پنکی دے نیٹ ورک وچ افریقا دے بندے وی نیں، برانڈ نیم ای ملزمہ دا پھندا بنے گا: کراچی پولیس چیف

کراچی پولیس چیف آزاد خان دا کہنا اے کہ منشیات فروشی دے کیس وچ پھڑی گئی ملزمہ انمول عرف پنکی دے موبائل توں 869 نمبر ملے نیں، جنہاں وچوں 132 کراچی دے نمبر نیں۔ کراچی وچ پریس کانفرنس کردیاں پولیس چیف نے آکھیا کہ پنکی دا کیس ساڈے لئی اک “ٹیسٹ کیس” اے، اسیں ایہنوں منطقی انجام تیکر پہنچاواں گے، دیکھنا پنکی دا برانڈ نیم ای اوہدے لئی گچی دا پھاہ (پھندا) بنے گا۔

اوہناں آکھیا کہ اسیں کیس وچ صرف کراچی تیکر محدود نہیں آں، جیہڑے لوک اوہدے توں نشہ لے کے ویچدے سن اوہناں نوں پھڑیا اے تے ملزمہ دے سہولت کاراں نوں وی پھڑیا جا رہیا اے۔ سچل وچ پنکی دے پرانے گھر چھاپہ ماریا گیا جتھوں منشیات ملی اے، ایہ نشہ باہر توں آؤندا سی۔ پولیس چیف مطابق ملزمہ دے بینک کھاتیاں دی تفصیل لے لئی گئی اے، ملزمہ ولوں 3 کروڑ دی ٹرانزیکشن کیتی گئی اے۔ ایس نیٹ ورک وچ افریقا دے بندے وی شامل نیں تے ملزمہ پنجاب وچ سی۔ اوہناں مزید آکھیا کہ ایف آئی اے تے سائبر کرائم نال رابطہ کر لیا گیا اے، موبائل توں ملے نمبراں دی وڈے پدھر اُتے تفتیش جاری اے تے ہر ملوث بندے خلاف کارروائی ہوئے گی۔