کراچی: شارٹ ٹرم کڈنیپنگ وچ ملوث گینگ پھڑیا گیامحکمہ ایکسائز دا حاضر سروس انسپیکٹر بھی شامل۔

کراچی وچ شارٹ ٹرم کڈنیپنگ (تھوڑے ویلے لئی اغوا کاری) وچ ملوث گینگ دے 8 کارندیاں نوں گرفتار کر لیا گیا اے۔

پولیس دے مطابق محکمہ ایکسائز دا حاضر سروس انسپکٹر اغوا برائے تاوان وچ ملوث نکلیا، ملزم پولیس دی وردی ورتدے (استعمال کردے) سن، اوہناں کولوں اسلحہ تے گڈی برآمد کر لئی گئی اے، ملزماں دے خلاف مقدمے درج کر کے تفتیش شروع کر دتی گئی اے۔

بریگیڈ پولیس نے کارروائی کردیاں انتہائی مطلوب اغوا کار گینگ نوں گرفتار کر لیا، گرفتار ملزماں وچ محکمہ ایکسائز دے انسپکٹر سمیت 8 ملزم شامل نیں۔ ملزم شارٹ ٹرم کڈنیپنگ دیاں کئی وارداتاں وچ ملوث نیں، ملزماں نے اک شہری نوں اغوا کر کے ڈیڑھ لاکھ روپے تاوان وصول کیتا سی۔

پولیس دا کہنا اے کہ گرفتار ملزم پولیس دی وردی دا استعمال کردے سن، ملزماں دے قبضے چوں چار پستول تے گڈی برآمد کر لئی گئی اے۔ ملزم کئی شہریاں نوں اغوا کر کے تاوان وصول کر چکے نیں، کارروائی دے دوران ایکسائز انسپکٹر سمیت چار ملزم وردی پائے ہوئے (ملبوس) سن۔

پولیس دے مطابق ملزماں نوں پکڑن لئی جال بچھایا گیا سی، گرفتار ملزماں وچ ایکسائز انسپکٹر حامد، عرفان، شاہزیب، شہریار، عامر، آفاق، جمشید تے زین عرف ڈوگر شامل نیں۔