برطانیہ: نابالغ بچی نوں 4 سال تیکر زیادتی دا نشانہ بناؤن والے 15 مجرماں نوں 188 سال قید دی سزا
برطانیہ وچ گھٹ عمر کُڑیاں نال جنسی زیادتی، مار کُٹ (تشدد) تے استحصال وچ ملوث 15 مجرماں نوں اکٹھے (مجموعی طور پر) 188 سال قید دی سزا سُنا دتی گئی اے۔
بریڈ فورڈ وچ اک گھٹ عمر کڑی (جیہڑی اوس ویلے 14 توں 18 سال دے وچکار سی) نوں جنسی زیادتی تے استحصال دا نشانہ بناؤن والے 15 مجرماں نوں مجموعی طور تے 188 سال قید دی سزا سُنائی گئی اے۔
ویسٹ یارکشائر پولیس ولوں جاری کیتی گئی رپورٹ دے مطابق متاثرہ بچی نال ایہہ گھناؤنا جرم 2007 توں 2011 دے دناں وچ لگاتار کیتا جاندا رہا سی، پر 2015 وچ ایہدے بارے پہلی واری پولیس نوں کچھ سُراغ ملے تے اگلے ای سال پکے پیریں کارروائی دا مُڈھ (آغاز) کیتا گیا۔ پچھلے دو سالاں توں ایہناں 15 جنسی درندیاں دے خلاف چلدے عدالتی مقدمے توں بعد ہن جج نے ملزمان دے ناں تے سزاواں دی تفصیل پبلک کرن دی اجازت دے دتی اے۔
ملزمان توں پچھ گچھ کئی سالاں تیکر چلدی رہی تے ثبوت اکٹھے کرن، گواہواں دے بیان ریکارڈ کرن تے وکھ وکھ ملزمان دے خلاف مقدمے چلون توں بعد عدالت نے کئی پیشیاں تے وکھ وکھ ٹرائلز دے ذریعے ایہہ فیصلہ سُنایا۔
عدالتی کارروائی دے دوران خبراں دین (رپورٹنگ) تے پابندی لگی ہوئی سی تاں جے مقدمے دی شفافیت خراب نہ ہووے۔ بدھ دے دہاڑے جج نے ایہہ پابندیاں مُکا کے (ختم کرتے ہوئے) سزاواں دی تفصیل جاری کرن دی اجازت دتی۔ عدالت نے سارے ملزمان نوں سنگین جنسی جرائم دا قصوروار مندے ہوئیاں 8 توں 17 سال تیکر دی قید دیاں وکھ وکھ سزاواں سُنائیاں۔ اکٹھے کر کے ایہہ سزاواں 188 سال بندیاں نیں۔
متاثرہ خاتون نے فیصلے توں بعد اپنے بیان وچ آکھیا کہ اوہدے بالپݨ (بچپن) تے چڑھدی جوانی (نوجوانی) تے ایہناں واقعیاں دے ڈونگھے (گہرے) اثرات پئے تے ایہہ پھٹ (زخم) عمر بھر اوہدے نال رہن گے۔
بریڈفورڈ پولیس دی سینئر تفتیشی افسر وکی گرین بینک نے دَسیا کہ متاثرہ خاتون نے انوکھی ہمت تے استقامت دا مظاہرہ کیتا۔ بالاں (بچوں) نال جنسی بدسلوکی کسے حال منظور نہیں۔
پولیس دے مطابق متاثرہ کڑی 2007 توں 2011 دے وچکار بریڈفورڈ وچ جنسی استحصال دا شکار رہی۔ ایس دوران اوہدی عمر 14 توں 18 سال دے وچکار سی۔ کڑی کئی واری گھروں غائب (لاپتا) ہوئی پر اوس ویلے ایہناں واقعیاں نوں پورے طریقے نال منظم جنسی استحصال نال جوڑیا نہ جا سکیا۔ 2015 وچ ویسٹ یارکشائر پولیس نے پرانے “مسنگ پرسن” (لاپتا افراد) دے ریکارڈز تے بالاں دے استحصال والیاں فائلاں نوں مڑ کے (دوبارہ) دیکھنا شروع کیتا۔ ایسے دوران پتا چلیا کہ اوہ خاتون 2007 توں 2011 دے وچکار بار بار لاپتا ہوئی سی۔
