سکول ٹیچر دیاں نازیبا تصویراں بنا کے تعلقات رکھن لئی دباؤ پاؤن والا سیکیورٹی گارڈ گرفتار

سکول ٹیچر دیاں اے آئی (مصنوعی ذہانت) دے ذریعے نازیبا تصویراں بنا کے بلیک میل کرن والا سکیورٹی گارڈ گرفتار کر لیا گیا اے۔

متاثرہ سوانی دی شکایت تے ایس ایچ او شالیمار علی حسن نے ٹیم دے نال رل کے کارروائی کیتی۔ ایس پی سول لائنز دے مطابق ملزم رمضان نوں نویں ٹیکنالوجی دی مدد نال خانیوال توں گرفتار کیتا گیا اے۔

ملزم جھوٹیاں تصویراں وائرل کرن دیاں دھمکیاں دے کے خاتون ٹیچر توں پیسے منگدا رہا، جپکہ سکیورٹی گارڈ ٹیچر تے ناجائز تعلقات قائم کرن لئی وی دباؤ پاؤندا رہا۔ پولیس دے مطابق ملزم نوکری چھڈ کے خانیوال نس گیا سی تے وکھو وکھ نمبراں توں رابطے کردا سی۔ ملزم دے ورتوں وچ جیہڑا موبائل فون تے دوجا ڈیجیٹل ریکارڈ سی، اوہنوں قبضے وچ لے لیا گیا اے۔

ایس پی سول لائنز دے مطابق ملزم دے خلاف مقدمہ درج کر کے ہور تفتیش جاری اے۔ چوہدری اثر علی دا کہنا اے کہ سوانیاں نوں ہراساں کرن تے بلیک میلنگ وچ ملوث ملزماں نال لوہے دے ہتھاں نال نمٹیا جائے گا۔