آکھن لوک سیانے

بالیِے پھلاہ’ بھانویں مُڈھی ہووے’کریِے کواری بھانویں بُڈھی ہووے
معنے:پھلاہ: اِک رُکھ٭ مُڈھی: مُڈھ۔
ویروا: ایس اکھان وِچ مت دِتی گئی اے پئی لکڑ پھلاہ دی بالنی چاہیدی اے بھناویں اوس دا مُڈھ ای لبھ جاوے۔ اتے جے ویاہ کرنا ہووے تاں کواری کُڑی نال ای کرانا چاہیدا اے بھانویں اوہ عُمروں ڈھلی ہوئی ای کیؤں نہ ہووے۔رنڈی زنانی دی زبان چوکھی لمیں ہو جاندی اے۔
باندر تے بال’ تندرُست ہوں تاں ٹِک کے نہیں بہندے
معنے: بال: بچہ۔
ویروا: ایس اکھان وِچ مت دِتی گئی اے پئی باندر اتے بال جے کر ٹھیک ہون تاں کِتے نہ کِتے نٹھدے بجھدے اتے کُدھ دے ای رہندے نیں اتے اوہ اَک تھانویں کدی وی آرام نال نہیں بہ سکدے سگوں ہر ویلے بھڑتھوُ پائی ای رکھدے نیں۔
بانہ بھنّاں کم کریندے’ہاں بھنّا کم نہیں کریندا
معنے: بانہ بھنّاں: بازو ٹُٹے والا
ویروا: ایس اکھان وِچ مت دِتی گئی اے پئی بندے دا جے کِسے سٹ پھیٹ پاروں کوئی لِنگ پَیر ہِینا ہو جاوے تاں وی اوہ ماڑا موٹا کم کردا رہندا اے پر جے کِسے دا دِل ٹُٹ جاوے تاں اوہ ڈھیری ڈھاہ بہندا اے اتے اوہ کُجھ کرن جوگا نہیں رہ جاندا۔
بانہ جنیاں دی پھڑیے’ سرِ دیجیے’ بانہ نہ چھڈیے
معنے: جنیاں: جواناں٭بانہ: بازو۔
ویروا: ایس اکھان وِچ مت دِتی گئی اے پئی جِس دے نال وی بندہ مدد کرن لئی حامی بھر لوے اتے اوسدا بانہ بیلی بنے تاں مُڑ بھانویں اوس دی جان چلی جاوے پر اوس نُوں پِچھانہ نہیں ہٹنا چاہیدا۔اتے اگلے دے نال موڈھے نال موڈھا جوڑ کے کھلونا چاہیدا اے۔
بانجھ چِنگی’ اِکوانج بُری
معنے: بانجھ: اوہ عؤرت جیہدے ول بال نہ ہوندا ہووے
ویروا: ایس اکھان وِچ مت دِتی گئی اے پئی جے کر کِسے زنانی دے گھر بال نہ ہوندا ہووے تاں اوہ اوس زنانی نالوں چنگی ہوندی اے جیہدے ول اِکو بال جمیں اتے مُڑ نہ جمّیں۔اتے اوہ مُڑ ساری عُمر اگلے بال جمن دی ریجھ وِچ لنگھادیوے۔٭٭