تاجر محمد ہاشم نورزئی دے قتل دا معمہ حل، اصلی کہانی سامنے آ گئی
کوئٹہ: مقتول تاجر محمد ہاشم نورزئی نوں 16 کروڑ روپے دے کاروباری روجھمے (تنازع) تے قتل کرن دا انکشاف سامنے آیا۔
تفصیلات دے مطابق ڈی آئی جی کوئٹہ عمران شوکت نے پولیس لائنز وچ پریس کانفرنس کردیاں ہوئیاں انکشاف کیتا کہ مقتول تاجر محمد ہاشم نورزئی نوں کسی ذاتی دشمنی پاروں نہیں بلکہ 16 کروڑ روپے دے بھاری کاروباری تنازع تے بے دردی نال قتل کیتا گیا سی۔
ڈی آئی جی کوئٹہ دا کہنا سی کہ پولیس نے سائنسی خطوط تے تفتیش کردیاں ہوئیاں تاجر قتل کیس دے مرکزی ملزم سمیت 5 ملزماں نوں گرفتار کر لیا اے۔ گرفتار ملزماں دی دَس (نشاندہی) تے پولیس نے کارروائی کردیاں ہوئیاں واقعے دے مرکزی ملزم حکمت اللہ نورزئی نوں حراست وچ لیا۔ پر اوہدا بھرا تے شریک ملزم سعد اللہ نورزئی ہلے تک مفرور اے، جس دی گرفتاری لئی ٹیماں بنا دتیاں گئیاں نیں۔ پولیس حکام نے دَسیا کہ گرفتار ملزماں دی دَس تے واردات وچ ورتیا گیا اسلحہ برآمد کر لیا گیا اے۔
ایس توں علاوہ ہور دو ملزماں نوں شہر توں بھجدیاں ہوئیاں ناکہ بندی دے دوران گرفتار کیتا گیا، جنہاں دے قبضے وچوں 4 رائفلیں تے بھاری گنتی وچ گولیاں برآمد ہوئیاں، جدکہ واردات وچ ورتی گئی گڈی دی برآمدگی لئی چھاپے مارے جا رہے نیں۔
ڈی آئی جی عمران شوکت نے پریس کانفرنس دے دوران شہر دے دوجے تن اہم قتل کیسز نوں حل کرن دا دعویٰ کردیاں ہوئیاں کہیا کہ گوالمنڈی قتل کیس دے مرکزی ملزم سید نعیم شاہ نوں آلہ قتل سمیت گرفتار کیتا جا چکیا اے۔ اوہناں دا کہنا سی کہ اِسے طرحاں زرغون آباد قتل کیس دا ملزم شاہ محمد وی اپنے آلہ قتل سمیت پولیس دی گرفت وچ اے، جدکہ شالکوٹ قتل کیس دی مرکزی کردار نامزد ملزمہ نوں وی گرفتار کر لیا گیا اے تے اوہدے مفرور ساتھیاں دی بھال جاری اے۔ ڈی آئی جی نے دَسیا کہ شہر وچ امن و امان دی صورتحال نوں خراب کرن والے عنصراں نال سختی نال نمٹیا جائے گا۔
