انمول پنکی نوں لہور منتقل کرن دی اجازت مِل گئی
انمول عرف پنکی دے خلاف لاہور وچ درج مقدماں وچ اہم پیشرفت ساہمنڑے آئی اے، لاہور پولیس نے سیشن کورٹ توں ملزمہ دی تفتیش لئی لاہور منتقلی دی اجازت حاصل کر لئی اے جد کہ وکھو وکھ پولیس ٹیماں دی کراچی روانگی وی متوقع اے۔
لاہور پولیس نے انمول عرف پنکی نوں لاہور منتقل کر کے تفتیش کرن لئی وزارتِ داخلہ تے متعلقہ عدالت نال چند دہاڑے (روز) پہلے رجوع کیتا سی، جِس توں بعد سیشن کورٹ توں مطلوبہ اجازت حاصل کر لئی گئی اے۔
پولیس ذرائع دے مطابق انمول عرف پنکی دے خلاف لاہور وچ مجموعی طور تے 5 مقدمے درج نیں، جِہناں دی پولیس نوں ہور تفتیش لوڑی دی (درکار) اے۔ ایس سلسلے وچ اقبال ٹاؤن، ماڈل ٹاؤن تے سول لائنز ڈویژن دی پولیس ٹیماں چھیتی کراچی روانہ ہووݨ گیاں۔ پولیس ذرائع دے مطابق لاہور پولیس کراچی دی متعلقہ عدالت توں قانونی اجازت حاصل کرن توں بعد ملزمہ نوں لاہور منتقل کرے گی۔ ایس توں ہٹ کے عدالت توں مقدماں دی تفتیش تے ہور قانونی کارروائی لئی وی باقاعدہ اجازت منگی جائے گی۔
دوجے پاسے سیشن عدالت جنوبی کراچی وچ انمول عرف پنکی دے خلاف گارڈن تھانے وچ درج منشیات دے مقدمے دے حوالے نال مبینہ سہولت کاراں دی ضمانت دی درخواست تے سماعت ہوئی۔ عدالت نے مقدمے دا چالان پیش نہ کیتے جاݨ تے غصے (برہمی) دا اظہار کردیاں ہویاں آؤن والے ہفتے لازمی طور تے چالان پیش کرن دا حکم دِتا تے ضمانت دی درخواست تے فیصلہ آؤن والے ہفتے تیکر ملتوی کر دتا۔ عدالت وچ پولیس نے مؤقف اپنایا کہ تحقیقات ہجّے (ابھی) مکمل نہیں ہو سکیاں، جِس پاروں چالان پیش نہیں کیتا جا سکیا۔ مقدمے وچ ملزمان سہیل الرحمان تے ذیشان ولوں ضمانت دی درخواست دائر کیتی گئی اے۔
ادھر جوڈیشل مجسٹریٹ جنوبی وچ انمول عرف پنکی دے خلاف قتل تے منشیات دے ست مقدماں دی سماعت وی ہوئی۔ سماعت دے دوران تفتیشی افسر پیش ہوئے جد کہ پولیس نے چالان جمع کراءوݨ لئی ہور مہلت منگی۔ عدالت نے پچھیا کہ مقدماں دا چالان ہن تیکر کیوں پیش نہیں کیتا گیا، جِس تے پولیس نے تحقیقات مکمل نہ ہووݨ دا مؤقف اختیار کیتا۔ عدالت نے پولیس نوں پیر تیکر سارے مقدماں دا چالان پیش کرن دا حکم دے دتا۔ عدالت نے قتل دے ہک مقدمے وچ مدعی دا دفعہ 164 دے تحت بیان ریکارڈ کرن لئی سددیاں (طلب کرتے) ہویاں تفتیشی افسر نوں ہدایت کیتی کہ مدعی شیروز نوں پیر دے دہاڑے عدالت وچ پیش کیتا جائے۔
پولیس دے مطابق انمول عرف پنکی دے خلاف گزری تے بغدادی تھانیاں وچ قتل تے منشیات سمیت مجموعی طور تے ست مقدمے درج نیں۔
واضح رہے کہ انمول عرف پنکی نوں 12 مئی نوں پولیس تے وفاقی ادارے دی سانجھی (مشترکہ) کارروائی وچ کراچی دے علاقے گارڈن توں گرفتار کیتا گیا سی۔ پولیس ولوں ملزمہ نوں پیشی لئی عدالت لیایا گیا تاں اوہدے شاہانہ انداز دی ویڈیو سوشل میڈیا تے وائرل ہو گئی سی۔ ایسے دوران ملزمہ دی چند آڈیوز وی وائرل ہوئیاں جِہناں وچ اوہ گاہکاں نال ڈیل کردی سݨائی دتی۔ جِس توں بعد ایہ گل ساہمنڑے آئی کہ ملزمہ ارباں روپیاں دی منشیات ویچݨ والے نیٹ ورک دی سرغنہ (لیڈر) اے جِس دا نیٹ ورک کراچی توں لاہور تیکر پھیلیا ہویا اے، ایس دھندے وچ اوہدے بھائی وی شریک نیں تے ڈلیوری لئی کڑیاں بائیک رائیڈرز دا استعمال کیتا جاندا اے۔
تحقیقاتی رپورٹاں دے مطابق ملزمہ کوکین تیار کرن وچ وی ماہر اے، جِس نے اپنا برانڈ لانچ کر رکھیا اے تے اوہدے گاہکاں وچ بڑے بڑے وڈے ناں شامل نیں۔ پنکی دے مطابق اوہدا سابق شوہر منشیات دے عالمی گینگ دا حصہ سی تے اوہدے ذریعے ای اوہ ایس دھندے وچ آئی تے اپنا وکھرا نیٹ ورک بݨا کے ایہ ماڑا (مذموم) دھندا شروع کر دتا۔ کراچی پولیس نے شروعاتی تفتیش وچ دَسیا سی کہ ملزمہ مختلف تھانیاں وچ درج 10 مقدماں وچ نامزد تے مفرور اے، جیہنوں پہلی واری 2018 وچ گرفتار کیتا گیا سی پر اثر و رسوخ پاروں اوہ چھیتی ای ضمانت تے رہیا ہو گئی سی۔ ایس توں بعد لاہور تے اے این ایف (ANF) وچ درج کیس وی ساہمنڑے آ گئے نیں۔
