ٹھل: پسند دی شادی کرن تے کڑی دے گھروالیاں نے پورے پنڈ نوں اگ لا دتی۔
پنڈ غازی خان چنہ وچ کڑی صدرا چنہ تے محمد حسن برڑو نے پسند دا ویاہ کر لیا، جیہدے توں بعد کڑی دے وارثاں نے برڑو برادری دے پنڈ تے حملہ کر کے پورے پنڈ نوں اگ لا دتی۔
ٹھل وچ پسند دے ویاہ دی سزا پورے پنڈ نوں بھگتنی پئی۔ کڑی دے وارثاں تے چنہ برادری نے برڑو برادری دے گھراں تے حملہ کیتا تے گھراں نوں اگ لا دتی، جیہدے توں بعد برڑو برادری دے لوگ گھر خالی کر کے نس گئے۔ کڑی صدرہ چنہ دا کہنا اے کہ اساں حیدرآباد دی عدالت وچ پسند دا ویاہ کیتا سی، مینوں کسے نے اغوا نہیں کیتا تے نہ ہی کوئی مینوں دھمکا رہا اے۔ میرے وارثاں نے الزام لایا اے کہ میں نکی عمر دی آں، جیہڑا کہ غلط الزام اے، میں جوان آں۔ میں گھروں صرف اپنے اک سوٹ وچ نکلی سی تے کوئی چیز نال نہیں چُکی، پر میرے تے جھوٹھے الزام لائے جا رہے نیں۔
پسند دا ویاہ کڑی تے منڈے نے کیتا پر سزا پورے پنڈ نوں ملی۔ صدرہ چنہ دے وارثاں نے حسن برڑو دے پنڈ محمد صدیق آرائیں نوں اگ لا دتی جیہدے نال پورا پنڈ سڑ کے سواہ ہو گیا۔ برڑو برادری دا کہنا اے کہ اعلیٰ ادارے ساڈی مدد کرن، جدکہ پریمی جوڑے نے بھی اپیل کیتی اے کہ ساڈی جان نوں خطرہ اے۔ پولیس ولوں پنڈ جلان دے خلاف چنہ برادری دے 30 بندیاں تے پرچہ (مقدمہ) درج کر لیا گیا اے تے 5 بندیاں نوں گرفتار کر لیا گیا اے، جدکہ ہور چھاپے مارے جا رہے نیں۔