پولیس نوں شک ہویا کہ ایہہ بچی ماضی وچ کسے گینگ دے ہتھے چڑھی ہووے گی۔ جیہدی پچھ گچھ لئی اوہدے نال رابطہ کیتا گیا جیہڑی ہن ادھیڑ عمر دی خاتون اے۔ متاثرہ خاتون نے دَسیا کہ اوہنوں ایسے گینگ دے بندے بار بار گھروں لے جا کے زیادتی دا نشانہ بنایا کردے سن۔ ایس بیان توں بعد فروری 2016 وچ پکے طور تے تحقیقات شروع کیتیاں گئیاں۔
لاہو نیٹ ورک کیویں بے نقاب ہویا؟
تفتیش کاراں نے کئی سال پرانے پولیس ریکارڈز، موبائل فون ڈیٹا، گواہواں دے بیاناں تے دوجے ثبوتاں نوں کھوجیا۔ تفتیش توں پتا چلیا کہ متاثرہ کڑی نوں وکھ وکھ ویلے وچ ڈھیر سارے بندیاں نے نشانہ بنایا سی۔
پولیس دے مطابق ایہہ اک الجھی ہوئی (پیچیدہ) تے لمی تفتیش سی کیونکہ واقعے کئی سال پہلاں ہوئے سن تے ملزم وکھ وکھ جگہواں تے رہ رہے سن۔ ایس دے باوجود تفتیشی ٹیم نے ثبوتاں دے کُنڈے جوڑ کے ملزمان دے خلاف تکڑے مقدمے تیار کیتے۔
قانونی کارروائی:
تفتیش پوری ہون توں بعد کئی بندیاں تے فرد جرم لائی گئی۔ کیونکہ ملزمان دی گنتی زیادہ سی تے الزام وی وکھ وکھ طرحاں دے سن، ایس لئی سارے ملزمان دا اک ہی ویلے ٹرائل ممکن نہیں سی۔ ایسے پاروں مقدمے نوں وکھ وکھ حصیاں وچ ونڈیا گیا تے پچھلے دو سالاں دے دوران کئی الگ الگ ٹرائلز کیتے گئے۔ ہر ٹرائل وچ جیوری نے ثبوتاں تے گواہواں دا جائزہ لیا۔
عدالت نے مقدمیاں دے دوران میڈیا تے پابندی رکھی تاں جے اک ٹرائل دی کوریج دوجے مقدمے تے اثر نہ پاوے تے ساریاں نوں انصاف ملے۔
سماعت کتھے ہوئی؟
مقدمیاں دی سماعت برطانیہ دی کراؤن کورٹ وچ وکھ وکھ مرحلیاں وچ ہوئی۔ کچھ ملزمان دے خلاف مقدمے کلے کلے (الگ الگ) سنے گئے جبکہ کچھ دے خلاف سانجھی (مشترکہ) سماعت وی ہوئی۔ آخری فیصلے تے سزاواں دا اعلان جون 2026 وچ کیتا گیا، جیہدے توں بعد جج نے رپورٹنگ توں پابندی ہٹا دتی۔
عدالت نے کیہ آکھیا؟
عدالت نے قرار دتا کہ ملزمان نے اک گھٹ عمر کڑی دا منظم طریقے نال استحصال کیتا تے اوہدی مجبوریوں دا فائدہ چکیا۔ جج نے اپنے ریمارکس وچ آکھیا کہ متاثرہ بچی نوں اوہ بچاؤ (تحفظ) نہ مل سکیا جیہدی اوہنوں لوڑ (ضرورت) سی، جبکہ ملزمان نے اپنی ذاتی ہوس پوری کرن لئی اوہنوں نقصان پہنچایا۔
