دعویٰ اے کہ ملزمہ انمول عرف پنکی دے 800 توں ودھ کسٹمرز سن جنہاں نوں اوہ اپنے نیٹ ورک دے ذریعے نشہ سپلائی کردی سی۔ ملزمہ دے دو سگے بھرا وی منشیات دی سمگلنگ وچ گرفتار ہو کے جیل جا چکے نیں۔
قانون نافذ کرن والے اداریاں دا کہنا اے کہ ملزمہ دے گروپ وچ دوجیاں عورتاں تے مرد وی شامل نیں، نیٹ ورک دے کارندے کوکین سمگل کر کے وکھو وکھ شہراں، کراچی دیاں یونیورسٹیاں، کالجاں تے آن لائن وی ویچدے سن۔
ذرائع دسدے نیں کہ ملزمہ لاہور وچ کپڑے دا کاروبار وی کردی اے۔
یاد رہے کہ کراچی وچ گارڈن پولیس نے اج کامیاب کارروائی کردے ہوئے منشیات ویچن والی عورت نوں گرفتار کر لیا سی۔
ملزمہ نوں اج ای عدالت وچ بغیر ہتھکڑیاں دے پیش کیتا گیا، پولیس والا راہ وکھاندا رہا تے ملزمہ انمول عرف پنکی وی آئی پی پروٹوکول دے مزے لیندی رہی۔
