تگڑے طوفان پاروں اک بندے دے ہوا وچ اڈن دی ویڈیو وائرل
بھارت وچ اک بندے دی ویڈیو وائرل ہوئی اے جیہڑا تگڑے طوفان دے دوران سچ مچ فضا وچ اڈن لگ پیا۔ جی ہاں، واقعی بھارتی ریاست اتر پردیش دے ضلع بریلی وچ ایہ واقعہ ساہمنے آیا۔
ننھے میاں ناں دا بندہ 13 مئی نوں بریلی دے پنڈ “بامیانہ” وچ تگڑے طوفان دے دوران ٹین دے بنے شیڈ دی رسی نوں پھڑی کھلوتا سی۔ پر تیز ہوا نے دوہاں نوں ہوا وچ اڈا دتا تے شیڈ دے نال اوہ بندہ وی فضا وچ اڈ گیا۔ بھارتی میڈیا دے مطابق ننھے میاں نے دسیا کہ اوہ فضا وچ 30 توں 40 فٹ دی اونچائی تک گیا تے فیر لگ بھگ 50 فٹ تھلے جا ڈگیا۔
جس رسی نوں اوہنے بچاؤ لئی پھڑیا سی اوہ بہت ماڑی (کمزور) ثابت ہوئی۔ زمین نال ٹکران دے نتیجے وچ ایس بندے دیاں کئی ہڈیاں ٹٹ گئیاں۔ بعد وچ اوہنوں علاج لئی ہسپتال پہنچایا گیا۔ ایہ واقعہ اوس ویلے ساہمنے آیا جدوں 13 مئی نوں اتر پردیش دے کئی علاقیاں نوں تگڑے طوفان دا ساہمنا کرنا پیا۔ ایس طوفان دے نتیجے وچ گھٹ توں گھٹ 89 بندے ہلاک تے 53 زخمی ہوئے، جد کہ 87 گھراں نوں نقصان پہنچیا۔
