راولپنڈی وچ نوجوان نوں قتل کر کے لاش گلیاں وچ گھسیٹن دا انکشاف
راولپنڈی: نوجوان نوں قتل کر کے لاش موٹر سائیکل نال بنھ کے گلیاں وچ گھسیٹن دا لرزہ خیز واقعہ، آئی جی پنجاب ولوں نوٹس
راولپنڈی دے علاقے دھمیال وچ اک نوجوان نوں قتل کرن توں بعد اوہدی لاش نوں موٹر سائیکل نال بنھ کے محلے وچ گھسیٹن دا انسانیت سوز واقعہ سامنے آیا اے، جس توں بعد آئی جی پنجاب نے ملزماں دی فوری گرفتاری دا حکم دے دتا اے۔ مقتول دی پچھان زین شاہ دے نام توں ہوئی اے، جیہنوں جمعے والے دن قتل کیتا گیا سی۔
راولپنڈی پولیس مطابق زین شاہ دے قتل تے لاش دی بے حرمتی دا واقعہ اصل وچ دشمنی تے بدلے دا نتیجہ اے۔ پولیس نے دسیا کہ اوہدی دن دھمیال وچ زین شاہ دے ساتھیاں نے فائرنگ کر کے اک دکاندار “سراج محسود” نوں قتل کیتا سی۔ سراج دے قتل دا بدلہ لین لئی زین نوں موٹر سائیکل اُتے اغوا کیتا گیا تے فیر کسے نامعلوم تھاں اُتے لے جا کے اینا تشدد کیتا گیا کہ اوہدی موت ہو گئی۔ اوہدے توں بعد ملزماں نے اوہدی لاش نوں موٹر سائیکل نال بنھ کے گھسیٹیا۔ پوسٹ مارٹم دی مڈھلی رپورٹ مطابق زین دی موت تشدد پاروں ہوئی اے تے اوہدی لاش اُتے گھسیٹے جان دے نشان تے زخماں دیاں خراشاں وی موجود نیں۔
