مفت کھانا کھان لئی ہوٹل دی ڈش وچ اپنے ای وال سَٹن والی عورت

سوچو جے تسی کسے ہوٹل وچ گھر والیاں نال کھاݨا کھا رہے ہوو تے کھاݨے وچوں وال نکل آوے تاں تسی کیہ کرو گے؟

بوہتے لوکاں نوں گھِن آئے گی تے اوہ ترت (فوری طور پر) ہوٹل انتظامیہ کول شکایت کرن گے۔

پر اوتھے کیہ بݨے گا جَد کھاݨا کھاݨ والے بندے نے ہی ڈش وچ وال سَٹے ہووݨ تاں جے اوہنوں مفت کھاݨا (ڈش) مِل سکے؟

ایہو جیہا ای کچھ برطانیہ دے ہک ریسٹورینٹ وچ ہویا اے۔

ہک سی سی ٹی وی (CCTV) ویڈیو نوں سوشل میڈیا تے شیئر کیتا گیا اے جِس وچ وکھایا گیا اے کہ ہک سوانی (خاتون) نے اپنے گھر والیاں نال رات دا کھاݨا کھاندیاں ہویاں اپنے سر دا وال پٹ (توڑ) کے ہک ڈش وچ سَٹ دتا۔

فوٹیج وچ وکھایا گیا کہ سوانی نے پہلاں وال نوں پلیٹ وچ سَٹیا تے فیر ہک ویٹریس نوں سد (بلا) کے اوہ ڈش بدلݨ دی لوچنا (درخواست) کیتی۔

ریسٹورینٹ دے مطابق عملے نے سوانی نوں نویں ڈش دے دتی جِسنوں ایہ ٹبر (خاندان) بعد وچ پیک کروا کے گھر لے گیا کیوں جے اوہ پہلاں ای رج کے (کافی) کھا چکے سن۔

پر سی سی ٹی وی ویڈیو نوں چنگی طرحاں کھوجݨ (جائزہ لینے) توں بعد ریسٹورینٹ ولوں آکھیا گیا کہ سوانی نے وال خود ڈش وچ سَٹیا سی، تے فیر اوہناں نے ایس فوٹیج نوں آن لائن شیئر کر دتا۔

فیس بک تے ویڈیو پوسٹ کردیاں ہویاں ریسٹورینٹ نے لکھیا کہ ہک سوانی نے اپنے بال (بچے) دی ڈش وچوں وال نکلݨ دی شکایت کیتی سی تے عملے نے اوسے ویلے نویں ڈش سوانی دے اگے رکھ دتی۔

پوسٹ دے مطابق سوانی نے بدلی ہوئی نویں ڈش لے تاں لئی پر اوہنوں گھر لے گئی کیوں جے بال دا پیٹ پہلاں ای بھر چکیا سی۔

پوسٹ وچ ہور دَسیا گیا کہ فیر سی سی ٹی وی فوٹیج توں کھاݨے وچ وال آوݨ دی سچی وجہ معلوم ہوئی، تے ایہ وی پتا لگیا کہ اوہ سوانی ہوٹل چوں کیچپ دی ہک بوتل، آئسکریم دا باؤل (پیالہ) تے چاء دا اک چمچ وی اپنے نال (چوری کر کے) لے گئی سی۔

ریسٹورینٹ نے اپنی پوسٹ وچ لکھیا کہ اسیں اپنے گاہکاں (صارفین) نوں چیتے کروانا (یاد دلانا) چاہندے آں کہ چمچ یا کیچپ دیاں بوتلاں ساڈے ٹیک اوے (Takeaway) مینیو دا حصہ نہیں۔

ایہ پوسٹ سوشل میڈیا تے بڑی تیزی نال وائرل ہو چکی اے تے بوہتے لوکاں ولوں ریسٹورینٹ دے ایس دلیری والے ردعمل نوں سراہیا (پسند کیا) جا رہا اے۔